Deddf Seilwaith (Cymru) 2024

59 Yr amserlen ar gyfer penderfynu ar geisiadau am gydsyniad seilwaith

(1) Rhaid i’r awdurdod archwilio neu Weinidogion Cymru (yn ôl y digwydd) benderfynu ar gais am gydsyniad seilwaith cyn diwedd—

(a) 52 o wythnosau sy’n dechrau â’r diwrnod y caiff y cais ei dderbyn yn gais dilys, neu

(b) unrhyw gyfnod arall y mae’r ceisydd a Gweinidogion Cymru yn cytuno arno.

(2) Caiff Gweinidogion Cymru, drwy gyfarwyddyd, estyn y cyfnodau a grybwyllir yn is-adran (1).

(3) Caniateir rhoi cyfarwyddyd—

(a) mwy nag unwaith mewn perthynas â’r un cais;

(b) ar ôl diwedd y cyfnodau a grybwyllir yn is-adran (1).‍

(4) Cyn gynted ag y bo’n rhesymol ymarferol ar ôl rhoi’r cyfarwyddyd, rhaid i Weinidogion Cymru—

(a) hysbysu’r ceisydd ac unrhyw berson arall a bennir mewn rheoliadau am y cyfarwyddyd,

(b) cyhoeddi’r cyfarwyddyd, ac

(c) gosod datganiad ynghylch y cyfarwyddyd gerbron Senedd Cymru yn egluro ei effaith a pham y’i rhoddwyd.

(5) Rhaid i Weinidogion Cymru osod gerbron Senedd Cymru adroddiadau blynyddol ynghylch—

(a) eu cydymffurfedd â’r ddyletswydd a osodir gan is-adran (1), a

(b) sut y maent yn arfer y swyddogaethau a roddir gan is-adran (2).

(6) Caiff rheoliadau ddiwygio is-adran (1)(a).