Rheoliadau Dyletswydd Gofal o ran Gwastraff Cartref (Cosbau Penodedig) (Cymru) 2019

NODYN ESBONIADOL

(Nid yw’r nodyn hwn yn rhan o’r Rheoliadau)

Mae’r Rheoliadau hyn yn mewnosod adran 34ZB newydd yn Rhan II (gwastraff ar dir) o Ddeddf Diogelu’r Amgylchedd 1990 (p. 43) (“y Ddeddf”).

Mae adran 34(2A) o’r Ddeddf yn nodi’r ddyletswydd gofal sy’n gymwys i feddianwyr eiddo domestig mewn perthynas â gwastraff cartref a gynhyrchir yn eu heiddo. Mae’r ddyletswydd honno yn ei gwneud yn ofynnol i feddianwyr eiddo domestig yng Nghymru gymryd yr holl gamau sydd ar gael iddynt ac sy’n rhesymol yn yr amgylchiadau i sicrhau bod y meddiannydd ond yn trosglwyddo ei wastraff cartref i berson a awdurdodir i’w dderbyn.

Mae adran 34(6) o’r Ddeddf yn darparu bod methiant i gydymffurfio â’r ddyletswydd a osodir gan adran 34(2A) yn drosedd.

Mae’r adran 34ZB newydd yn rhoi pŵer i awdurdodau gwastraff yng Nghymru roi hysbysiad sy’n cynnig cyfle i berson ryddhau ei hun rhag unrhyw atebolrwydd i euogfarn am y drosedd o fethu â chydymffurfio â’r ddyletswydd a osodir gan adran 34(2A) drwy dalu cosb benodedig.

Wrth ddyroddi hysbysiad, caiff awdurdod yng Nghymru gynnig disgownt am dalu cosb benodedig yn gynnar.

Lluniwyd asesiad effaith rheoleiddiol, o ran Cymru, o’r costau a’r manteision sy’n debygol o ddeillio o gydymffurfio â’r Rheoliadau hyn. Gellir cael copi oddi wrth: Llywodraeth Cymru, Parc Cathays, Caerdydd, CF10 3NQ ac mae wedi ei gyhoeddi ar www.llyw.cymru.