Rheoliadau Gwarchod Plant a Gofal Dydd (Anghymhwyso) (Rhif 2) (Cymru) 2022

Dehongli

2.—( 1) Yn y Rheoliadau hyn—

ystyr “cyfarwyddyd” (“direction”) yw cyfarwyddyd a wneir, neu sy’n cael effaith fel pe bai wedi ei wneud, o dan adran 142 o Ddeddf Addysg 2002(1) ar y sail a nodir yn is-adran (4)(a), (b) neu (d) o’r adran honno(2);

ystyr “Deddf 1989” (“the 1989 Act”) yw Deddf Plant 1989(3);

ystyr “Deddf 2000” (“the 2000 Act”) yw Deddf Cyfiawnder Troseddol a Gwasanaethau Llysoedd 2000(4);

ystyr “gorchymyn perthnasol” (“relevant order”) yw—

(a)

gorchymyn a wneir gan Lys y Goron, y Llys Apêl, y Llys Milwrol neu Lys Apêl y Llys Milwrol bod yr unigolyn o dan sylw yn cael ei dderbyn i’r ysbyty, neu

(b)

gorchymyn gwarcheidiaeth(5);

mae i “mangre ddomestig” (“domestic premises”) yr ystyr a roddir gan adran 19(6) o’r Mesur;

ystyr “y Mesur” (“the Measure”) yw Mesur Plant a Theuluoedd (Cymru) 2010;

ystyr “wedi ei anghymhwyso” (“disqualified”) yw wedi ei anghymhwyso rhag cofrestru yn warchodwr plant neu’n ddarparwr gofal dydd o dan Ran 2 o’r Mesur.

(2) Yn y Rheoliadau hyn, mae person (“P”) wedi ei “gael wedi cyflawni” trosedd—

(a) os yw P wedi ei euogfarnu o drosedd;

(b) os yw P wedi ei ddyfarnu’n ddieuog o drosedd oherwydd gorffwylledd;

(c) os cafwyd bod P o dan anabledd a’i fod wedi gwneud y weithred y mae wedi ei gyhuddo ohoni mewn cysylltiad â throsedd o’r fath;

(d) os yw P, ar neu ar ôl 6 Ebrill 2007, wedi cael rhybuddiad gan swyddog heddlu mewn cysylltiad â throsedd;

(e) os yw P, ar neu ar ôl 8 Ebrill 2013, wedi cael rhybuddiad ieuenctid gan swyddog heddlu mewn cysylltiad â throsedd y mae P wedi ei chyfaddef(6).

(3) Yn y Rheoliadau hyn, mae P wedi ei gael wedi cyflawni trosedd sy’n “gysylltiedig â” throsedd os yw P wedi ei gael wedi cyflawni trosedd fel a ganlyn—

(a) ceisio cyflawni’r drosedd honno, neu gynllwynio neu ysgogi i’w chyflawni, neu

(b) cynorthwyo i gyflawni’r drosedd honno, neu annog, cwnsela neu beri ei chyflawni.

(1)

2002 p. 32.

(2)

Diddymwyd adran 142 gan adran 63(2) o Ddeddf Diogelu Grwpiau Hyglwyf 2006 (p. 47) ac Atodlen 10 iddi, yn ddarostyngedig i arbedion a darpariaethau trosiannol a bennir yn erthyglau 4(2) a (3), a 7 o O.S. 2009/2611.

(3)

1989 p. 41.

(4)

2000 p. 43.

(5)

Fel y diffinnir “guardianship order” yn adran 30(1) o Ddeddf Cyfiawnder Troseddol a Gwasanaeth Llysoedd 2000 (p. 43) (“Deddf 2000”). Diddymwyd adran 30 gan adran 63(2) o Ddeddf Diogelu Grwpiau Hyglwyf 2006 ac Atodlen 10 iddi, yn ddarostyngedig i arbedion a bennir yn erthygl 5 o O.S. 2012/2231.

(6)

Mewnosodwyd adran 66ZA o Ddeddf Trosedd ac Anhrefn 1998 (p. 37) mewn perthynas â rhybuddiadau ieuenctid gan adran 135 o Ddeddf Cymorth Cyfreithiol, Dedfrydu a Chosbi Troseddwyr 2012 (p. 10) a daeth i rym ar 8 Ebrill 2013.