Rheoliadau Diogelu Iechyd (Coronafeirws, Teithio Rhyngwladol a Hysbysu) (Cymru) (Diwygiadau Amrywiol) 2021

NODYN ESBONIADOL

(Nid yw’r nodyn hwn yn rhan o’r Rheoliadau)

Mae’r Rheoliadau hyn yn diwygio Rheoliadau Diogelu Iechyd (Coronafeirws, Teithio Rhyngwladol) (Cymru) 2020 (O.S. 2020/574 (Cy. 132)) (y “Rheoliadau Teithio Rhyngwladol”) a Rheoliadau Diogelu Iechyd (Hysbysu) (Cymru) 2010 (O.S. 2010/1546 (Cy. 144)) (“y Rheoliadau Hysbysu”).

Mae Rhan 2 o’r Rheoliadau hyn yn diwygio’r Rheoliadau Teithio Rhyngwladol. Mae’r Rheoliadau Teithio Rhyngwladol yn gosod gofynion ar bersonau sy’n dod i Gymru ar ôl bod dramor.

Ar hyn o bryd mae’r Rheoliadau Teithio Rhyngwladol yn darparu bod rhaid i brofion diwrnod 2 a diwrnod 8 am y coronafeirws gael eu cynnal gan ddarparwyr cyhoeddus, h.y. gan y GIG yng Nghymru, Lloegr, yr Alban a Gogledd Iwerddon. Mae rheoliadau 3 i 7 o’r Rheoliadau hyn yn agor y profion hynny i ddarparwyr profion sector preifat, ar yr amod eu bod yn cydymffurfio â gofynion penodedig, gan gynnwys bod wedi eu hachredu’n briodol, bod â systemau penodedig ar waith a gwneud datganiad i gadarnhau eu bod yn cydymffurfio. Gosodir gofynion o ran hysbysu hefyd ar ddarparwyr profion preifat sy’n darparu profion diwrnod 2 a diwrnod 8.

Mae’r Rheoliadau Teithio Rhyngwladol yn cynnwys gofyniad i bersonau sy’n cyrraedd Cymru ynysu am gyfnod a bennir yn unol â’r Rheoliadau hynny.

Mae personau nad ydynt yn esempt wedi eu gwahardd rhag dod i Gymru pan fônt wedi bod mewn gwlad neu diriogaeth a restrir yn Atodlen 3A i’r Rheoliadau Teithio Rhyngwladol o fewn 10 niwrnod i gyrraedd, yn unol â rheoliad 12E o’r Rheoliadau Teithio Rhyngwladol.

Mae rheoliad 8 o’r Rheoliadau hyn yn diwygio Atodlen 3A er mwyn hepgor yr Aifft, Bangladesh, Kenya, Maldives, Oman, Pakistan, Sri Lanka a Thwrci o’r rhestr o wledydd neu diriogaethau y mae rheoliad 12E yn gymwys iddi.

Mae Rhan 3 o’r Rheoliadau hyn yn diwygio’r Rheoliadau Hysbysu sy’n gosod rhwymedigaethau ar wahanol bersonau at ddiben atal mynychder neu ledaeniad haint neu halogiad, diogelu rhagddo, ei reoli neu ddarparu ymateb iechyd y cyhoedd iddo. Mae’r Rheoliadau hyn yn ei gwneud yn ofynnol i labordai diagnostig sy’n prosesu profion, a phersonau sy’n cynnal profion yn y man lle y rhoddir gofal, ar gyfer canfod coronafeirws syndrom anadlol acíwt difrifol 2 (SARS-CoV-2) neu firws y ffliw, hysbysu Ymddiriedolaeth Gwasanaeth Iechyd Gwladol Iechyd Cyhoeddus Cymru (“Iechyd Cyhoeddus Cymru”) am ganlyniadau’r profion hynny.

Mae rheoliad 10 yn gwneud diwygiadau amrywiol i reoliad 4 o’r Rheoliadau Hysbysu o ganlyniad i reoliad 11 o’r Rheoliadau hyn.

Mae rheoliad 11 yn mewnosod rheoliadau newydd 4A, 4B, 4C a 4CH yn y Rheoliadau Hysbysu. Mae rheoliad 4A yn gosod gofyniad ar labordai diagnostig i hysbysu Iechyd Cyhoeddus Cymru am ganlyniadau’r profion ar gyfer canfod SARS-CoV-2 neu firws y ffliw y maent yn eu prosesu. Mae rheoliad 4B yn gosod gofyniad ar labordai diagnostig i roi gwybodaeth ychwanegol pan fônt yn prosesu profion yn unol â’r Rheoliadau Teithio Rhyngwladol. Mae rheoliad 4C wedi ei fewnosod er mwyn egluro’r rhwymedigaethau ar labordai sy’n cynnal dilyniannu genomaidd ar samplau positif. Mae rheoliad 4CH yn nodi’r wybodaeth y mae rhaid i’r rheini sy’n cynnal profion yn y man lle y rhoddir gofal ar gyfer canfod SARS-CoV-2 neu firws y ffliw ei darparu i Iechyd Cyhoeddus Cymru. Profion yn y man lle y rhoddir gofal yw profion diagnostig sy’n cael eu cynnal mewn man ac eithrio labordy diagnostig. Mae rheoliadau 4A, 4C a 4CH yn darparu bod rhywun sy’n methu â chydymffurfio â’r rheoliadau hynny heb esgus rhesymol yn cyflawni trosedd, ac y byddai’r person hwnnw’n agored, ar euogfarn ddiannod, i ddirwy.

Mae rheoliad 12 yn diwygio rheoliad 5 o’r Rheoliadau Hysbysu er mwyn darparu, pan fo hysbysiad wedi ei wneud o dan reoliad 4A, 4B neu 4C, y caiff Iechyd Cyhoeddus Cymru geisio cael, gan y person a ofynnodd am gynnal y prawf labordy, wybodaeth benodol nas darparwyd gan weithredwr y labordy diagnostig ac yn gosod rhwymedigaeth ar y person hwnnw i ddarparu’r wybodaeth pan fo’n hysbys.

Mae rheoliad 13 yn diwygio rheoliad 7 o’r Rheoliadau Hysbysu er mwyn darparu y caniateir i hysbysiadau a wneir o dan reoliadau 4A, 4B, 4C a 4CH gael eu gwneud ar ffurf electronig pan roddir cydsyniad i hynny.

Mae rheoliad 14 yn diwygio Atodlen 1 i’r Rheoliadau Hysbysu er mwyn cynnwys bacteria sy’n adweithio’n negyddol i brofion Gram sy’n cynhyrchu carbapenemase caffaeledig, clefyd firws Chikungunya, clefyd firws Zica, enseffalitis firysol a gludir gan dorogod, haint firws Gorllewin Nîl a Tricinelosis at y rhestr o glefydau hysbysadwy.

Mae rheoliad 15 yn ei gwneud yn ofynnol i Weinidogion Cymru adolygu effeithiolrwydd y darpariaethau a wneir gan y Rheoliadau hyn cyn i’r cyfnod o 12 mis sy’n dechrau â’r diwrnod drannoeth y diwrnod y deuant i rym ddod i ben.

Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Rheoliadau hyn. O ganlyniad, ystyriwyd nad oedd yn angenrheidiol cynnal asesiad effaith rheoleiddiol o’r costau a’r manteision sy’n debygol o ddeillio o gydymffurfio â’r Rheoliadau hyn.