Rheoliadau Asesu Effeithiau Amgylcheddol (Tir heb ei Drin ac Ardaloedd Lled-naturiol) (Cymru) 2002

Nodyn Esboniadol

(Nid yw'r nodyn hwn yn rhan o'r Rheoliadau)

Mae'r Rheoliadau hyn yn gweithredu, mewn perthynas â phrosiectau i ddefnyddio tir heb ei drin ac ardaloedd lled-naturiol yng Nghymru at ddibenion amaethyddol dwys, Gyfarwyddeb y Cyngor 85/337/EEC (fel y'i diwygiwyd gan Gyfarwyddeb y Cyngor 97/11/EEC) ar asesu effeithiau rhai prosiectau cyhoeddus a phreifat penodol ar yr amgylchedd a Chyfarwyddeb y Cyngor 1992/43/EEC (fel y'i diwygiwyd ddiwethaf gan Gyfarwyddeb y Cyngor 97/62/EC) ar gadwraeth cynefinoedd naturiol ac o ffawna a fflora gwyllt (“y Gyfarwyddeb Cynefinoedd”) i'r graddau y mae'n gymwys i brosiectau o'r fath.

Mae'r diffiniad o “prosiect” yn nodi'r gweithgareddau hynny sy'n ddarostyngedig i ofynion y Rheoliadau. Mae Rheoliad 4 yn atal unrhyw brosiectau rhag cael eu cynnal heb sicrhau penderfyniad sgrinio yn gyntaf. Mae'r penderfyniad sgrinio yn pennu a yw'r prosiect yn un sy'n debygol o effeithio'n sylweddol ar yr amgylchedd ( a fydd yn cynnwys prosiect sy'n debyg o effeithio'n sylweddol ar safle Ewropeaidd o fewn ystyr Rheoliadau Cadwraeth (Cynefinoedd Naturiol, ac yn y blaen) 1994 (fel y'u diwygiwyd) (“y Rheoliadau Cynefinoedd”). Mae prosiect sydd wedi'i bennu felly yn cael ei ddiffinio fel“prosiect perthnasol” yn y Rheoliadau. Rhaid cyrraedd y penderfyniad sgrinio yn unol â'r meini prawf dethol a nodir yn Atodlen 1 i'r Rheoliadau. Nodir y gofynion gweithdrefnol mewn perthynas â phenderfyniadau sgrinio yn rheoliad 5.

Mae Rheoliad 6 yn gwahardd cyflawni prosiect perthnasol heb fod caniatâd y Cynulliad Cenedlaethol wedi'i sicrhau yn gyntaf.

Mae Rheoliad 7 yn rhoi hawl i un sy'n bwriadu gwneud cais am ganiatâd dderbyn barn gan y Cynulliad Cenedlaethol ynghylch yr wybodaeth y bydd ei hangen fel rhan o'r datganiad amgylcheddol i gyd-fynd â'r cais am ganiatâd.

Mae Rheoliad 8 yn ei gwneud hi'n ofynnol i'r cyrff amgylcheddol y cyfeirir atynt ddarparu unrhyw wybodaeth berthnasol sydd yn eu meddiant i'r sawl sy'n gwneud cais am ganiatâd.

Mae Rheoliadau 9 a 10 yn cynnwys y gofynion gweithdrefnol ar gyfer y cais am ganiatâd. Mae angen i'r cais gynnwys y datganiad amgylcheddol a ddiffinir fel datganiad sy'n cynnwys yr wybodaeth yn Rhan II o Atodlen 2 i'r Rheoliadau ac unrhyw ran o o'r wybodaeth yn Rhan I o Atodlen 2 y mae angen rhesymol amdani er mwyn asesu effeithiau amgylcheddol y prosiect.

Mae Rheoliad 11 yn cynnwys darpariaethau ar gyfer hysbysu Gwladwriaethau eraill sy'n bartïon i'r Cytundeb ar yr Ardal Economaidd Ewropeaidd (AEE) am brosiectau sy'n debygol o gael effeithiau amgylcheddol ar y Gwladwriaethau hynny ac ar gyfer rhoi cyfle iddynt gyflwyno sylwadau mewn perthynas â phrosiectau o'r fath. Mae'n cynnwys darpariaethau hefyd ar gyfer ystyried effeithiau prosiectau mewn Gwladwriaethau eraill yr AEE y rhoddir gwybod amdanynt i'r Cynulliad Cenedlaethol fel rhai sy'n debyg o gael effeithiau amgylcheddol ar Gymru.

Mae Rheoliad 12 yn nodi sut y caiff penderfyniadau o dan y Rheoliadau eu gwneud mewn perthynas â phrosiectau a leolir yn rhannol yng Nghymru ac yn rhannol yn Lloegr.

Mae Rheoliad 13 yn pennu sut y dylai'r Cynulliad Cenedlaethol benderfynu a ddylid rhoi caniatâd ar gyfer prosiect. Mae'n ofynnol bod y Cynulliad Cenedlaethol yn cymryd i ystyriaeth yr holl wybodaeth a'r sylwadau sy'n cael eu darparu yn unol â'r Rheoliadau.

O dan reoliad 13(3) ni chaiff y Cynulliad Cenedlaethol roi caniatâd ar gyfer prosiect a fyddai'n cynnwys gweithgareddau sy'n cael eu gwahardd o dan y darpariaethau hynny yn y Rheoliadau Cynefinoedd sy'n gweithredu Erthyglau 12, 13, 15 ac 16 (gofynion ar gyfer amddiffyn rhywogaethau) o'r Gyfarwyddeb Cynefinoedd.

