Deddf Iechyd a Gofal Cymdeithasol (Cymru) 2025

Rhagolygol

11 Dyletswydd i lunio a chyhoeddi cynllun digonolrwydd blynyddol LL+C

Yn Neddf 2014, ar ôl adran 75 mewnosoder—

“75A Dyletswydd i sicrhau llety: llunio a chyhoeddi cynllun digonolrwydd blynyddol

(1) Cyn dechrau pob blwyddyn ariannol rhaid i awdurdod lleol lunio a chyhoeddi cynllun (“cynllun digonolrwydd blynyddol”) sy’n nodi’r camau y bydd yn eu cymryd yn y flwyddyn honno yn unol â’i ddyletswydd o dan adran 75(1).

(2) Rhaid i gynllun digonolrwydd blynyddol—

(a) bod ar ffurf a ragnodir drwy reoliadau, a

(b) cael ei gymeradwyo gan Weinidogion Cymru cyn ei gyhoeddi (gweler adrannau 75B a 75C).

(3) Rhaid i gynllun digonolrwydd blynyddol gynnwys, mewn perthynas â’r flwyddyn ariannol y mae’n ymwneud â hi—

(a) nifer y plant y mae’r awdurdod yn amcangyfrif—

(i) y bydd yn gofalu amdanynt, a

(ii) y bydd yn annhebygol o allu gwneud trefniadau mewn cysylltiad â hwy o dan adran 81(2);

(b) asesiad ynghylch faint o lety a ddarperir gan rieni maeth awdurdod lleol a chartrefi plant fydd ar gael i’r awdurdod lleol at ddiben lleoli plant a ddisgrifir ym mharagraff (a) yn unol ag adran 81A(2);

(c) asesiad ynghylch i ba raddau y mae’r llety hwnnw yn bodloni gofynion paragraffau (a) i (b) o adran 75(1);

(d) mewn perthynas â cheisiadau y mae’r awdurdod lleol yn rhagweld y bydd yn eu gwneud i gymeradwyo lleoliadau atodol yn unol ag adran 81B—

(i) amcangyfrif o nifer y ceisiadau a ddisgwylir,

(ii) y rhesymau pam y mae’r nifer hwnnw o geisiadau yn debygol o gael ei wneud,

(iii) gwybodaeth i’w rhagnodi mewn rheoliadau ynghylch darparwyr er elw sy’n darparu llety yng Nghymru ac sy’n debygol o gael eu henwi yn y ceisiadau hynny, a

(iv) gwybodaeth i’w rhagnodi mewn rheoliadau ynghylch darparwyr preifat sy’n darparu llety yn Lloegr ac sy’n debygol o gael eu henwi yn y ceisiadau hynny;

(e) gwybodaeth ynghylch sut y bwriedir i gamau sydd i’w cymryd gan yr awdurdod lleol sicrhau bod gan yr awdurdod ddigon o lety sy’n bodloni gofynion paragraffau (a) i (b) o adran 75(1);

(f) unrhyw wybodaeth arall a ragnodir drwy reoliadau.

(4) At ddibenion is-adran (3)(d)(iii) ac adran 81B, ystyr “darparwr er elw” yw—

(a) mewn perthynas â llety a ddarperir gan rieni maeth awdurdod lleol, darparwr gwasanaeth nad yw’n dod o fewn y disgrifiadau a roddir yn adran 81A(4)(a);

(b) mewn perthynas â llety a ddarperir gan gartref plant, darparwr gwasanaeth nad yw’n dod o fewn y disgrifiadau a roddir yn adran 81A(4)(b).

(5) At ddibenion is-adran (3)(d)(iv) ac adran 81B, ystyr “darparwyr preifat” yw—

(a) mewn perthynas â llety a ddarperir gan rieni maeth awdurdod lleol, person yn Lloegr sydd wedi ei gofrestru mewn cysylltiad ag asiantaeth faethu o dan Ran 2 o Ddeddf Safonau Gofal 2000;

(b) mewn perthynas â llety a ddarperir gan gartref plant, person, ac eithrio awdurdod lleol, sydd wedi ei gofrestru mewn cysylltiad â’r cartref plant o dan Ran 2 o Ddeddf Safonau Gofal 2000.

(6) Yn yr adran hon ac yn adran 81A, mae i “darparwr gwasanaeth” yr ystyr a roddir gan adran 3(1)(c) o Ddeddf Rheoleiddio ac Arolygu Gofal Cymdeithasol (Cymru) 2016.

75B Dyletswydd i sicrhau llety: y weithdrefn ar gyfer cymeradwyo cynllun digonolrwydd

(1) Cyn cyhoeddi ei gynllun digonolrwydd blynyddol, rhaid i awdurdod lleol—

(a) llunio drafft o’r cynllun, a

(b) cyflwyno’r drafft i Weinidogion Cymru i’w gymeradwyo ganddynt.

(2) Rhaid cyflwyno’r cynllun drafft cyntaf i Weinidogion Cymru heb fod yn hwyrach na 4 mis cyn dechrau’r flwyddyn ariannol y mae’n ymwneud â hi.

(3) Rhaid cyflwyno cynlluniau drafft dilynol i Weinidogion Cymru heb fod yn hwyrach na 2 fis cyn dechrau’r flwyddyn ariannol y mae’n ymwneud â hi.

(4) Pan fo Gweinidogion Cymru yn cymeradwyo drafft o gynllun digonolrwydd blynyddol, rhaid iddynt hysbysu’r awdurdod lleol am eu penderfyniad.

75C Dyletswydd i sicrhau llety: y weithdrefn os nad yw’r cynllun drafft yn cael ei gymeradwyo gan Weinidogion Cymru

(1) Mae’r adran hon yn gymwys os yw Gweinidogion Cymru yn penderfynu peidio â chymeradwyo drafft o gynllun digonolrwydd blynyddol a gyflwynir iddynt gan awdurdod lleol o dan adran 75B.

(2) Rhaid i Weinidogion Cymru hysbysu’r awdurdod lleol gan nodi—

(a) y rhesymau dros y penderfyniad;

(b) y cyfnod y mae rhaid i’r awdurdod lleol, cyn diwedd y cyfnod hwnnw, gyflwyno drafft pellach o’r cynllun i Weinidogion Cymru.

(3) Rhaid i’r awdurdod lleol gyflwyno drafft pellach o’r cynllun ynghyd ag adroddiad sy’n esbonio sut, wrth lunio’r drafft, y mae’r awdurdod lleol wedi ystyried y rhesymau a nodir yn yr hysbysiad a roddir o dan is-adran (2).

(4) Mae adran 75B(4) yn gymwys pan fo Gweinidogion Cymru yn cymeradwyo drafft pellach a gyflwynir iddynt o dan yr adran hon fel y mae’n gymwys pan fo Gweinidogion Cymru yn cymeradwyo drafft a gyflwynir iddynt o dan adran 75B.

(5) Mae is-adrannau (2) a (3) yn gymwys pan fo Gweinidogion Cymru yn penderfynu peidio â chymeradwyo drafft pellach a gyflwynir iddynt o dan yr adran hon fel y maent yn gymwys pan fo Gweinidogion Cymru yn penderfynu peidio â chymeradwyo drafft a gyflwynir iddynt o dan adran 75B.”

Gwybodaeth Cychwyn

I1 A. 11 ddim mewn grym ar y Cydsyniad Brenhinol, gweler a. 29(2)