Deddf Treth Trafodiadau Tir a Gwrthweithio Osgoi Trethi Datganoledig (Cymru) 2017

(a gyflwynir gan adran 17)

ATODLEN 3 LL+C TRAFODIADAU SY’N ESEMPT RHAG CODI TRETH ARNYNT

Dim cydnabyddiaeth drethadwy LL+C

1 Mae trafodiad tir yn esempt rhag codi treth arno os nad oes unrhyw gydnabyddiaeth drethadwy ar gyfer y trafodiad (ond gweler adran 22 (gwerth marchnadol tybiedig)).

Gwybodaeth Cychwyn

I1 Atod. 3 para. 1 ddim mewn grym ar y Cydsyniad Brenhinol, gweler a. 81(2)

I2 Atod. 3 para. 1 mewn grym ar 1.4.2018 gan O.S. 2018/34, ergl. 3

Caffaeliadau gan y Goron LL+C

2 Mae trafodiad tir yn esempt rhag codi treth arno pan fo’r prynwr oddi tano yn unrhyw un neu ragor o’r canlynol—

(a) Gweinidogion Cymru, Prif Weinidog Cymru, Cwnsler Cyffredinol Llywodraeth Cymru;

(b) un o Weinidogion y Goron;

(c) Gweinidogion yr Alban;

(d) adran yng Ngogledd Iwerddon;

(e) Comisiwn Cynulliad Cenedlaethol Cymru;

(f) Swyddog Corfforaethol Tŷ’r Arglwyddi;

(g) Swyddog Corfforaethol Tŷ’r Cyffredin;

(h) Corff Corfforaethol Senedd yr Alban;

(i) Comisiwn Cynulliad Gogledd Iwerddon.

Gwybodaeth Cychwyn

I3 Atod. 3 para. 2 ddim mewn grym ar y Cydsyniad Brenhinol, gweler a. 81(2)

I4 Atod. 3 para. 2 mewn grym ar 1.4.2018 gan O.S. 2018/34, ergl. 3

Trafodiadau mewn cysylltiad ag ysgariad etc. LL+C

3 Mae trafodiad rhwng un parti i briodas a’r llall (pa un a yw’r briodas yn dal mewn bod ar adeg y trafodiad ai peidio) yn esempt rhag codi treth arno os rhoddir effaith iddo—

(a) yn unol â gorchymyn llys a wneir wrth ganiatáu [F1 gorchymyn neu archddyfarniad ar gyfer diddymiad neu ddirymiad y briodas ] neu ymwahaniad cyfreithiol mewn cysylltiad â’r partïon;

(b) yn unol â gorchymyn llys a wneir mewn cysylltiad â diddymiad neu ddirymiad y briodas, neu ymwahaniad cyfreithiol y partïon, ar unrhyw adeg ar ôl caniatáu [F2 gorchymyn neu ] archddyfarniad o’r fath fel y crybwyllir ym mharagraff (a);

(c) yn unol â—

(i) gorchymyn llys a wneir ar unrhyw adeg o dan adran 22A, 23A neu 24A o Ddeddf Achosion Priodasol 1973 (p. 18), neu

(ii) gorchymyn llys atodol a wneir o dan adran 8(2) o Ddeddf Cyfraith Teulu (Yr Alban) 1985 (p. 37) yn rhinwedd adran 14(1) o’r Ddeddf honno;

(d) ar unrhyw adeg yn unol â chytundeb y partïon a wneir gan ddisgwyl diddymiad neu ddirymiad y briodas, eu hymwahaniad cyfreithiol neu wneud gorchymyn gwahanu mewn cysylltiad â hwy, neu fel arall mewn cysylltiad â hynny.

Diwygiadau Testunol

F1 Geiriau yn Atod. 3 para. 3(a) wedi eu hamnewid (6.4.2022) gan Divorce, Dissolution and Separation Act 2020 (c. 11), a. 8(1)(8), Atod. para. 59(2)(b); O.S. 2022/283, rhl. 2

F2 Geiriau yn Atod. 3 para. 3(b) wedi eu hamnewid (6.4.2022) gan Divorce, Dissolution and Separation Act 2020 (c. 11), a. 8(1)(8), Atod. para. 59(3)(b); O.S. 2022/283, rhl. 2

Gwybodaeth Cychwyn

I5 Atod. 3 para. 3 ddim mewn grym ar y Cydsyniad Brenhinol, gweler a. 81(2)

I6 Atod. 3 para. 3 mewn grym ar 1.4.2018 gan O.S. 2018/34, ergl. 3

Trafodiadau mewn cysylltiad â diddymiad partneriaeth sifil etc. LL+C

4 Mae trafodiad rhwng un parti i bartneriaeth sifil a’r llall (pa un a yw’r bartneriaeth sifil yn dal mewn bod ar adeg y trafodiad ai peidio) yn esempt rhag codi treth arno os rhoddir effaith iddo—

(a) yn unol â gorchymyn llys a wneir wrth ganiatáu gorchymyn neu archddyfarniad mewn cysylltiad â’r partïon ar gyfer diddymiad neu ddirymiad y bartneriaeth sifil neu eu hymwahaniad cyfreithiol;

(b) yn unol â gorchymyn llys a wneir mewn cysylltiad â diddymiad neu ddirymiad y bartneriaeth sifil, neu ymwahaniad cyfreithiol y partïon, ar unrhyw adeg ar ôl caniatáu gorchymyn neu archddyfarniad o’r fath fel y crybwyllir ym mharagraff (a);

