Gorchymyn Cynrychiolaeth y Bobl (Amrywio Terfynau Treuliau Etholiad Ymgeiswyr) (Cymru) 2021

Offerynnau Statudol Cymru

2021 No. 1285 (Cy. 324)

Cynrychiolaeth Y Bobl, Cymru

Gorchymyn Cynrychiolaeth y Bobl (Amrywio Terfynau Treuliau Etholiad Ymgeiswyr) (Cymru) 2021

Gwnaed

17 Tachwedd 2021

Yn dod i rym

1 Ionawr 2022

Mae Gweinidogion Cymru, drwy arfer y pŵer a roddir iddynt gan adran 76A(1)(a) o Ddeddf Cynrychiolaeth y Bobl 1983(1), a chan ystyried ei bod yn hwylus o ganlyniad i newidiadau yng ngwerth arian, yn gwneud y Gorchymyn a ganlyn(2):

Enwi a chychwyn

1.   Enw’r Gorchymyn hwn yw Gorchymyn Cynrychiolaeth y Bobl (Amrywio Terfynau Treuliau Etholiad Ymgeiswyr) (Cymru) 2021 a daw i rym ar 1 Ionawr 2022.

Amrywio terfyn treuliau mewn etholiad llywodraeth leol yng Nghymru

2.   Yn adran 76(2)(b) o Ddeddf Cynrychiolaeth y Bobl 1983(3) (uchafswm treuliau ymgeisydd mewn etholiad llywodraeth leol ac eithrio etholiad o dan Ddeddf Awdurdod Llundain Fwyaf 1999(4)), o flaen is-baragraff (ii) mewnosoder—

“(ic) at a local government election in Wales, £806 together with an additional 7p for every entry in the register of electors;”.

Rebecca Evans

Y Gweinidog Cyllid a Llywodraeth Leol, un o Weinidogion Cymru

17 Tachwedd 2021

NODYN ESBONIADOL

(Nid yw’r nodyn hwn yn rhan o’r Gorchymyn)

Mae’r Gorchymyn hwn yn cynyddu uchafswm treuliau etholiad ymgeiswyr mewn etholiadau llywodraeth leol yng Nghymru. Mae’r cynnydd yn adlewyrchu chwyddiant ers i’r uchafswm gael ei amrywio ddiwethaf gan Orchymyn Cynrychiolaeth y Bobl (Amrywio Terfynau Treuliau Etholiad Ymgeiswyr) 2014 (O.S. 2014/1870).

Mae uchafswm treuliau etholiad ymgeiswyr yn cynnwys swm penodedig (a fynegir mewn punnoedd) plws swm (a fynegir mewn ceiniogau) ar gyfer pob cofnod yn y gofrestr etholwyr.

Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Gorchymyn hwn. O ganlyniad, ystyriwyd nad oedd yn angenrheidiol cynnal asesiad effaith rheoleiddiol o’r costau a’r manteision sy’n debygol o ddeillio o gydymffurfio â’r Gorchymyn hwn.

(1)

1983 p. 2 (“Deddf 1983”); mewnosodwyd adran 76A gan adran 14 o Ddeddf Cynrychiolaeth y Bobl 1985 (p. 50) ac fe’i hamnewidiwyd gan adran 133(1) o Ddeddf Pleidiau Gwleidyddol, Etholiadau a Refferenda 2000 (p. 41). Mae diwygiadau eraill nad ydynt yn berthnasol i’r Gorchymyn hwn.

(2)

Trosglwyddwyd pwerau’r Ysgrifennydd Gwladol o dan Ddeddf 1983, o ran Cymru, gan erthygl 45 o Orchymyn Gweinidogion Cymru (Trosglwyddo Swyddogaethau) 2018 (O.S. 2018/644) ac Atodlen 1 iddo.

(3)

Diwygiwyd adran 76(2)(b) gan Atodlen 17 i Ddeddf Llywodraeth Leol 1985 (p. 51), gan Ran 1 o Atodlen 13 i Ddeddf Diwygio Addysg 1988 (p. 40), gan baragraffau 1 ac 20 o Atodlen 3 i Ddeddf Awdurdod Llundain Fwyaf 1999 (p. 29), gan baragraffau 1 a 18 o Atodlen 1 i Ddeddf Cynrychiolaeth y Bobl 2000 (p. 2), gan O.S. 2005/269, O.S. 2014/1870 ac O.S. 2020/1634.

(4)

1999 p. 29.