Mae paragraffau (4) i (9) o'r rheoliad hwn yn gweithredu'r gofynion sydd i'w bodloni cyn y gellir rhoi caniatâd ar gyfer prosiect sy'n debygol o gael effaith sylweddol ar safle Ewropeaidd. Er bod angen cymryd yr un wybodaeth a sylwadau i ystyriaeth, i'r graddau y maent yn berthnasol, fel gydag unrhyw brosiect arall, mae yna brofion penodol i'w sefyll. Mae'r profion penodol hyn yn gweithredu Erthygl 6(3) o'r Gyfarwyddeb Cynefinoedd. Mae'r darpariaethau yn y Rheoliadau hyn yn debyg i'r rhai yn y Rheoliadau Cynefinoedd sy'n gymwys i weithdrefnau eraill ar gyfer rhoi caniatâd.

Mae Rheoliad 13(11) yn pennu amodau gorfodol y mae'n ofynnol i'r caniatadau fod yn ddarostyngedig iddynt i sicrhau bod caniatadau yn cael eu gweithredu a bod angen caniatâd pellach ar gyfer gwaith sy'n sylweddol wahanol i'r hyn sydd wedi cael ei ganiatáu.

Mae Rheoliad 13(12) yn cynnwys gofynion gweithdrefnol y dylid cydymffurfio â hwy wrth roi neu wrthod caniatâd.

Mae Rheoliad 13(13) yn atgynhyrchu'r darpariaethau yn Neddf Bywyd Gwyllt a Chefn Gwlad 1981 sy'n gymwys os yw awdurdod cymwys yn bwriadu rhoi caniatâd am unrhyw brosiect sy'n cynnwys gweithrediad sy'n debyg o niweidio safle o ddiddordeb gwyddonol arbennig yn erbyn cyngor gan Gyngor Cefn Gwlad Cymru.

Mae Rheoliad 14 ac Atodlen 3 yn gweithredu erthygl 6(2) o'r Gyfarwyddeb Cynefinoedd drwy sicrhau bod unrhyw benderfyniadau a gymerir yn unol â'r Rheoliadau cyn i safle Ewropeaidd gael ei ddynodi a fyddai'n caniatáu cyflawni iproject a fyddai'n effeithio'n andwyol ar integriti'r safle yn cael eu hadolygu a'u diddymu neu eu haddasu yn ôl yr angen.

Gall y sawl sy'n gwneud cais am benderfyniad sgrinio neu am ganiatâd ar gyfer prosiect perthnasol (neu berson sydd â diddordeb mewn prosiect yn ddarostyngedig i ddiddymiad neu addasiad o dan y darpariaethau adolygu a gynhwysir yn Atodlen 3) apelio yn erbyn penderfyniad croes i'r Cynulliad Cenedlaethol. Mae hawl gan yr apelydd gael ei glywed gan berson a benodwyd gan y Cynulliad Cenedlaethol a gall y gwrandawiad at y diben hwnnw fod ar ffurf ymchwiliad lleol os bydd y Cynulliad Cenedlaethol yn penderfynu hynny. Mae'r darpariaethau apelio cyffredinol wedi'u cynnwys yn rheoliad 15 ac Atodlen 4 ac mae'r gweithdrefnau ar gyfer penderfynu ar sylwadau ysgrifenedig a thrwy wrandawiad neu ymchwiliad lleol wedi'u cynnwys yn rheoliadau 16 ac 17 yn y drefn honNo.

Gall personau a dramgwyddir gan benderfyniadau sy'n caniatáu i brosiectau fynd rhagddynt apelio i'r Uchel Lys i gael y penderfyniadau hynny wedi'u hadolygu (rheoliad 18).

Bydd personau sy'n cynnal prosiectau cyn derbyn yn gyntaf naill ai benderfyniad sgrinio negyddol neu ganiatâd ar gyfer y prosiect, neu sy'n gweithredu yn groes i'r amodau a roddwyd ar gyfer y caniatâd, yn cyflawni tramgwydd o dan y Rheoliadau. Mae hefyd yn dramgwydd o dan y Rheoliadau i wneud datganiadau anwir neu gamarweiniol er mwyn cael penderfyniad penodol.

Os bydd y Cynulliad Cenedlaethol am sicrhau bod gweithgareddau anawdurdodedig yn dod i ben ar unwaith, gall gyflwyno hysbysiad stop ar y person sy'n gweud y gweithgareddau neu unrhyw berson sydd â buddiant yn y tir lle mae'r gweithgareddau yn cael eu gwneud. Bydd methiant i gydymffurfio â'r hysbysiad stop yn dramgwydd (rheoliad 23).

Mae Rheoliad 24 yn cynnwys pŵer sy'n galluogi'r Cynulliad Cenedlaethol i gyflwyno hysbysiad sy'n ei gwneud hi'n ofynnol i berson y mae'n credu iddo fod yn gyfrifol am gyflanwi tramgwydd, i adfer y tir i'w gyflwr blaenorol. Gellir apelio yn erbyn hysbysiad adfer i'r Llys Ynadon. Bydd methiant i gydymffurfio â gofynion hysbysiad adfer yn dramgwydd.

Mae Rheoliad 25 yn cynnwys pwerau i gael mynediad mewn perthynas â chyflawni swyddogaethau'r Cynulliad Cenedlaethol o dan y Rheoliadau ac mae'n cynnwys y pwerau i archwilio ac i gymryd copïau o gofnodion. Darperir pwerau hefyd i gael mynediad i dir er mwyn cynnal gwaith adfer yn dilyn methiant i gydymffurfio â hysbysiad adfer.

Mae Arfarniad Rheoliadol wedi'i baratoi ynghylch y Rheoliadau hyn, ac mae ar gael oddi wrth Gynulliad Cenedlaethol Cymru, Yr Adran Amaethyddiaeth a Materion Gwledig, Parc Cathays, Caerdydd, CF10 3NQ.