Deddf Seilwaith (Cymru) 2024

32 Gwneud cais am gydsyniad seilwaith

(1) Ni chaniateir rhoi cydsyniad seilwaith oni wneir cais amdano.

(2) Rhaid i gais am gydsyniad seilwaith gael ei wneud i Weinidogion Cymru.

(3) Rhaid i gais am gydsyniad seilwaith—

(a) pennu’r datblygiad y mae’n ymwneud ag ef;

(b) cynnwys gorchymyn cydsyniad seilwaith drafft;

(c) cynnwys adroddiad ymgynghoriad cyn gwneud cais.

(4) Caiff rheoliadau wneud darpariaeth ynghylch ceisiadau am gydsyniad seilwaith, gan gynnwys (ymhlith pethau eraill) ddarpariaeth ynghylch—

(a) ffurf a chynnwys cais (gan gynnwys y gorchymyn cydsyniad seilwaith drafft sy’n ofynnol);

(b) sut y gwneir cais;

(c) gwybodaeth, dogfennau neu ddeunyddiau eraill y mae rhaid eu cynnwys mewn cais;

(d) prosesu cais;

(e) amrywio cais neu ei dynnu yn ôl;

(f) hysbysiadau yn ymwneud â cheisiadau;

(g) y cyfnod y mae rhaid gwneud cais o’i fewn ac estyn y cyfnod hwnnw.

(5) Caiff rheoliadau o dan is-adran (4) roi swyddogaeth, gan gynnwys swyddogaeth sy’n ymwneud ag arfer disgresiwn, i unrhyw berson.

(6) Yn is-adran (3)(c), ystyr “adroddiad ymgynghoriad cyn gwneud cais” yw adroddiad sy’n rhoi manylion ynghylch—

(a) sut y cydymffurfiodd y ceisydd ag adran 30;

(b) yr ymatebion a gafwyd oddi wrth bersonau yn rhinwedd adran 30 a’r ystyriaeth a roddwyd i’r ymatebion.