Rheoliadau Cydnabod Cymwysterau Proffesiynol a Gweithredu Cytundebau Cydnabod Rhyngwladol (Rheoleiddio ac Arolygu Gofal Cymdeithasol) (Diwygiadau Amrywiol) (Cymru) 2026

9.    Ar ôl adran 85 mewnosoder—

Cymwysterau proffesiynol – ymgeiswyr gwladwriaeth benodedig

85B.— (1) Mae’r adran hon yn gymwys pan fo ymgeisydd gwladwriaeth benodedig yn cyflwyno cais ar gyfer cofrestru.

(2) Yn ddarostyngedig i adran 85C, rhaid i’r cofrestrydd gydnabod cymwysterau proffesiynol yr ymgeisydd os yw wedi ei fodloni bod y cymwysterau proffesiynol hynny’n gymaradwy â’r rhai sy’n ofynnol i ymarfer yng Nghymru waith personau sydd wedi eu cofrestru yn y rhan o’r gofrestr y mae’r cais yn ymwneud â hi.

Ymgeiswyr gwladwriaeth benodedig: gwrthod cydnabod cymwysterau proffesiynol

85C.— (1) Ni chaiff y cofrestrydd wrthod cydnabod cymwysterau proffesiynol ymgeisydd gwladwriaeth benodedig ond os bodlonir un neu ragor o Amodau 1, 2, 3 neu 4.

(2) Mae Amod 1 wedi ei fodloni—

(a) pan fo gwahaniaeth sylweddol rhwng y safon hyfedredd y darperir tystiolaeth ohoni gan gymwysterau proffesiynol yr ymgeisydd a’r safon hyfedredd y mae’n angenrheidiol i berson ei chyflawni i gael ei dderbyn i’r rhan o’r gofrestr y mae’r cais yn ymwneud â hi, a

(b) pan fo’r ymgeisydd yn methu prawf gallu, neu’n gwrthod ei sefyll, neu’n methu â chwblhau cyfnod ymaddasu a osodwyd yn unol ag adran 85D.

(3) Mae Amod 2 wedi ei fodloni—

(a) pan fo gwaith personau sydd wedi eu cofrestru yn y rhan o’r gofrestr y mae’r cais yn ymwneud â hi yn cynnwys un neu ragor o weithgareddau proffesiynol sy’n cwmpasu materion sy’n sylweddol wahanol i’r rhai a gwmpesir gan gymwysterau proffesiynol yr ymgeisydd, a

(b) pan fo’r ymgeisydd yn methu prawf gallu, neu’n gwrthod ei sefyll, neu’n methu â chwblhau cyfnod ymaddasu a osodwyd yn unol ag adran 85D.

(4) Mae Amod 3 wedi ei fodloni pan fyddai ei gwneud yn ofynnol i’r ymgeisydd sefyll prawf gallu neu gwblhau cyfnod ymaddasu yn unol ag adran 85D yn gyfystyr â’i gwneud yn ofynnol i’r ymgeisydd gaffael y cymwysterau proffesiynol sy’n ofynnol er mwyn ymarfer gwaith personau sydd wedi eu cynnwys yn y rhan o’r gofrestr y mae’r cais yn ymwneud â hi.

(5) Mae Amod 4 wedi ei fodloni pan na fo’r ymgeisydd yn gallu bodloni unrhyw un neu ragor o’r gofynion cofrestru eraill mewn perthynas â’r rhan o’r gofrestr y mae’r cais yn ymwneud â hi.

Ymgeiswyr gwladwriaeth benodedig: profion gallu a chyfnodau ymaddasu

85D.— (1) Caiff y cofrestrydd ei gwneud yn ofynnol i ymgeisydd gwladwriaeth benodedig sefyll prawf gallu, wedi ei safoni neu fel arall, neu gwblhau cyfnod ymaddasu—

(a) pan fo gwahaniaeth sylweddol rhwng cymwysterau proffesiynol yr ymgeisydd a’r wybodaeth hanfodol neu’r sgiliau hanfodol sy’n ofynnol er mwyn ymarfer gwaith personau sydd wedi eu cofrestru yn y rhan o’r gofrestr y mae’r cais yn ymwneud â hi, neu

(b) pan fo gwaith personau sydd wedi eu cofrestru yn y rhan o’r gofrestr y mae’r cais yn ymwneud â hi yn cynnwys un neu ragor o weithgareddau proffesiynol sy’n cwmpasu materion sy’n sylweddol wahanol i’r rhai a gwmpesir gan gymwysterau proffesiynol yr ymgeisydd.

(2) Rhaid i’r cofrestrydd ystyried a yw unrhyw ofyniad i sefyll prawf gallu neu i gwblhau cyfnod ymaddasu yn gymesur â’r gwahaniaeth y ceisir ei ddatrys.

(3) Os yw’r ymgeisydd yn gofyn iddo wneud hynny, rhaid i’r cofrestrydd, i’r graddau y bo’n bosibl, ddarparu ei resymau yn ysgrifenedig dros ei gwneud yn ofynnol i’r ymgeisydd sefyll prawf gallu neu i gwblhau cyfnod ymaddasu.

(4) Pan fo’r cofrestrydd yn ei gwneud yn ofynnol i ymgeisydd ymgymryd â phrawf gallu, rhaid i’r cofrestrydd sicrhau bod profion o’r fath yn cael eu hamserlennu ag amlder rhesymol ac o leiaf unwaith y flwyddyn.”