Deddf Diogelwch Adeiladau (Cymru) 2026

21 Dyletswydd i hysbysu am newidiadau

(1) Rhaid i’r prif berson atebol ar gyfer adeilad categori 1 cofrestredig neu adeilad categori 2 cofrestredig hysbysu’n ysgrifenedig awdurdod diogelwch adeiladau yr adeilad am—

(a) newid i unrhyw wybodaeth sydd wedi ei chynnwys yn y gofrestr o dan adran 18(2)(a) ac (c) i (g);

(b) unrhyw newid arall a bennir mewn rheoliadau a wneir gan Weinidogion Cymru,

cyn diwedd 14 o ddiwrnodau sy’n dechrau â’r diwrnod cyntaf y mae’r prif berson atebol yn gwybod, neu y dylai’n rhesymol wybod, am y newid.

(2) Mae person sy’n methu â chydymffurfio ag is-adran (1) heb esgus rhesymol yn cyflawni trosedd.

(3) Mae person sy’n euog o drosedd o dan is-adran (2) yn agored—

(a) ar euogfarn ddiannod, i ddirwy neu i’w garcharu am gyfnod nad yw’n hwy na’r terfyn cymwys o dan adran 224(1A)(b) o’r Cod Dedfrydu, neu’r ddau;

(b) ar euogfarn ar dditiad, i ddirwy neu i’w garcharu am gyfnod nad yw’n hwy na 2 flynedd, neu’r ddau.

(4) Mae person sydd wedi ei euogfarnu o drosedd o dan is-adran (2) yn cyflawni trosedd bellach os yw’r person yn parhau i fethu â chydymffurfio ag is-adran (1) ar ôl yr euogfarn.

(5) Mae person sy’n euog o drosedd o dan is-adran (4) yn agored ar euogfarn ddiannod i ddirwy nad yw’n uwch na lefel 1 ar y raddfa safonol ar gyfer pob diwrnod y mae’r methiant yn parhau.