Rheoliadau Awdurdodau Lleol (Addasu Cyfrifiadau Angenrheidiol) (Cymru) 2013

Nodyn Esboniadol

(Nid yw'r nodyn hwn yn rhan o'r Rheoliadau)

Mae'r Rheoliadau hyn wedi eu gwneud o dan adran 32(9) (cyfrifo anghenion cyllideb gan awdurdodau yng Nghymru), adran 33(4) (cyfrifo swm sylfaenol treth gan awdurdodau yng Nghymru), adran 43(7) (cyfrifo anghenion cyllideb gan awdurdodau yng Nghymru) ac adran 44(4) (cyfrifo swm sylfaenol treth gan awdurdodau yng Nghymru) o Ddeddf Cyllid Llywodraeth Leol 1992 (“Deddf 1992”). Mae'r adrannau hyn yn nodi sut mae awdurdod bilio a phrif awdurdod praeseptio yng Nghymru i gyfrifo'u hanghenion cyllideb ar gyfer blwyddyn ariannol a sut mae awdurdod bilio a phrif awdurdod praeseptio yng Nghymru i gyfrifo swm sylfaenol eu treth gyngor.

Mae'r diwygiadau'n effeithiol ar gyfer y blynyddoedd ariannol sy'n dechrau ar neu ar ôl 1 Ebrill 2013.

Mae rheoliad 2 o'r Rheoliadau hyn yn diwygio adran 32(2)(a) o Ddeddf 1992 i hepgor gwariant sydd i'w godi ar Gyfrif Refeniw ardal gwella busnes (“AGB”) o'r gwariant y mae'n rhaid i awdurdod bilio ei agregu o dan adran 32(2). Mae rheoliad 2 hefyd yn diwygio adran 32(3) i hepgor ardoll AGB neu gyfraniadau ariannol a wneir gan berson o dan adran 43 o Ddeddf Llywodraeth Leol 2003 a symiau sy'n daladwy gan Weinidogion Cymru o dan adran 31 o Ddeddf Llywodraeth Leol 2003 mewn perthynas â chynllun gostyngiadau'r dreth gyngor awdurdod o'r incwm y mae'n rhaid i'r awdurdod ei agregu o dan adran 32(3).

Mae rheoliad 2 yn diwygio adran 32(2) ymhellach fel ei bod yn bendant yn ofynnol i awdurdod gymryd i ystyriaeth unrhyw wariant y mae'n disgwyl ei ysgwyddo yn y flwyddyn wrth ad-dalu grantiau neu ardrethi annomestig wedi eu hailddosbarthu (“AAH”). Mae rheoliad 2 hefyd yn diwygio adran 32(3) fel ei bod yn bendant yn ofynnol i awdurdod gymryd i ystyriaeth daliadau AAH a grantiau y mae'n disgwyl eu cael am flwyddyn ariannol gynharach.

Mae rheoliadau 2 a 3 yn disodli cyfeiriadau at “relevant special grant” â chyfeiriadau at “special grant” yn adran 32(3)(a) ac yn y diffiniad o P yn adran 33(1). Mae rheoliad 3 hefyd yn mewnosod yn y diffiniad o P yn adran 33(1) gyfeiriad at symiau sy'n daladwy gan Weinidogion Cymru mewn perthynas â chynllun gostyngiadau'r dreth gyngor awdurdod.

Mae rheoliad 2(6) yn amnewid adran 32(12) sy'n esbonio ystyron symiau sy'n daladwy mewn perthynas ag AAH a grant cynnal refeniw (“GCR”) yn adrannau 32 a 33. Diben hyn yw sicrhau bod symiau o AAH a GCR sydd wedi eu hepgor o gyfrifiadau anghenion cyllideb yn yr adrannau hynny yn ymwneud â'r symiau hynny sy'n daladwy o dan y priod Adroddiadau Llywodraeth Leol am flwyddyn benodol yn unig. Mae'r is-adran (12) a amnewidiwyd hefyd yn esbonio ystyron ardoll AGB a Chyfrif Refeniw AGB yn adran 32 ac ystyron grant ychwanegol, grant arbennig a symiau sy'n daladwy mewn perthynas â chynllun gostyngiadau'r dreth gyngor awdurdod yn adrannau 32 a 33.

Mae rheoliad 4(2) yn diwygio adran 43(2) fel ei bod yn bendant yn ofynnol i brif awdurdod praeseptio gymryd i ystyriaeth unrhyw wariant y mae'n disgwyl ei ysgwyddo yn y flwyddyn wrth ad-dalu grantiau neu AAH. Yn yr un modd, mae rheoliad 4(4) yn diwygio adran 43(3) fel ei bod yn bendant yn ofynnol i awdurdod gymryd i ystyriaeth daliadau AAH a grantiau y mae'n disgwyl eu cael am flwyddyn ariannol gynharach.

Mae rheoliadau 4(3) a 5 yn disodli cyfeiriadau at “relevant special grant” â chyfeiriadau at “special grant” yn adran 43(3)(a)(i) ac yn y diffiniad o P yn adran 44(1).

Mae rheoliadau 4(3) a 5 yn diwygio adrannau 43(3)(a)(i) a 44(1) ymhellach fel bod rhaid i brif awdurdodau praeseptio gymryd i ystyriaeth unrhyw arian gwaelodol a gafwyd oddi wrth yr Ysgrifennydd Gwladol am flwyddyn ariannol wrth wneud y cyfrifiad angenrheidiol ar gyfer y flwyddyn honno.

Mae rheoliad 4(5) yn mewnosod is-adran (6C) yn adran 43 i ddarparu diffiniad o “floor funding” at ddibenion adrannau 43 a 44 a hefyd i ddarparu bod y diffiniadau o AAH, GCR, grant ychwanegol, grant arbennig ac arian gwaelodol yn adran 32(12A) hefyd yn gymwys i adrannau 43 a 44 o Ddeddf 1992.