Rheoliadau Sgil-gynhyrchion Anifeiliaid (Gorfodi) (Cymru) 2014

RHAN 5 Troseddau a chosbau

Cydymffurfio â gofynion sgil-gynhyrchion anifeiliaid

17.   Mae person sy’n methu â chydymffurfio â gofyniad sgil-gynhyrchion anifeiliaid yn cyflawni trosedd.

Rhwystro

18.   Mae’n drosedd—

(a) rhwystro person awdurdodedig yn fwriadol;

(b) methu â rhoi unrhyw wybodaeth neu gymorth i berson awdurdodedig neu fethu â darparu unrhyw gyfleusterau y mae’n rhesymol i berson o’r fath ofyn amdanynt, a hynny heb achos rhesymol;

(c) rhoi gwybodaeth ffug neu gamarweiniol i berson awdurdodedig yn fwriadol neu’n ddi-hid; neu

(d) methu â dangos cofnod neu ddogfen pan fo person awdurdodedig yn gofyn amdanynt.

Troseddau corfforaethol, troseddau partneriaeth a throseddau cymdeithas anghorfforedig

19.—( 1) Pan fo—

(a) trosedd o dan y Rheoliadau hyn wedi ei chyflawni gan gorff corfforaethol neu gan bartneriaeth neu gan bartneriaeth Albanaidd neu gan gymdeithas anghorfforedig arall; a

(b) y profir bod y drosedd wedi ei chyflawni gyda chydsyniad neu ymoddefiad unigolyn perthnasol, neu ei bod i’w phriodoli i unrhyw esgeulustod ar ran unigolyn perthnasol (gan gynnwys unigolyn sy’n honni ei fod yn gweithredu yn swyddogaeth unigolyn perthnasol),

mae’r unigolyn perthnasol yn ogystal â’r corff corfforaethol, y bartneriaeth, y bartneriaeth Albanaidd neu’r gymdeithas anghorfforedig, yn euog o’r drosedd ac mae’n agored i achos yn ei erbyn a’i gosbi yn unol â hynny.

(2) Ym mharagraff (1), ystyr “unigolyn perthnasol” yw—

(a) o ran corff corfforaethol—

(i) cyfarwyddwr, rheolwr, ysgrifennydd neu swyddog tebyg arall i’r corff;

(ii) pan fo materion y corff yn cael eu rheoli gan ei aelodau, aelod;

(b) o ran partneriaeth neu bartneriaeth Albanaidd, partner;

(c) o ran cymdeithas anghorfforedig heblaw partneriaeth Albanaidd, person sy’n ymwneud â rheolaeth neu reoli’r gymdeithas.

(3) Caniateir i achos am drosedd o dan y Rheoliadau hyn yr honnir ei bod wedi ei chyflawni gan bartneriaeth neu gymdeithas anghorfforedig gael ei ddwyn yn erbyn y bartneriaeth neu’r gymdeithas yn enw’r bartneriaeth neu’r gymdeithas.

(4) At ddibenion achos yn unol â pharagraff (3) mae’r darpariaethau a ganlyn yn gymwys fel pe bai’r bartneriaeth neu’r gymdeithas anghorfforedig yn gorff corfforaethol—

(a) rheolau’r llys ynglŷn â chyflwyno dogfennau;

(b) adran 33 o Ddeddf Cyfiawnder Troseddol 1925(1); ac

(c) Atodlen 3 i Ddeddf Llysoedd Ynadon 1980(2).

(5) Mae dirwy a osodir ar bartneriaeth neu ar gymdeithas anghorfforedig wedi ei chollfarnu o drosedd o dan y Rheoliadau hyn i’w thalu o gronfeydd y bartneriaeth neu’r gymdeithas.

Cosbau

20.   Mae person sy’n euog o drosedd o dan y Rheoliadau hyn yn agored—

(a) ar gollfarn ddiannod, i ddirwy nad yw’n fwy na’r uchafswm statudol neu i garchariad am gyfnod nad yw’n fwy na thri mis, neu’r ddau; neu

(b) ar gollfarn ar dditiad, i ddirwy neu i garchariad am gyfnod nad yw’n fwy na dwy flynedd, neu’r ddau.

(1)

1925 p. 86. Diddymwyd is-adrannau (1), (2) a (5) o adran 33 gan Ddeddf Llysoedd Ynadon 1952 (p. 55) adran 132 ac Atodlen 6; diwygiwyd is-adran (3) gan Ddeddf Llysoedd 1971 (p. 23), adran 56(1) ac Atodlen 8, Rhan 2, paragraff 19; diddymwyd is-adran (4) yn rhannol gan Ddeddf Llysoedd 2003 (p. 39) adran 109(1) a (3), Atodlen 8, paragraff 71 ac Atodlen 10

(2)

1980 p. 43. Diddymwyd paragraffau 2(a) a 5 gan Ddeddf Cyfiawnder Troseddol 2003 (p. 44); dirymwyd paragraff 2(a) gan adrannau 41, 332, Atodlen 3, Rhan 2, paragraff 51(1), (13)(a) ac Atodlen 37, Rhan 4; dirymwyd paragraff 5 gan adrannau 25(2) a 101(2) ac Atodlen 13; diwygiwyd paragraff 6 o Atodlen 3 gan Ddeddf Cyfiawnder Troseddol 2003, adran 41, Atodlen 3, Rhan 2, paragraffau 51(1) a (13)(b).