Deddf Treth Trafodiadau Tir a Gwrthweithio Osgoi Trethi Datganoledig (Cymru) 2017

Eithriad ar gyfer disodli prif breswylfa LL+C

8 (1) Nid yw trafodiad yn drafodiad eiddo preswyl cyfraddau uwch o dan baragraff 3 os yw’r annedd a brynir yn disodli unig breswylfa neu brif breswylfa’r prynwr.

(2) At ddibenion y paragraff hwn, mae’r annedd a brynir yn disodli unig breswylfa neu brif breswylfa’r prynwr—

(a) os yw’r prynwr, ar y dyddiad y mae’r trafodiad (“y trafodiad o dan sylw”) yn cael effaith, yn bwriadu i’r annedd a brynir fod yn unig breswylfa neu’n brif breswylfa iddo,

(b) os yw’r prynwr neu briod neu bartner sifil y prynwr ar y pryd, mewn trafodiad tir arall (“y trafodiad blaenorol”) a oedd yn cael effaith ar ddyddiad yn ystod [F1 y cyfnod a ganiateir], wedi gwaredu prif fuddiant mewn annedd arall (“yr annedd a werthir”),

(c) os nad oedd gan y prynwr na phriod neu bartner sifil y prynwr, yn union ar ôl y dyddiad yr oedd y trafodiad blaenorol yn cael effaith, unrhyw brif fuddiant yn yr annedd a werthir,

(d) os yr annedd a werthir oedd unig breswylfa neu brif breswylfa’r prynwr ar unrhyw adeg yn ystod [F2 y cyfnod a ganiateir] y cyfeirir ato ym mharagraff (b), ac

(e) os nad yw’r prynwr neu briod neu bartner sifil y prynwr, ar unrhyw adeg yn ystod y cyfnod sy’n dechrau â’r dyddiad yr oedd y trafodiad blaenorol yn cael effaith ac sy’n dod i ben â’r dyddiad y mae’r trafodiad o dan sylw yn cael effaith, wedi caffael prif fuddiant mewn unrhyw annedd arall gyda’r bwriad iddi fod yn unig breswylfa neu’n brif breswylfa’r prynwr.

[F3 (2A) At ddibenion is-baragraffau (2)(b) a (d), ystyr “y cyfnod a ganiateir” yw—

(a) y cyfnod o 3 blynedd sy’n dod i ben â’r dyddiad y mae’r trafodiad o dan sylw yn cael effaith, neu

(b) unrhyw gyfnod sy’n dod i ben â’r dyddiad y mae’r trafodiad o dan sylw yn cael effaith sy’n hwy na 3 blynedd os bodlonir yr amodau yn is-baragraff (2B).

(2B) Yr amodau yw—

(a) daeth cyfyngiad perthnasol i rym yn ystod y cyfnod o 3 blynedd sy’n dechrau â’r dyddiad yr oedd y trafodiad blaenorol yn cael effaith (“y cyfnod perthnasol”),

(b) cafodd y cyfyngiad perthnasol effaith andwyol sylweddol ar allu’r prynwr i gaffael annedd sy’n disodli unig breswylfa neu brif breswylfa’r prynwr cyn diwedd y cyfnod perthnasol, ac

(c) ymrwymir i’r trafodiad o dan sylw—

(i) ar neu ar ôl 12 Gorffennaf 2024, a

(ii) cyn gynted ag y bo’n rhesymol ymarferol.

(2C) Os bodlonir yr amodau yn is-baragraff (2B), rhaid i’r prynwr gynnwys datganiad yn y ffurflen dreth mewn cysylltiad â’r trafodiad o dan sylw sy’n esbonio sut y bodlonir yr amodau yn is-baragraff (2B).]

(3) Nid yw is-baragraff (2)(c) yn gymwys i briod neu bartner sifil y prynwr os nad oedd y ddau ohonynt yn cyd-fyw ar y dyddiad yr oedd y trafodiad o dan sylw yn cael effaith (gweler paragraff 25(3) am ystyr “cyd-fyw”).

