Rheoliadau Adeiladu (Diwygio) (Cymru) (Rhif 2) 2022

NODYN ESBONIADOL

(Nid yw’r nodyn hwn yn rhan o’r Rheoliadau)

Mae’r Rheoliadau hyn yn diwygio Rheoliadau Adeiladu 2010 (“y Rheoliadau Adeiladu”) fel y maent yn gymwys o ran Cymru a Rheoliadau Adeiladu (Diwygio) (Cymru) 2022 (“Rheoliadau Diwygio 2022”).

Mae Atodlen 1 i’r Rheoliadau Adeiladu yn nodi’r hyn sy’n ofynnol wrth gyflawni gwaith adeiladu. Mae rheoliad 2 yn estyn paragraff L2 o Atodlen 1 (cynhyrchu trydan ar y safle) i adeiladau annomestig.

Mae rheoliad 3 yn gwneud diwygiadau i’r darpariaethau trosiannol yn rheoliad 21 o Reoliadau Diwygio 2022. Mae’r diwygiadau yn rheoliad 3 yn cywiro mân wallau ac yn eithrio Rhannau 2 a 3 o Reoliadau Diwygio 2022 rhag bod yn gymwys i safleoedd sy’n dod o dan ddarpariaethau trosiannol blaenorol. Gwna hyn drwy bennu’r dyddiadau perthnasol erbyn pryd y dylid bod wedi cydymffurfio â darpariaeth hysbysu (31 Gorffennaf 2014) ac erbyn pryd y dylai’r gwaith adeiladu fod wedi cychwyn (31 Gorffennaf 2015).

Mae rheoliad 4 yn gwneud darpariaethau trosiannol fel nad yw’r diwygiad a wneir gan reoliad 2 yn gymwys pan fo gwaith adeiladu ar adeilad unigol wedi cychwyn yn unol â darpariaeth hysbysu berthnasol, ar yr amod bod y gwaith adeiladu ar yr adeilad hwnnw eisoes wedi cychwyn neu y cydymffurfiwyd â darpariaeth hysbysu berthnasol eisoes ac y cychwynnir y gwaith adeiladu ar yr adeilad hwnnw o fewn 12 mis i’r adeg y daw’r Rheoliadau hyn i rym. Mae rheoliad 4 hefyd yn eithrio’r diwygiad i Ran L (rheoliad 2) rhag bod yn gymwys i safleoedd fel y’u nodir yn rheoliad 3.

Mae Deddf Adeiladu 1984 yn rhoi’r pŵer i’r Ysgrifennydd Gwladol gymeradwyo a chyhoeddi dogfennau sy’n cynnwys canllawiau ymarferol yn ymwneud â’r gofynion a geir yn y Rheoliadau Adeiladu. Mae’r pŵer hwnnw yn arferadwy gan Weinidogion Cymru i’r graddau y mae’n gymwys o ran Cymru.

Mae Dogfen Gymeradwy L Cyfrol 2, rhifyn 2022, yn cynnwys canllawiau ymarferol ar fodloni gofynion y Rheoliadau Adeiladu sydd wedi cael eu diwygio gan yr offeryn hwn. Mae’r Dogfennau Cymeradwy wedi eu cyhoeddi gan Weinidogion Cymru a gellir cael gafael arnynt ar www.llyw.cymru.

Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Rheoliadau hyn. O ganlyniad, lluniwyd asesiad effaith rheoleiddiol o’r costau a’r manteision sy’n debygol o ddeillio o gydymffurfio â’r Rheoliadau hyn. Gellir cael copi oddi wrth: Llywodraeth Cymru, Parc Cathays, Caerdydd, CF10 3NQ ac mae wedi ei gyhoeddi ar www.llyw.cymru.