Rheoliadau Cydnabod Cymwysterau Proffesiynol a Gweithredu Cytundebau Cydnabod Rhyngwladol (Rheoleiddio ac Arolygu Gofal Cymdeithasol) (Diwygiadau Amrywiol) (Cymru) 2026

11.    Ar ôl adran 88 (rheolau ynghylch ceisiadau ar gyfer cofrestru neu adnewyddu) mewnosoder—

Ceisiadau ar gyfer cofrestru: ymgeiswyr gwladwriaeth benodedig – darpariaethau atodol

88A.— (1) Mewn perthynas â cheisiadau ar gyfer cofrestru ymgeisydd gwladwriaeth benodedig, rhaid i’r cofrestrydd—

(a) o fewn un mis sy’n dechrau â’r dyddiad y ceir y cais—

(i) cydnabod ei fod wedi cael y cais, a

(ii) rhoi gwybod i’r ymgeisydd am unrhyw ddogfen sydd ar goll at ddibenion y cais;

(b) rhoi digon o amser i’r ymgeisydd i gwblhau gofynion a gweithdrefnau’r broses o wneud cais;

(c) ymdrin â’r cais yn brydlon.

(2) Caiff y cofrestrydd ei gwneud yn ofynnol i’r ymgeisydd ddarparu tystiolaeth o’i gymwysterau proffesiynol a’i allu i fodloni’r gofynion cofrestru eraill.

(3) Ond ni chaiff unrhyw dystiolaeth sy’n ofynnol o dan is-adran (2) fod yn ddim mwy nag sy’n angenrheidiol i ddangos—

(a) bod y cymwysterau proffesiynol a ddelir gan yr ymgeisydd yn dystiolaeth bod yr ymgeisydd wedi cyrraedd safon hyfedredd sy’n gymaradwy â’r gofynion a grybwyllir yn adran 84 (“wedi ei gymhwyso’n briodol”) mewn perthynas â’r rhan o’r gofrestr y mae’r cais yn ymwneud â hi, a

(b) bod yr ymgeisydd yn gallu bodloni’r gofynion cofrestru eraill.

(4) At ddibenion is-adran (2), rhaid i’r cofrestrydd dderbyn copïau ardystiedig yn lle dogfennau gwreiddiol (oni bai bod dogfennau gwreiddiol yn ofynnol yn rhesymol i ddiogelu uniondeb y broses gofrestru).

(5) At ddibenion is-adran (4), copi ardystiedig o ddogfen yw un yr ardystiwyd ei fod yn wir gopi o’r gwreiddiol gan gyfreithiwr sy’n ymarfer mewn unrhyw ran o’r Deyrnas Unedig.”