8.Mae’r adran hon yn nodi’r fformiwla i gyfrifo’r isafbris gwerthu am alcohol.
9.Y fformiwla yw I × Cr × Cy, ac—
I yw’r isafbris uned (i gael ei bennu mewn rheoliadau);
Cr yw cryfder canrannol yr alcohol, a fynegir fel rhif prifol (felly er enghraifft os yw’r cryfder yn 5%, 5 fydd y rhif prifol perthnasol);
Cy yw cyfaint yr alcohol mewn litrau.
10.Mae is-adran (2) yn darparu, pan na fyddai’r isafbris gwerthu am yr alcohol a gyfrifir yn ôl y fformiwla hon yn rhif cyfan mewn ceiniogau, ei fod i gael ei dalgrynnu i’r geiniog agosaf gan gymryd bod hanner ceiniog yn nes at y geiniog gyfan i fyny.
11.Mae’r adran yn darparu enghraifft ymarferol o gyfrifo pris potel o win a sut y mae’r isafbris i gael ei dalgrynnu. Hynny yw, pan fo’r isafbris gwerthu am y botel o win yn cael ei gyfrifo yn ôl y fformiwla fel £4.6875, byddai’n cael ei dalgrynnu i fyny i £4.69.
12.I roi enghraifft ymarferol arall o sut y byddai’r fformiwla yn gweithio, pe bai’r isafbris uned (I) wedi ei bennu mewn rheoliadau yn 50 ceiniog, byddai gan botel 3 Litr (Cy) o seidr â chryfder (Cr) o 7.5% isafbris gwerthu o £11.25 (0.5 x 7.5 x 3), sef cyfanred tair cydran y fformiwla.
13.I gael rhagor o enghreifftiau ymarferol o sut y byddai’r fformiwla yn gweithio pan fo alcohol yn cael ei gyflenwi fel rhan o gynnig arbennig, gweler y nodiadau i fynd gydag adrannau 5-7.