Gorchymyn Pysgodfa Cregyn Gleision a Wystrys Afon Menai (Dwyrain) 2022

Cyfleoedd les newydd

12.—( 1) Pe bai magwrfa yn dod yn wag, cyn rhoi les newydd, rhaid i’r Grantî—

(a) hysbysebu’r cyfle i wneud cais am les ar ei wefan ac mewn o leiaf un papur newydd lleol;

(b) cyhoeddi ar ei wefan y meini prawf y bydd y Grantî yn eu defnyddio i asesu’r ceisiadau a ddaw i law;

(c) caniatáu cyfnod nad yw’n llai na 28 o ddiwrnodau ar gyfer cyflwyno ceisiadau; a

(d) asesu pob cais yn unol â’r meini prawf cyhoeddedig ac yn unol â pharagraff (2).

(2) Wrth asesu ceisiadau sy’n dod i law oddi wrth ddarpar denantiaid, rhaid i’r Grantî roi sylw i pa un a yw ymgeiswyr yn gallu dangos naill ai—

(a) tystiolaeth o gymhwysedd i weithredu magwrfa yn ddiogel; neu

(b) cynigion i gael hyfforddiant neu gymwysterau perthnasol i gaffael cymhwysedd i weithredu magwrfa yn ddiogel.

(3) At ddibenion paragraff (1), mae magwrfa yn dod yn wag os yw tenant y fagwrfa honno—

(a) yn ildio ei les i’r Grantî;

(b) yn fforffedu ei les i’r Grantî; neu

(c) pan ddaw tymor un les i ben, yn peidio â gwneud cais am les newydd.