Gorchymyn Pysgodfa Cregyn Gleision a Wystrys Afon Menai (Dwyrain) 2022

Offerynnau Statudol Cymru

2022 Rhif 213 (Cy. 69)

Pysgodfeydd Môr, Cymru

Pysgod Cregyn

Gorchymyn Pysgodfa Cregyn Gleision a Wystrys Afon Menai (Dwyrain) 2022

Gwnaed

3 Mawrth 2022

Gosodwyd gerbron Senedd Cymru

4 Mawrth 2022

Yn dod i rym

2 Ebrill 2022

Gwnaeth The Menai Strait Fishery Order Management Association (Rhif Cwmni: 07163689) (“y Grantî”) gais i Weinidogion Cymru am orchymyn sy’n rhoi hawliau i bysgodfa o dan adran 1(2) o Ddeddf Pysgodfeydd Môr (Pysgod Cregyn) 1967(1) (“y Ddeddf”).

Mae Gweinidogion Cymru wedi llunio Gorchymyn drafft ac wedi cyflwyno copi ohono i’r Grantî yn unol â pharagraff 1 o Atodlen 1 i’r Ddeddf(2).

Mae’r Grantî wedi peri i gopïau printiedig o’r Gorchymyn drafft gael eu cyhoeddi a’u cylchredeg, ac wedi rhoi hysbysiad am y cais, yn unol â pharagraff 2 o Atodlen 1 i’r Ddeddf.

Mae Gweinidogion Cymru wedi ystyried y gwrthwynebiadau a’r sylwadau a gyflwynwyd mewn cysylltiad â’r Gorchymyn drafft, yn unol â pharagraffau 3 i 6 o Atodlen 1 i’r Ddeddf, ac yn ystyried ei bod yn hwylus gwneud y Gorchymyn hwn.

Mae Gweinidogion Cymru wedi rhoi sylw i bwerau a dyletswyddau Comisiynwyr Ystad y Goron o dan Ddeddf Ystad y Goron 1961(3) yn unol â pharagraff 6(2) o Atodlen 1 i’r Ddeddf.

Mae’r Gorchymyn hwn yn cynnwys darpariaeth briodol i atal niwed i safleoedd morol Ewropeaidd ac at ddiben diogelu’r amgylchedd morol yn unol ag adran 5A o’r Ddeddf.

Mae Gweinidogion Cymru yn gwneud y Gorchymyn a ganlyn drwy arfer y pwerau a roddir gan adrannau 1 a 4 o’r Ddeddf a freinir bellach ynddynt hwy(4).

(1)

1967 p. 83. Diwygiwyd adran 1 o Ddeddf Pysgodfeydd Môr (Pysgod Cregyn) 1967 (“y Ddeddf”) gan adran 9(1) o Ddeddf Terfynau Pysgodfeydd 1976 (p. 86), a pharagraff 15 o Atodlen 2 iddi; adrannau 202(1), (2) a (3), 203 a 321 o Ddeddf y Môr a Mynediad i’r Arfordir 2009 (p. 23), a Rhan 5(A) o Atodlen 22 iddi; ac adrannau 71(1) a 74(1) o Ddeddf yr Amgylchedd (Cymru) 2016 (dccc 3). Mae adran 1 i’w darllen gydag adran 15(3) i (5) o Ddeddf Pysgodfeydd Môr 1968 (p. 77). Gweler adran 22(1) o’r Ddeddf am ddiffiniad o “the appropriate Minister” (“y Gweinidog priodol”).

(2)

Diwygiwyd Atodlen 1 i’r Ddeddf gan adran 15(1) a (7) o Ddeddf Pysgodfeydd Môr 1968 (p. 77); adran 31(6) o Ddeddf Cyfraith Trosedd 1977 (p. 45), adrannau 37 a 46 o Ddeddf Cyfiawnder Troseddol 1982 (p. 48) ac adrannau 202(1), (4), 214(1) i (4) a 321 o Ddeddf y Môr a Mynediad i’r Arfordir 2009 (p. 23), a Rhan 5(A) o Atodlen 22 iddi.

(3)

1961 p. 55.

(4)

Yn rhinwedd erthygl 2 o Orchymyn Cynulliad Cenedlaethol Cymru (Trosglwyddo Swyddogaethau) 1999 (O.S. 1999/672), ac Atodlen 1 iddi, trosglwyddwyd swyddogaethau’r Gweinidog priodol, fel y’i diffinnir yn adran 22(1) o’r Ddeddf, i Gynulliad Cenedlaethol Cymru i’r graddau yr oeddent yn arferadwy o ran Cymru. Trosglwyddwyd y swyddogaethau hynny a oedd gan Gynulliad Cenedlaethol Cymru wedi hynny i Weinidogion Cymru yn rhinwedd adran 162 o Ddeddf Llywodraeth Cymru 2006 (p. 32) a pharagraff 30 o Atodlen 11 iddi.