Deddf Cyfraith sy’n Deillio o’r Undeb Ewropeaidd (Cymru) 2018

Pwerau pellach Gweinidogion Cymru mewn cysylltiad ag ymadael â’r UE

9 Cydymffurfio â rhwymedigaethau rhyngwladol

(1) Caiff Gweinidogion Cymru drwy reoliadau wneud darpariaeth o fewn cymhwysedd datganoledig y maent yn ystyried ei bod yn briodol er mwyn atal neu unioni unrhyw achos, sy’n codi o ymadawiad y Deyrnas Unedig â’r UE, o dorri rhwymedigaethau rhyngwladol y Deyrnas Unedig.

(2) Caiff rheoliadau o dan yr adran hon addasu deddfiad.

(3) Ond ni chaiff rheoliadau o dan yr adran hon—

(a) gwneud darpariaeth ôl-weithredol;

(b) creu trosedd berthnasol;

(c) rhoi swyddogaeth i un o Weinidogion y Goron na gosod swyddogaeth arno;

(d) dileu nac addasu swyddogaeth cyn cychwyn un o Weinidogion y Goron oni bai bod gwneud hynny yn gysylltiedig â darpariaeth arall sydd wedi ei chynnwys yn y rheoliadau neu’n ganlyniadol iddi;

(e) cael eu gwneud i weithredu’r cytundeb ymadael o ran Cymru.

(4) Ni chaniateir i reoliadau gael eu gwneud o dan yr adran hon ar ôl diwedd y cyfnod o ddwy flynedd sy’n dechrau â’r diwrnod ymadael.

10 Gweithredu’r cytundeb ymadael

(1) Caiff Gweinidogion Cymru drwy reoliadau wneud darpariaeth o fewn cymhwysedd datganoledig y maent yn ystyried ei bod yn briodol at ddibenion gweithredu’r cytundeb ymadael os ydynt yn ystyried y dylai darpariaeth o’r fath fod mewn grym ar neu cyn y diwrnod ymadael, yn ddarostyngedig i ddeddfu statud yn flaenorol gan Senedd y Deyrnas Unedig sy’n cymeradwyo telerau terfynol ymadawiad y Deyrnas Unedig â’r Undeb Ewropeaidd.

(2) Caiff rheoliadau o dan yr adran hon addasu deddfiad (gan gynnwys deddfiad sydd wedi ei gynnwys yn y Ddeddf hon).

(3) Ond ni chaiff rheoliadau o dan yr adran hon—

(a) gosod na chynyddu trethiant;

(b) gwneud darpariaeth ôl-weithredol;

(c) creu trosedd berthnasol;

(d) rhoi swyddogaeth i un o Weinidogion y Goron na gosod swyddogaeth arno;

(e) dileu nac addasu swyddogaeth cyn cychwyn un o Weinidogion y Goron oni bai bod gwneud hynny yn gysylltiedig â darpariaeth arall sydd wedi ei chynnwys yn y rheoliadau neu’n ganlyniadol iddi.

(4) Ni chaniateir i reoliadau gael eu gwneud o dan yr adran hon ar ôl y diwrnod ymadael.

11 Pŵer i wneud darpariaeth sy’n cyfateb i gyfraith yr UE ar ôl y diwrnod ymadael

(1) Caiff Gweinidogion Cymru drwy reoliadau wneud darpariaeth o fewn cymhwysedd datganoledig—

(a) sy’n cyfateb i ddarpariaeth mewn rheoliad gan yr UE neu benderfyniad gan yr UE,

(b) ar gyfer gorfodi darpariaeth a wneir o dan baragraff (a) neu er mwyn ei gwneud yn effeithiol fel arall, neu

(c) er mwyn gweithredu cyfarwyddeb gan yr UE o ran Cymru,

i’r graddau y mae’r rheoliad gan yr UE, y penderfyniad gan yr UE neu’r gyfarwyddeb gan yr UE yn cael effaith yng nghyfraith yr UE ar ôl y diwrnod ymadael.

