Gorchymyn Deddf Iechyd y Cyhoedd (Cymru) 2017 (Cychwyn Rhif 8 a Darpariaethau Trosiannol) 2024

Trwydded triniaeth arbennig

4.—( 1) Mae’r erthygl hon yn gymwys i berson (P) sydd, yn union cyn 29 Tachwedd 2024, wedi ei gofrestru i gynnal—

(a) y gwaith o aciwbigo(1);

(b) y busnes o datŵio, rhoi lliw lled-barhaol ar y croen, tyllu cosmetig neu electrolysis(2).

(2) Gydag effaith o 29 Tachwedd 2024, bernir bod P yn rhoi triniaeth arbennig o dan awdurdod trwydded triniaeth arbennig (y cyfeirir ati yn yr erthygl hon fel “trwydded drosiannol”).

(3) Mae trwydded drosiannol i’w thrin at ddibenion yr erthygl hon fel pe bai’n dod i ben—

(a) ar 1 Mawrth 2025 os yw P yn methu â gwneud cais am drwydded triniaeth arbennig ar neu cyn 28 Chwefror 2025, neu

(b) os yw P yn gwneud cais am drwydded triniaeth arbennig ar neu cyn 28 Chwefror 2025—

(i) ar y dyddiad y rhoddir y drwydded triniaeth arbennig, neu

(ii) ar y dyddiad y dyroddir yr hysbysiad o benderfyniad i wrthod y cais am drwydded triniaeth arbennig (ac eithrio y bydd y drwydded drosiannol yn parhau i gael effaith, pan fo sylwadau wedi eu cyflwyno, neu pan fo apêl wedi ei gwneud, mewn perthynas â’r penderfyniad i wrthod yn unol â darpariaethau perthnasol y Ddeddf, hyd nes bod apêl wedi ei phenderfynu’n llawn, wedi ei thynnu’n ôl neu hyd nes y rhoddir y gorau iddi).

(4) Er mwyn osgoi amheuaeth, nid yw darfodiad trwydded drosiannol o dan baragraff (3)(a) o’r erthygl hon i’w drin fel pe bai’r drwydded drosiannol wedi ei dirymu ac nid yw’n arwain at hawl i apelio o dan Atodlen 3 i’r Ddeddf.

(5) Nid yw’r rhwymedigaeth ar awdurdod lleol i gynnal a chyhoeddi cofrestr fel y nodir yn adran 75 o’r Ddeddf (dyletswydd i gynnal cofrestr o drwyddedau triniaeth arbennig a mangreoedd a cherbydau a gymeradwywyd) yn gymwys mewn perthynas â thrwyddedau trosiannol.

(1)

Gweler adran 14(1) o Ddeddf 1982 am ystyr person sydd wedi ei gofrestru i gynnal y gwaith o aciwbigo.

(2)

Gweler adran 15(1) o Ddeddf 1982 am ystyr person sydd wedi ei gofrestru i gynnal y busnes o datŵio, rhoi lliw lled-barhaol ar y croen, tyllu cosmetig neu electrolysis.