Gorchymyn Deddf Rheoleiddio ac Arolygu Gofal Cymdeithasol (Cymru) 2016 (Cychwyn Rhif 6, Arbedion a Darpariaethau Trosiannol) 2019

Ystyr gwasanaeth trosiannol

3.—( 1) Yn ddarostyngedig i baragraff (2), “gwasanaeth trosiannol” yw—

(a) asiantaeth berthnasol y mae person wedi ei gofrestru mewn cysylltiad â hi o dan Ran 2 o Ddeddf 2000 yn union cyn y diwrnod penodedig ac—

(i) yn achos asiantaeth fabwysiadu wirfoddol neu asiantaeth cymorth mabwysiadu, mae’r ardal y mae’r asiantaeth yn darparu gwasanaethau mabwysiadu ynddi wedi ei phennu mewn cais a wneir cyn y dyddiad perthnasol o dan adran 6(1) neu 11(1)(a)(i)(2) o’r Ddeddf yn fan y mae gwasanaeth mabwysiadu i’w ddarparu mewn perthynas ag ef;

(ii) yn achos asiantaeth faethu, mae’r ardal y mae’r asiantaeth yn darparu gwasanaethau maethu ynddi wedi ei phennu mewn cais a wneir cyn y dyddiad perthnasol o dan adran 6 neu 11(1)(a)(i) o’r Ddeddf yn fan y mae gwasanaeth maethu i’w ddarparu mewn perthynas ag ef;

(iii) yn achos cynllun lleoli oedolion, mae’r ardal y mae’r cynllun yn darparu gwasanaethau ynddi wedi ei phennu mewn cais a wneir cyn y dyddiad perthnasol o dan adran 6 neu 11(1)(a)(i) o’r Ddeddf yn fan y mae gwasanaeth lleoli oedolion i’w ddarparu mewn perthynas ag ef.

(1)

Mae adran 6 o’r Ddeddf yn ei gwneud yn ofynnol i berson sydd am ddarparu gwasanaeth rheoleiddiedig wneud cais i gofrestru i Weinidogion Cymru.

(2)

Mae adran 11(1)(a)(i) o’r Ddeddf yn ei gwneud yn ofynnol i berson sydd eisoes wedi ei gofrestru’n ddarparwr gwasanaeth rheoleiddiedig, o fewn ystyr y Ddeddf, wneud cais i Weinidogion Cymru i amrywio cofrestriad y darparwr hwnnw os yw’r darparwr am ddarparu gwasanaeth rheoleiddiedig nad yw eisoes wedi ei gofrestru i’w ddarparu. Yn achos y Gorchymyn hwn, mae person o’r fath yn cynnwys darparwr gwasanaeth cartref gofal, gwasanaeth llety diogel, gwasanaeth canolfan breswyl i deuluoedd neu wasanaeth cymorth cartref.