Deddf Cyfraith sy’n Deillio o’r Undeb Ewropeaidd (Cymru) 2018

Pŵer i addasu ffioedd neu daliadau cyn ymadael

2 (1) Mae is-baragraff (3) yn gymwys pan fo is-ddeddfwriaeth yn cynnwys darpariaeth (“y ddarpariaeth codi tâl”) ar gyfer codi ffioedd neu daliadau eraill neu mewn cysylltiad â chodi ffioedd neu daliadau eraill—

(a) sydd wedi ei gwneud mewn rheoliadau o dan adran 4 neu sy’n cael ei thrin fel pe bai wedi ei gwneud o dan adran 5, a

(b) a oedd, yn union cyn y diwrnod ymadael, wedi ei gwneud o dan adran 2(2) o Ddeddf y Cymunedau Ewropeaidd 1972 neu adran 56 o Ddeddf Cyllid 1973.

(2) Mae is-baragraff (3) hefyd yn gymwys pan fo is-ddeddfwriaeth yn cynnwys darpariaeth a addesir o dan y paragraff hwn.

(3) Caiff Gweinidogion Cymru wneud darpariaeth drwy reoliadau sy’n addasu’r is-ddeddfwriaeth at ddibenion—

(a) dirymu’r ddarpariaeth codi tâl,

(b) newid swm unrhyw un neu ragor o’r ffioedd neu’r taliadau sydd i’w codi,

(c) newid sut y mae unrhyw un neu ragor o’r ffioedd neu’r taliadau i’w penderfynu, neu

(d) newid fel arall y ffioedd neu’r taliadau y caniateir iddynt gael eu codi mewn perthynas ag unrhyw beth y caniateir i ffioedd neu daliadau gael eu codi mewn cysylltiad ag ef o dan y ddarpariaeth codi tâl.

(4) Caniateir i reoliadau o dan y paragraff hwn gael eu gwneud cyn y diwrnod ymadael os bydd y ddarpariaeth codi tâl yn dod o fewn is-baragraff (1) ar y diwrnod ymadael.