(2) Caiff rheoliadau o dan yr adran hon addasu deddfiad.

(3) Wrth wneud darpariaeth o dan is-adran (1), mae gan Weinidogion Cymru y pwerau (ymhlith eraill) a grybwyllir yn adran 3(4); ac at y diben hwn, mae’r cyfeiriad at “cyfraith uniongyrchol yr UE” yn adran 3(4) i’w ddarllen fel pe bai’n cynnwys darpariaeth mewn cyfarwyddeb gan yr UE.

(4) Ond ni chaiff rheoliadau o dan yr adran hon—

(a) gosod na chynyddu trethiant;

(b) gwneud darpariaeth ôl-weithredol;

(c) creu trosedd berthnasol.

(5) Cyn gwneud rheoliadau o dan yr adran hon, rhaid i Weinidogion Cymru ymgynghori ag unrhyw bersonau y maent yn ystyried eu bod yn briodol.

(6) At ddiben yr adran hon, ystyr “Cytuniadau’r UE” yn y diffiniad o “cyfraith yr UE” a roddir gan adran 20(1) yw—

(a) Cytuniadau’r UE o fewn yr ystyr a roddir i “EU Treaties” gan adran 1(2) o Ddeddf y Cymunedau Ewropeaidd 1972 (p. 68) fel yr oedd y Ddeddf honno yn cael effaith yn union cyn ei diddymu gan adran 1 o Ddeddf yr Undeb Ewropeaidd (Ymadael) 2018, fel yr oedd yn union cyn y diwrnod ymadael;

(b) unrhyw gytuniad y mae’r Undeb Ewropeaidd yn ymrwymo iddo (ac eithrio i’r graddau y mae’n ymwneud â’r Polisi Tramor a Diogelwch Cyffredin), gyda neu heb unrhyw un neu ragor o’r Aelod-wladwriaethau, ac a bennir mewn rheoliadau a wneir gan Weinidogion Cymru, ac

(c) unrhyw gytuniad y mae Aelod-wladwriaethau yn ymrwymo iddo sy’n ategol i gytuniad a grybwyllir ym mharagraff (a) neu (b) ac a bennir mewn rheoliadau a wneir gan Weinidogion Cymru.

12 Adolygu’r pŵer yn adran 11(1) a machlud y pŵer

(1) Ni chaniateir i reoliadau gael eu gwneud o dan adran 11(1) ar ôl diwedd cyfnod o 5 mlynedd sy’n dechrau â’r diwrnod ymadael.

(2) Ond caiff Gweinidogion Cymru drwy reoliadau estyn y cyfnod a grybwyllir yn is-adran (1).

(3) O ran rheoliadau o dan is-adran (2)—

(a) cânt estyn y cyfnod ar fwy nag un achlysur;

(b) rhaid iddynt ddod i rym cyn diwedd y cyfnod a grybwyllir yn is-adran (1) neu, os yw’r cyfnod wedi ei estyn drwy reoliadau blaenorol, cyn diwedd y cyfnod estynedig hwnnw;

(c) ni chânt estyn y cyfnod ar unrhyw achlysur am fwy na 5 mlynedd.

(4) Cyn gwneud rheoliadau o dan is-adran (2), rhaid i Weinidogion Cymru osod gerbron Cynulliad Cenedlaethol Cymru adroddiad ar—

(a) gweithrediad ac effaith y pŵer yn adran 11(1) a darpariaeth a wneir oddi tani, a

(b) yr angen parhaus neu fel arall am y pŵer.

(5) Wrth lunio adroddiad, rhaid i Weinidogion Cymru ymgynghori â’r personau y maent yn ystyried eu bod yn briodol.

(6) Nid oes angen i adroddiad ymdrin â chyfnod yr ymdriniwyd ag ef mewn adroddiad blaenorol.

13 Ffioedd a thaliadau

Mae Atodlen 1 (sy’n cynnwys pwerau mewn cysylltiad â ffioedd a thaliadau) yn cael effaith.