(4) At ddibenion y paragraff hwn, caiff yr annedd a brynir ddod yn annedd sy’n disodli unig breswylfa neu brif breswylfa’r prynwr—

(a) os oedd y prynwr, ar y dyddiad y mae’r trafodiad (“y trafodiad o dan sylw”) yn cael effaith, yn bwriadu i’r annedd a brynir fod yn unig breswylfa neu’n brif breswylfa iddo,

(b) os yw’r prynwr neu briod, cyn-briod, partner sifil neu gyn-bartner sifil y prynwr, mewn trafodiad tir arall [F4 (“y trafodiad gwaredu”)] sy’n cael effaith ar ddyddiad yn ystod [F5 y cyfnod a ganiateir], yn gwaredu prif fuddiant mewn annedd arall (“yr annedd a werthir”),

(c) os nad oes gan y prynwr na phriod neu bartner sifil y prynwr, yn union ar ôl y dyddiad y mae’r [F6 trafodiad gwaredu] yn cael effaith, brif fuddiant yn yr annedd a werthir, a

(d) os yr annedd a werthir oedd unig breswylfa neu brif breswylfa’r prynwr ar unrhyw adeg yn ystod y cyfnod o 3 blynedd sy’n dod i ben â’r dyddiad y mae’r trafodiad o dan sylw yn cael effaith.

[F7 (4A) At ddibenion is-baragraff (4)(b), ystyr “y cyfnod a ganiateir” yw—

(a) y cyfnod o 3 blynedd sy’n dechrau â’r diwrnod ar ôl y dyddiad y mae’r trafodiad o dan sylw yn cael effaith, neu

(b) unrhyw gyfnod sy’n dechrau â’r diwrnod ar ôl y dyddiad y mae’r trafodiad o dan sylw yn cael effaith sy’n hwy na 3 blynedd os bodlonir yr amodau yn is-baragraff (4B) neu is-baragraff (4C).

(4B) Yr amodau yw—

(a) daeth cyfyngiad perthnasol i rym yn ystod y cyfnod o 3 blynedd sy’n dechrau â’r diwrnod ar ôl y dyddiad y mae’r trafodiad o dan sylw yn cael effaith (“y cyfnod perthnasol”),

(b) cafodd y cyfyngiad perthnasol effaith andwyol sylweddol ar allu’r prynwr neu briod, cyn-briod, partner sifil neu gyn-bartner sifil y prynwr i waredu’r prif fuddiant yn yr annedd a werthir cyn diwedd y cyfnod perthnasol, ac

(c) ymrwymir i’r trafodiad gwaredu—

(i) ar neu ar ôl 12 Gorffennaf 2024, a

(ii) cyn gynted ag y bo’n rhesymol ymarferol.

(4C) Yr amodau yw—

(a) ar ddyddiad cael effaith y caffaeliad o’r prif fuddiant gan y prynwr neu briod, cyn-briod, partner sifil neu gyn-bartner sifil y prynwr yn yr annedd a werthir, roedd gan yr annedd a werthir ddiffyg diogelwch tân na allai rhywun a oedd yn prynu’r buddiant fod wedi gwybod amdano yn rhesymol,

(b) roedd gan berson perthnasol ddyletswydd (i unrhyw raddau) i unioni’r diffyg diogelwch tân, ac

(c) naill ai—

(i) nad oedd y diffyg diogelwch tân wedi ei unioni ar y dyddiad y mae’r trafodiad gwaredu yn cael effaith, neu

(ii) pan oedd y diffyg diogelwch tân wedi ei unioni ar y dyddiad y mae’r trafodiad gwaredu yn cael effaith, ymrwymwyd i’r trafodiad gwaredu cyn gynted ag y bo’n rhesymol ymarferol ar ôl i’r diffyg diogelwch tân gael ei unioni.

(4D) Yn is-baragraff (4C)—

• ystyr “diffyg diogelwch tân” (“fire safety defect”), mewn perthynas ag annedd a werthir, yw diffyg diogelwch tân sy’n debygol o—

  (a)

  lleihau’n sylweddol nifer y personau sydd â diddordeb mewn prynu’r annedd a werthir na phe na bai ganddo’r diffyg, neu

  (b)

  gostwng yn sylweddol werth marchnadol yr annedd a werthir na phe na bai ganddo’r diffyg;

  ystyr “person perthnasol” (“relevant person”) yw—

  (a)

  pan fo’r prif fuddiant yn yr annedd a werthir yn fuddiant lesddaliad—

  (i)

  landlord y person a oedd â’r prif fuddiant, neu

  (ii)

  datblygwr yr annedd a werthir;

  (b)

  pan fo’r prif fuddiant yn yr annedd a werthir yn fuddiant rhydd-ddaliad mewn tir cyfunddaliad—

  (i)

  y gymdeithas cyfunddaliad ar gyfer yr annedd a werthir, neu

  (ii)

  datblygwr yr annedd a werthir;

  (c)

  pan fo’r prif fuddiant yn yr annedd a werthir yn fuddiant rhydd-ddaliad (ac eithrio buddiant mewn tir cyfunddaliad), ddatblygwr yr annedd a werthir.

