Adran 33 – Y weithdrefn ar gyfer rheoliadau o dan adran 32
110.Mae adran 33 yn darparu ar gyfer y weithdrefn sydd i fod yn gymwys i wneud rheoliadau o dan adran 32. Pan fo Gweinidogion Cymru yn gwneud rheoliadau ynghylch y meini prawf cymhwystra, rhaid iddynt ymgynghori â’r personau hynny y mae’n ymddangos bod y rheoliadau yn debygol o effeithio arnynt, y sefydliadau hynny y mae’n ymddangos eu bod yn cynrychioli buddiannau’r rheini y mae’r rheoliadau yn debygol o effeithio arnynt ac unrhyw bersonau eraill y maent yn ystyried eu bod yn briodol.
111.Rhaid i Weinidogion Cymru roi cyfnod o 12 wythnos i’r rheini yr ymgynghorwyd â hwy gyflwyno sylwadau ar y rheoliadau drafft arfaethedig ynghylch cymhwystra. Rhaid iddynt wedyn ystyried y sylwadau hynny a chyhoeddi crynodeb o’r sylwadau hynny.
112.Ar ôl yr ymgynghoriad, rhaid i Weinidogion Cymru osod drafft o’r rheoliadau gerbron Cynulliad Cenedlaethol Cymru, ynghyd â datganiad yn rhoi manylion y gwahaniaethau rhwng y rheoliadau drafft yr ymgynghorwyd arnynt a’r rheoliadau drafft fel y’u gosodir gerbron y Cynulliad Cenedlaethol.
113.Ni chaniateir i reoliadau ar gymhwystra gael eu gwneud ond pan fo drafft o’r offeryn wedi ei osod gerbron y Cynulliad Cenedlaethol ac wedi ei gymeradwyo drwy benderfyniad ganddo, ac ni chaniateir i’r rheoliadau drafft gael eu cymeradwyo drwy benderfyniad gan y Cynulliad Cenedlaethol tan ar ôl i gyfnod o 60 niwrnod, o’r dyddiad y gosodir y rheoliadau drafft, ddod i ben.
