Rheoliadau Deddf Plant 1989 (Bwrsari Addysg Uwch) (Cymru) 2011

Nodyn Esboniadol

(Nid yw'r nodyn hwn yn rhan o'r Rheoliadau)

Mae'r Rheoliadau hyn wedi eu gwneud o dan adran 23C(5B) o Ddeddf Plant 1989 (“Deddf 1989”). Gan mai dyma'r tro cyntaf y mae'r pwerau yn adran 23C(5B)(b) (sy'n rhagnodi beth yw ystyr “higher education” at ddibenion adran 23C(5A)) wedi eu harfer gan Weinidogion Cymru, mae'r Rheoliadau wedi eu gosod ar ffurf drafft gerbron Cynulliad Cenedlaethol Cymru, ac wedi eu cymeradwyo drwy benderfyniad ganddo, yn unol ag adran 104A(3) a (4) o Ddeddf 1989.

Mae rheoliad 3 yn rhagnodi mai £2,000 yw'r swm perthnasol (bwrsari addysg uwch) sy'n daladwy o dan adran 23C(5A) o Ddeddf 1989 gan awdurdod lleol i gyn blentyn perthnasol. Mae bwrsari addysg uwch yn daladwy i gyn blentyn perthnasol sy'n dechrau cwrs addysg uwch ar neu ar ôl 1 Medi 2010 yn unol â'i gynllun llwybr.

Mae cyn blentyn perthnasol yn berson sy'n 18 oed neu'n hŷn ac a oedd gynt naill ai'n blentyn perthnasol neu'n blentyn cymwys at ddibenion Deddf 1989.

Mae cynllun llwybr yn gynllun sy'n nodi'r cyngor, y cymorth a'r gefnogaeth y mae awdurdod lleol yn bwriadu eu rhoi i gyn blentyn perthnasol.

Mae rheoliad 4 yn rhagnodi mai ystyr “addysg uwch” yw cwrs addysg uwch sy'n arwain at radd gyntaf neu gymhwyster arall o safon gyfwerth, sy'n para am ddwy flynedd o leiaf (pan fo'n cael ei ddilyn fel cwrs amser-llawn neu gwrs rhan-amser sy'n gyfwerth â'r cwrs amser-llawn) ac sydd wedi ei ddynodi gan neu o dan Reoliadau a wnaed o dan adran 22 o Ddeddf Addysgu ac Addysg Uwch 1998.

Mae rheoliad 5 yn gwneud darpariaeth ar gyfer talu'r bwrsari addysg uwch fel cyfandaliad neu drwy randaliadau. Mater i'r awdurdod lleol yw penderfynu ynghylch y dull talu ar ôl iddo, cyn belled ag y bo'n rhesymol ymarferol, ddarganfod beth yw dymuniadau a theimladau'r cyn blentyn perthnasol a rhoi ystyriaeth briodol iddynt. Os caiff y bwrsari addysg uwch ei dalu fel cyfandaliad, rhaid iddo gael ei dalu gan yr awdurdod lleol i'r cyn blentyn perthnasol yn ystod blwyddyn academaidd gyntaf y cwrs addysg uwch. Os yw'r bwrsari addysg uwch i'w dalu drwy randaliad, rhaid i'r rhandaliad cyntaf gael ei dalu yn ystod blwyddyn academaidd gyntaf y cwrs addysg uwch, gan dalu'r rhandaliad terfynol cyn diwedd y cwrs addysg uwch. Fel arall, os yw'r cwrs yn para am 4 blynedd neu fwy, rhaid i'r rhandaliad terfynol gael ei dalu yn ystod 4 wythnos gyntaf pedwaredd flwyddyn y cwrs.

Mae rheoliad 5(5) yn caniatáu i'r awdurdod lleol atal unrhyw elfen o'r bwrsari addysg uwch sydd heb ei thalu yn ystod cyfnodau pan na fydd cyn blentyn perthnasol yn dilyn cwrs addysg uwch yn unol â'i gynllun llwybr.

Mae rheoliad 6 yn gwneud darpariaeth i'r awdurdod lleol adennill unrhyw symiau a delir drwy gamgymeriad i unrhyw berson.

Mae Asesiad Effaith Rheoleiddiol wedi'i baratoi mewn cysylltiad â'r Rheoliadau hyn. Gellir cael copi gan Llywodraeth Cynulliad Cymru, Parc Cathays, Caerdydd, CF10 3NQ.