(4E) Yn y diffiniad o “person perthnasol” yn is-baragraff (4D), nid yw “datblygwr” yn cynnwys datblygwr sydd hefyd y person a oedd â’r prif fuddiant.]

(5) Nid yw is-baragraff (4)(c) yn gymwys i briod neu bartner sifil y prynwr os nad yw’r ddau ohonynt yn cyd-fyw ar y dyddiad y mae’r [F8 trafodiad gwaredu] yn cael effaith (gweler paragraff 25(3) am ystyr “cyd-fyw”).

(6) Am ddarpariaeth bellach mewn cysylltiad ag annedd sy’n dod yn annedd sy’n disodli unig breswylfa neu brif breswylfa’r prynwr, gweler paragraff 23.

Diwygiadau Testunol

F1 Geiriau yn Atod. 5 para. 8(2)(b) wedi eu hamnewid (12.7.2024) gan Rheoliadau Deddf Treth Trafodiadau Tir a Gwrthweithio Osgoi Trethi Datganoledig (Cymru) 2017 (Diwygio Atodlen 5) 2024 (O.S. 2024/791), rhlau. 1(2), 3(2)(a)

F2 Geiriau yn Atod. 5 para. 8(2)(d) wedi eu hamnewid (12.7.2024) gan Rheoliadau Deddf Treth Trafodiadau Tir a Gwrthweithio Osgoi Trethi Datganoledig (Cymru) 2017 (Diwygio Atodlen 5) 2024 (O.S. 2024/791), rhlau. 1(2), 3(2)(b)

F3 Atod. 5 para. 8(2A)-(2C) wedi ei fewnosod (12.7.2024) gan Rheoliadau Deddf Treth Trafodiadau Tir a Gwrthweithio Osgoi Trethi Datganoledig (Cymru) 2017 (Diwygio Atodlen 5) 2024 (O.S. 2024/791), rhlau. 1(2), 3(3)

F4 Geiriau yn Atod. 5 para. 8(4)(b) wedi eu mewnosod (12.7.2024) gan Rheoliadau Deddf Treth Trafodiadau Tir a Gwrthweithio Osgoi Trethi Datganoledig (Cymru) 2017 (Diwygio Atodlen 5) 2024 (O.S. 2024/791), rhlau. 1(2), 3(4)(a)(i)

F5 Geiriau yn Atod. 5 para. 8(4)(b) wedi eu hamnewid (12.7.2024) gan Rheoliadau Deddf Treth Trafodiadau Tir a Gwrthweithio Osgoi Trethi Datganoledig (Cymru) 2017 (Diwygio Atodlen 5) 2024 (O.S. 2024/791), rhlau. 1(2), 3(4)(a)(ii)

F6 Geiriau yn Atod. 5 para. 8(4)(c) wedi eu hamnewid (12.7.2024) gan Rheoliadau Deddf Treth Trafodiadau Tir a Gwrthweithio Osgoi Trethi Datganoledig (Cymru) 2017 (Diwygio Atodlen 5) 2024 (O.S. 2024/791), rhlau. 1(2), 3(4)(b)

F7 Atod. 5 para. 8(4A)-(4E) wedi ei fewnosod (12.7.2024) gan Rheoliadau Deddf Treth Trafodiadau Tir a Gwrthweithio Osgoi Trethi Datganoledig (Cymru) 2017 (Diwygio Atodlen 5) 2024 (O.S. 2024/791), rhlau. 1(2), 3(5)

F8 Geiriau yn Atod. 5 para. 8(5) wedi eu hamnewid (12.7.2024) gan Rheoliadau Deddf Treth Trafodiadau Tir a Gwrthweithio Osgoi Trethi Datganoledig (Cymru) 2017 (Diwygio Atodlen 5) 2024 (O.S. 2024/791), rhlau. 1(2), 3(6)

Addasiadau (ddim yn newid testun)

C1 Atod. 5 applied (ynghyd â modifications) (1.4.2018) by Rheoliadau Treth Trafodiadau Tir (Darpariaethau Trosiannol) (Cymru) 2018 (O.S. 2018/126), rhlau. 1(2), 12

Gwybodaeth Cychwyn

I1 Atod. 5 para. 8 ddim mewn grym ar y Cydsyniad Brenhinol, gweler a. 81(2)

I2 Atod. 5 para. 8 mewn grym ar 1.4.2018 gan O.S. 2018/34, ergl. 3