Mae Rhan 2A o Ddeddf Iechyd y Cyhoedd (Rheoli Clefydau) 1984 yn galluogi Gweinidogion Cymru, drwy reoliadau, i wneud darpariaeth at ddiben atal, diogelu rhag, rheoli neu ddarparu ymateb iechyd y cyhoedd i fynychder neu ledaeniad haint neu halogiad yng Nghymru.
Mae’r Rheoliadau hyn wedi eu gwneud mewn ymateb i’r bygythiad difrifol ac uniongyrchol i iechyd y cyhoedd a berir gan fynychder a lledaeniad coronafeirws syndrom anadlol acíwt difrifol 2 (SARS-CoV-2) yng Nghymru.
Mae’r Rheoliadau hyn yn diwygio Rheoliadau Diogelu Iechyd (Cyfyngiadau Coronafeirws) (Rhif 5) (Cymru) 2020 (O.S. 2020/1609 (Cy. 335)) (“y prif Reoliadau”) fel a ganlyn.
Mae’r cyfnod y mae’r darpariaethau dros dro yn Atodlen 3A yn gymwys ynddo (wrth bontio o Lefel Rhybudd 4 i Lefel Rhybudd 3) wedi ei estyn i ddiwedd y diwrnod ar 2 Mai 2021.
Mae’r cyfyngiad ar bobl rhag ymgynnull pan gynhelir gwaith yng nghartrefi pobl, er enghraifft gan grefftwyr, wedi ei wneud yn glir drwy ddarparu y caniateir hyn ar Lefelau Rhybudd 1, 2 a 3 (ac yn y cyfnod trosiannol sy’n gymwys ar hyn o bryd) heb fod angen iddo fod yn “rhesymol angenrheidiol” a heb fod angen “nad oes dewis arall sy’n rhesymol”.
Mae’r cyfyngiadau cyffredinol ar ymgynnull ag eraill yn yr awyr agored wedi eu llacio drwy ddileu’r gofyniad mai dim ond o ddwy aelwyd wahanol y caiff y rheini sy’n ymgynnull ddod. Mae hyn yn golygu y caiff unrhyw 6 pherson ymgynnull yn yr awyr agored bellach, heb gynnwys plant o dan 11 oed (ar yr amod nad ydynt yn dod o fwy na 6 aelwyd) neu ofalwyr. Mae’r newid hwn yn cymryd effaith ar 24 Ebrill 2021 a bydd hefyd yn gymwys ar Lefel Rhybudd 3.
Yn ogystal, caiff pobl ymgynnull yn yr awyr agored at ddibenion cymryd rhan mewn gweithgareddau sydd wedi eu trefnu’n ffurfiol sy’n cynnwys hyd at 30 o bobl (mae hyn yn golygu bod person dynodedig yn gyfrifol am y gweithgaredd, bod pob mesur rhesymol yn cael ei gymryd i leihau lledaeniad y coronafeirws wrth ymgymryd â’r gweithgaredd ac nad yw alcohol yn cael ei yfed). Mae’r newid hwn yn cael effaith o 26 Ebrill 2021.
Gall gweithgareddau sydd wedi eu trefnu’n ffurfiol gynnwys protestio a phicedu, a all ddigwydd heb gyfyngu ar nifer y bobl sy’n bresennol ar bob Lefel Rhybudd ac eithrio Lefel Rhybudd 4.
Mae darpariaeth benodol wedi ei gwneud i ganiatáu cynulliadau yn yr awyr agored, o hyd at 30 o bobl, i ddathlu gweinyddiad priodas, ffurfiad partneriaeth sifil neu seremoni briodas arall a ddigwyddodd ar neu ar ôl 26 Mawrth 2020. Ac, yn yr un modd, caniateir cynulliadau yn yr awyr agored o hyd at 30 o bobl i ddathlu bywyd person ymadawedig y cynhelir ei angladd ar neu ar ôl 26 Mawrth 2020. Mae’r newid hwn yn cael effaith o 26 Ebrill 2021.
Caniateir i fusnesau penodol ailagor eu mangreoedd ar gyfer gweithgareddau yn yr awyr agored. Mae hyn yn cynnwys busnesau bwyd a diod, atyniadau i ymwelwyr a phyllau nofio. Mae’r newid hwn yn cael effaith o ddechrau’r diwrnod ar 26 Ebrill 2021, ac eithrio ar gyfer busnesau bwyd a diod a gaiff agor o 6 a.m. ymlaen y diwrnod hwnnw.
Caniateir trefnu digwyddiadau “peilot” â chaniatâd Gweinidogion Cymru. Mae hyn hefyd i fod yn gymwys ar Lefel Rhybudd 3 (ac roedd eisoes wedi ei ganiatáu ar Lefelau Rhybudd 2 a 1).
Mae diwygiadau wedi eu gwneud hefyd i Atodlenni 1, 2 a 3 (yr Atodlenni sy’n gymwys ar Lefelau Rhybudd 1, 2 a 3). Mae’r rhain wedi eu gwneud i adlewyrchu cynnwys Cynllun Rheoli’r Coronafeirws a gyhoeddwyd gan Lywodraeth Cymru ym mis Mawrth 2021 a mân newidiadau eraill sydd wedi eu gwneud i’r cyfyngiadau yn ystod y cyfnod o bontio o Lefel Rhybudd 4 i Lefel Rhybudd 3 y bwriedir iddynt barhau i gael effaith ar y Lefelau Rhybudd eraill. O ganlyniad i hyn a’r diwygiadau eraill y cyfeirir atynt uchod, mae Atodlen 3 wedi ei hatgynhyrchu’n llawn.
Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Rheoliadau hyn. O ganlyniad, ni luniwyd asesiad effaith rheoleiddiol o’r costau a’r manteision sy’n debygol o ddeillio o gydymffurfio â’r Rheoliadau hyn.