Rheoliadau Grantiau Adnewyddu Tai (Diwygio) (Cymru) 2002

Nodyn Esboniadol

(Nid yw'r nodyn hwn yn rhan o'r Rheoliadau)

Mae'r Rheoliadau hyn yn diwygio Rheoliadau Grantiau Adnewyddu Tai 1996 (“Rheoliadau 1996”) sy'n nodi'r prawf moddion ar gyfer penderfynu ar faint o grant adnewyddu a grant cyfleusterau i'r anabl a all gael ei dalu gan yr awdurdodau tai lleol i berchen-feddianwyr a thenantiaid o dan Bennod I o Ran I o Ddeddf Grantiau Tai, Adeiladu ac Adfywio 1996. Mae'r diwygiadau gan fwyaf yn dilyn newidiadau i Reoliadau Budd-dâl Tai (Cyffredinol) 1987 (O.S. 1987/1971) y seilir y prawf moddion arnynt.

Mae rheoliad 4 yn diwygio rheoliad 9 o Reoliadau 1996 er mwyn dileu'r gwrthdaro anfwriadol rhwng rheoliadau 8 a 9 lle cafodd plentyn neu berson ifanc ei faethu.

Mae rheoliad 5 yn cynyddu'r symiau a bennir yn rheoliad 10 o Reoliadau 1996 a thrwy hynny yn cynyddu'r swm cymwysadwy (sydd yn rhannol yn penderfynu swm y grant sy'n daladwy).

Mae rheoliad 6 yn cynyddu'r lluosyddion yn rheoliad 12 o Reoliadau 1996.

Mae rheoliad 7 yn cynyddu swm y cyfalaf, y gall plentyn neu berson ifanc ei gael heb i'r symiau a benderfynir yn unol â pharagraff 2 o Atodlen 1 i Reoliadau 1996 beidio â bod yn gymwys.

Mae rheoliad 8 yn cynyddu'r swm y gellir ei ddidynnu o enillion wythnosol mewn perthynas â thaliadau am ofal plant.

Mae rheoliad 9 yn diwygio rheoliad 19 o Reoliadau 1996 i ddarparu bod menyw ar seibiant mamolaeth yn cael ei thrin fel pe bai mewn gwaith am dâl a thrwy hynny'n galluogi i ffioedd gofal plant perthnasol a delir gael eu didynnu o enillion wythnosol a benderfynir yn unol â rheoliad 18 o Reoliadau 1996. Nid ymdrinnir ag unrhyw ffioedd gofal plant a dynnir mewn perthynas â'r plentyn y mae'r seibiant mamolaeth yn berthnasol iddo fel ffioedd gofal plant perthnasol.

Mae rheoliad 10 yn diwygio rheoliad 31 (incwm tybiannol) o Reoliadau 1996 ac mae rheoliad 11 yn diwygio rheoliad 38 (cyfalaf tybiannol) o Reoliadau 1996 i gymryd ystyriaeth o'r rhaglenni a elwir “Cyfnod Gweithgaredd Dwys ar gyfer y rhai dros 50” a “Chyfnod Gweithgaredd Dwys”.

Mae rheoliadau 12, 13 a 14 yn gweud diwygiadau amrywiol i reoliadau ynghylch myfyrwyr gan gynnwys diwygiadau yn dilyn sefydlu y Cyngor Dysgu a Sgiliau a Chyngor Cenedlaethol Cymru dros Addysg a Hyfforddiant.

Mae rheoliad 15 yn uwchraddio'r symiau a'r premiymau cymwysadwy yn Atodlen 1 i Reoliadau 1996 ac mae'n ychwanegu premiwm sy'n daladwy i bersonau penodol sydd wedi peidio â bod â hawl i gael lwfans profedigaeth.

Mae rheoliad 16 yn ychwanegu eitemau at y rhestr o symiau sydd i gael eu hanwybyddu wrth benderfynu incwm heblaw enillion, sef taliadau sy'n ymwneud â thaliadau tai disgresiynol, £15 o unrhyw lwfans rhiant gweddw neu mam weddw. Gwneir diwygiadau hefyd i ddarpariaethau presennol yn dilyn newidiadau amrywiol i gynlluniau'r fargen newydd a sefydlu ymddiriedolaethau Gwasanaeth Iechyd Gwladol.

Mae rheoliad 17 hefyd yn ychwanegu eitemau at y rhestr o symiau sydd i gael eu hanwybyddu fel cyfalaf, sef taliadau sy'n ymwneud â thaliadau tai disgresiynol, grant hyfforddi sy'n daladwy o dan Gynllun Credyd Cyflogaeth Dros 50 y Fargen Newydd a thaliadau i dalu iawn i bersonau a ddioddefodd golled yn ystod yr Ail Ryfel Byd. Gwneir diwygiadau hefyd i ddarpariaeth bresennol yn dilyn newidiadau i gynlluniau'r Fargen Newydd.