Gorchymyn Rheoli Clefydau (Mesurau Dros Dro) (Cymru) (Rhif2) 2002

Nodyn Esboniadol

(Nid yw'r nodyn hwn yn rhan o'r Gorchymyn)

Mae'r Gorchymyn hwn, sy'n gymwys i Gymru yn unig, yn dirymu a disodli (gyda diwygiadau) Orchymyn Rheoli Clefydau (Mesurau Dros Dro) (Cymru) 2002 (O.S. 2002/280 (Cy.32), fel y'i diwygiwyd gan O.S. 2002/1038 (Cy.110), 2002/1356 (Cy.132) a 2002/2060 (Cy.209).

Daw'r Gorchymyn i rym ar 6 Medi 2002 a bydd ei effaith yn darfod ar 1 Chwefror 2003. (Byddai effaith y Gorchymyn Rheoli Clefydau, petai heb gael ei ddirymu, wedi darfod ar 1 Rhagfyr 2002).

Mae'r Gorchymyn yn parhau i ddarparu ar gyfer mesurau dros dro i reoli clefydau. Mae'n darparu ar gyfer cyfyngiadau ar symud anifeiliaid (erthyglau 3 a 4) ac yn benodol—

(a) mae'n darparu y bydd yn anghyfreithlon symud unrhyw anifail ac eithrio o dan awdurdod trwydded a ddyroddwyd gan Gynulliad Cenedlaethol Cymru, yr Ysgrifennydd Gwladol neu arolygydd a benodwyd at ddibenion Deddf Iechyd Anifeiliaid 1981 (1981 p.22) (erthygl 3(1)(a)); a

(b) yn gosod cyfnod segur o 20 diwrnod (y “gofyniad segura”) ar ôl symud anifeiliaid i safle pan na chaniateir i unrhyw anifail gael ei symud i ffwrdd o'r safle hwnnw, yn ddarostyngedig i esemptiadau mewn perthynas ag amryw o symudiadau penodedig (erthygl 3(2) a (3)).

Y prif ddiwygiad yw cynnwys esemptiadau ychwanegol (yn erthyglau 3(3)(e) ac (f)) mewn perthynas â'r gofyniad segura sy'n golygu na fydd—

(a) symudiadau gwartheg a defaid sydd wedi'u bwriadu ar gyfer bridio cyn y diweddaraf o'r canlynol, sef 1 Chwefror 2003 neu dri mis ar ôl iddynt gyrraedd unrhyw safle; a

(b) dychweliad hyrddod bridio sydd heb eu gwerthu o'r farchnad i unrhyw safle,

yn arwain at ofyniad segura ar y safle y maent wedi'u symud iddo cyhyd ag y bod amodau penodol yn cael eu bodloni. Y prif amod yw bod y gwartheg neu'r defaid bridio neu'r hyrddod bridio sydd heb eu gwerthu yn cael eu rhoi mewn cyfleuster ynysu (“cyfleuster ynysu ar gyfer bridio”) yn union ar ôl iddynt gyrraedd a'u bod yn cael eu cadw yno, ynghyd ag unrhyw anifeiliaid eraill sydd eisoes yn y cyfleuster ynysu hwnnw ac unrhyw anifeiliaid y daethpwyd â hwy i mewn iddo o rywle arall ar y safle, tan ddechrau'r 21ain diwrnod ar ôl y diwrnod yr oeddent wedi cyrraedd yNo.

Mae'r gofynion manwl sydd i'w bodloni a'u dilyn mewn perthynas â'r cyfleuster ynysu ar gyfer bridio er mwyn i'r esemptiad segura newydd fod ar gael wedi'u nodi yn erthygl 3(9) a Rhan I o'r Atodlen. Yn ychwanegol, cyn bod modd defnyddio'r cyfleuster ynysu ar gyfer bridio at ddibenion yr esemptiad newydd, rhaid iddo fod wedi'i archwilio gan filfeddyg cymwysedig y mae'n ofynnol iddo gwblhau adroddiad ar ei arolygiad i raddau helaeth ar y ffurf a nodir yn Rhan II o'r Atodlen a'i anfon i Adran yr Amgylchedd, Bwyd a Materion Gwledig yn y cyfeiriad a ddangosir ar y ffurflen (erthygl 3(9)(b) ac (c)). Mae'n ofynnol hefyd i'r anifeiliaid yn y cyfleuster ynysu ar gyfer bridio gael eu harolygu gan filfeddyg cymwysedig yn ystod y cyfnod sy'n dechrau ar y 14eg diwrnod ac sy'n dod i ben ar yr 20fed diwrnod ar ôl y diwrnod y cyrhaeddodd yr anifeiliaid y safle ac mae'n ofynnol i'r cyfleuster gael ei arolygu hefyd gan y milfeddyg yn ystod yr un cyfnod.

Mae'r Gorchymyn hefyd yn parhau i wneud y canlynol:

(i) gwahardd symud anifeiliaid i ladd-dy ac eithrio os yw hynny er mwyn eu cigydda o fewn 48 awr ar ôl iddynt gyrraedd yno (erthygl 4);

(ii) darparu system ganiatadau ar gyfer hela gyda chŵ n (erthygl 5);

(iii) nodi darpariaethau cyffredinol mewn perthynas â thrwyddedau, awdurdodiadau, caniatadau a hysbysiadau a ddyroddir o dan y Gorchymyn (erthyglau 6 ac 8);

(iv) nodi trefniadau mewn perthynas â newidiadau o ran meddiannaeth safle (erthygl 7);

(v) nodi pwerau swyddogion Cynulliad Cenedlaethol Cymru a'r Ysgrifennydd Gwladol ac arolygwyr awdurdodau lleol (erthygl 9);

(vi) datgan bod toriadau cyfraith penodol yn dramgwyddau o dan y Gorchymyn (erthygl 10); a

(vii) gorfodi'r Gorchymyn (erthygl 11).

Mae'r Gorchymyn hefyd yn diwygio (yn erthygl 13) Orchymyn Crynoadau Anifeiliaid (Mesurau Dros Dro) (Cymru) 2002 (O.S. 2002/283, fel y'i diwygiwyd gan O.S. 2002/1358 ac O.S. 2002/2060) drwy newid y dyddiad y bydd effaith y gorchymyn hwnnw yn darfod o 1 Rhagfyr 2002 i 1 Chwefror 2003.

Nid oes arfarniad rheoliadol wedi'i baratoi ar gyfer y Gorchymyn hwn.