(c) yn unol â—

(i) gorchymyn llys a wneir ar unrhyw adeg o dan unrhyw un neu ragor o ddarpariaethau Atodlen 5 i Ddeddf Partneriaeth Sifil 2004 (p. 33) sy’n cyfateb i adran 22A, 23A neu 24A o Ddeddf Achosion Priodasol 1973 (p. 18), neu

(ii) gorchymyn llys atodol a wneir o dan unrhyw un neu ragor o ddarpariaethau Deddf Partneriaeth Sifil 2004 (p. 33) sy’n cyfateb i adran 8(2) o Ddeddf Cyfraith Teulu (Yr Alban) 1985 (p. 37) yn rhinwedd adran 14(1) o’r Ddeddf 1985 honno;

(d) ar unrhyw adeg yn unol â chytundeb y partïon a wneir gan ddisgwyl diddymiad neu ddirymiad y bartneriaeth sifil, eu hymwahaniad cyfreithiol neu wneud gorchymyn gwahanu mewn cysylltiad â hwy, neu fel arall mewn cysylltiad â hynny.

Gwybodaeth Cychwyn

I7 Atod. 3 para. 4 ddim mewn grym ar y Cydsyniad Brenhinol, gweler a. 81(2)

I8 Atod. 3 para. 4 mewn grym ar 1.4.2018 gan O.S. 2018/34, ergl. 3

Cydsyniadau a pherchnogiadau gan gynrychiolwyr personol LL+C

5 (1) Mae caffael eiddo gan berson wrth ddiwallu hawlogaeth y person o dan neu mewn perthynas ag ewyllys person ymadawedig, neu tuag at hynny, neu ar ddiewyllysedd person ymadawedig, yn esempt rhag codi treth arno.

(2) Nid yw is-baragraff (1) yn gymwys os yw’r person sy’n caffael yr eiddo yn rhoi unrhyw gydnabyddiaeth amdano, ac eithrio ysgwyddo dyled sicredig.

(3) Pan na fo is-baragraff (1) yn gymwys oherwydd is-baragraff (2), pennir y gydnabyddiaeth drethadwy ar gyfer y trafodiad yn unol â pharagraff 9(1) o Atodlen 4.

(4) Yn y paragraff hwn—

• ystyr “dyled” (“debt”) yw rhwymedigaeth, pa un ai’n bendant neu’n ddibynnol, i dalu swm o arian naill ai ar unwaith neu ar ddyddiad yn y dyfodol, ac

• ystyr “dyled sicredig” (“secured debt”) yw dyled a sicrheir ar yr eiddo yn union ar ôl marwolaeth y person ymadawedig.

Gwybodaeth Cychwyn

I9 Atod. 3 para. 5 ddim mewn grym ar y Cydsyniad Brenhinol, gweler a. 81(2)

I10 Atod. 3 para. 5 mewn grym ar 1.4.2018 gan O.S. 2018/34, ergl. 3

Amrywio gwarediadau testamentaidd etc. LL+C

6 (1) Pan fydd person yn marw, mae trafodiad sy’n amrywio gwarediad eiddo (pa un a roddir effaith iddo gan ewyllys, o dan y gyfraith mewn perthynas â diewyllysedd neu fel arall) yr oedd yr ymadawedig yn gymwys i’w waredu yn esempt rhag codi treth arno os bodlonir yr amodau a ganlyn.

(2) Yr amodau yw—

(a) bod y trafodiad yn cael ei gyflawni o fewn y cyfnod o ddwy flynedd ar ôl marwolaeth person, a

(b) na roddir unrhyw gydnabyddiaeth ariannol na chyfwerth ariannol ar ei gyfer ac eithrio amrywio gwarediad arall o’r fath.

(3) Pan na fo’r amod yn is-baragraff (2)(b) wedi ei gyflawni, pennir y gydnabyddiaeth drethadwy ar gyfer y trafodiad yn unol â pharagraff 9(3) o Atodlen 4.

(4) Mae’r paragraff hwn yn gymwys pa un a yw gweinyddiad yr ystad wedi ei gwblhau ai peidio neu pa un a yw’r eiddo wedi ei ddosbarthu yn unol â’r gwarediadau gwreiddiol ai peidio.

Gwybodaeth Cychwyn

I11 Atod. 3 para. 6 ddim mewn grym ar y Cydsyniad Brenhinol, gweler a. 81(2)

I12 Atod. 3 para. 6 mewn grym ar 1.4.2018 gan O.S. 2018/34, ergl. 3

Pŵer i ychwanegu, i dynnu ymaith neu i amrywio esemptiadau LL+C

7 Caiff Gweinidogion Cymru drwy reoliadau ddiwygio’r Atodlen hon er mwyn—

(a) darparu i drafodiad tir o unrhyw ddisgrifiad arall fod yn esempt rhag codi treth arno;

(b) darparu nad yw disgrifiad o drafodiad tir yn esempt rhag codi treth arno mwyach;

(c) amrywio disgrifiad o drafodiad tir sy’n esempt rhag codi treth arno.

Gwybodaeth Cychwyn

I13 Atod. 3 para. 7 ddim mewn grym ar y Cydsyniad Brenhinol, gweler a. 81(2)

I14 Atod. 3 para. 7 mewn grym ar 1.4.2018 gan O.S. 2018/34, ergl. 3