Gorchymyn Senedd Cymru (Taliadau Swyddogion Canlyniadau) 2021

Y cyfanswm mwyaf sy’n adenilladwy am dreuliau yr eir iddynt mewn etholiad rhanbarthol i’r Senedd a ymleddir

9.—( 1) Ni chaiff y cyfanswm y caiff swyddog canlyniadau rhanbarthol ei adennill am dreuliau yr eir iddynt ar gyfer etholiad rhanbarthol i’r Senedd a ymleddir, neu mewn cysylltiad ag etholiad o’r fath, fod yn fwy na’r swm a restrir ar gyfer pob rhanbarth yng ngholofn 3 o’r tabl yn Atodlen 2.

(2) Rhaid i unrhyw dreuliau yr eir iddynt fod ar gyfer y canlynol neu mewn cysylltiad â’r canlynol—

(a) penodi a thalu personau i gynorthwyo’r swyddog canlyniadau rhanbarthol;

(b) treuliau teithio a chynhaliaeth dros nos y swyddog canlyniadau rhanbarthol ac unrhyw berson a benodir i gynorthwyo’r swyddog canlyniadau rhanbarthol;

(c) costau’r broses enwebu;

(d) argraffu neu gynhyrchu fel arall hysbysiadau etholiad, a’u cyhoeddi;

(e) argraffu neu gynhyrchu fel arall y papurau pleidleisio;

(f) darparu deunyddiau ysgrifennu a thalu costau postio, ffonio, argraffu, cyfieithu a bancio a chostau eitemau amrywiol eraill.