Offerynnau Statudol Cymru
2019 Rhif 290 (Cy. 68)
Cynllunio Gwlad A Thref, Cymru
Gorchymyn Datblygiadau o Arwyddocâd Cenedlaethol (Gweithdrefn) (Cymru) (Diwygio) 2019
Gwnaed
18 Chwefror 2019
Gosodwyd gerbron Cynulliad Cenedlaethol Cymru
20 Chwefror 2019
Yn dod i rym
1 Ebrill 2019
Mae Gweinidogion Cymru, drwy arfer y pwerau a roddir iddynt gan adrannau 61Z, 62R a 333 o Ddeddf Cynllunio Gwlad a Thref 1990(1), a thrwy arfer y pwerau a roddir i’r Ysgrifennydd Gwladol gan adrannau 59 a 62 o’r Ddeddf honno(2) ac sydd bellach yn arferadwy ganddynt hwy(3) (fel y’u cymhwysir yn achos adran 62 gydag addasiadau gan Orchymyn Datblygiadau o Arwyddocâd Cenedlaethol (Cymhwyso Deddfiadau) (Cymru) 2016)(4), yn gwneud y Gorchymyn a ganlyn:
Enwi, cychwyn, cymhwyso a dehongli
1.—(1) Enw’r Gorchymyn hwn yw Gorchymyn Datblygiadau o Arwyddocâd Cenedlaethol (Gweithdrefn) (Cymru) (Diwygio) 2019 a daw i rym ar 1 Ebrill 2019.
(2) Nid yw’r Gorchymyn hwn yn gymwys i gais a wneir, neu y bwriedir ei wneud, i Weinidogion Cymru o dan adran 62D o Ddeddf Cynllunio Gwlad a Thref 1990 cyn y dyddiad y daw’r Gorchymyn hwn i rym.
(3) Yn y Gorchymyn hwn, ystyr “y Gorchymyn Gweithdrefn” yw Gorchymyn Datblygiadau o Arwyddocâd Cenedlaethol (Gweithdrefn) (Cymru) 2016(5).
Diwygio’r Gorchymyn Gweithdrefn
2.—(1) Mae’r Gorchymyn Gweithdrefn wedi ei ddiwygio fel a ganlyn.
(2) Yn erthygl 2, yn y lle priodol mewnosoder—
“ystyr “y Rheoliadau Meini Prawf” (“the Criteria Regulations”) yw Rheoliadau Datblygiadau o Arwyddocâd Cenedlaethol (Meini Prawf Penodedig a Chydsyniadau Eilaidd Rhagnodedig) (Cymru) 2016(6);”.
(3) Yn erthygl 8—
(a)ar ddiwedd paragraff (1)(b)(vii) hepgorer “ac”;
(b)ar ddiwedd paragraff (1)(b)(viii) mewnosoder “; a”; ac
(c)ar ôl paragraff (1)(b)(viii) mewnosoder—
“(ix)yn achos datblygiad o fewn rheoliad 3(1)(ab) o’r Rheoliadau Meini Prawf, datganiad ysgrifenedig ynghylch hyd y llinell arfaethedig a’i foltedd enwol.”
(4) Yn erthygl 12—
(a)ar ddiwedd paragraff (1)(b)(ix) hepgorer “a”;
(b)ar ddiwedd paragraff (1)(b)(x) mewnosoder “; a”; ac
(c)ar ôl paragraff (1)(b)(x) mewnosoder—
“(xi)yn achos datblygiad o fewn rheoliad 3(1)(ab) o’r Rheoliadau Meini Prawf, datganiad ysgrifenedig ynghylch hyd y llinell arfaethedig a’i foltedd enwol, a pha un a gytunwyd ar yr holl fforddfreintiau angenrheidiol gyda pherchnogion a meddianwyr y tir y bwriedir i’r llinell ei groesi.”
(5) Yn lle Atodlen 1, rhodder yr Atodlen yn Atodlen 1 i’r Gorchymyn hwn.
(6) Yn lle Atodlen 2, rhodder yr Atodlen yn Atodlen 2 i’r Gorchymyn hwn.
(7) Mae’r diwygiadau yn Atodlen 3 i’r Gorchymyn hwn yn cael effaith.
Julie James
Y Gweinidog Tai a Llywodraeth Leol, un o Weinidogion Cymru
18 Chwefror 2019
Erthygl 2(5)
ATODLEN 1Amnewid Atodlen 1 i’r Gorchymyn Gweithdrefn
Erthyglau 8 a 9(5)
“ATODLEN 1Cyhoeddusrwydd ac ymgynghori cyn gwneud cais am ganiatâd cynllunio
”
Erthygl 2(6)
ATODLEN 2Amnewid Atodlen 2 i’r Gorchymyn Gweithdrefn
Erthygl 9(5)
ATODLEN 2
Erthygl 2(7)
ATODLEN 3Dyletswydd i ymgynghori cyn rhoi caniatâd cynllunio
1. Mae Atodlen 5 i’r Gorchymyn Gweithdrefn wedi ei diwygio fel a ganlyn
2. Yn y Tabl—
(a)yn lle paragraff (h) rhodder—
| “(h) | (i) Datblygiad sy’n cael effaith ffisegol uniongyrchol ar heneb gofrestredig. (ii) Datblygiad sy’n debygol o fod yn weladwy o heneb gofrestredig ac sy’n bodloni un o’r meini prawf a ganlyn— (a) ei fod o fewn pellter o 0.5 cilomedr o unrhyw bwynt ar berimedr heneb gofrestredig; (b) ei fod o fewn pellter o 1 cilomedr o berimedr heneb gofrestredig a bod ei uchder yn 15 o fetrau neu ragor, neu fod ei arwynebedd yn 0.2 hectar neu ragor; (c) ei fod o fewn pellter o 2 gilomedr o berimedr heneb gofrestredig a bod ei uchder yn 50 metr neu ragor, neu fod ei arwynebedd yn 0.5 hectar neu ragor; (d) ei fod o fewn pellter o 3 cilomedr o berimedr heneb gofrestredig a bod ei uchder yn 75 o fetrau neu ragor, neu fod ei arwynebedd yn 1 hectar neu ragor; neu (e) ei fod o fewn pellter o 5 cilomedr o berimedr heneb gofrestredig a bod ei uchder yn 100 metr neu ragor, neu fod ei arwynebedd yn 1 hectar neu ragor. (iii) Datblygiad sy’n debygol o effeithio ar safle parc hanesyddol cofrestredig neu ardd hanesyddol gofrestredig neu leoliad y parc hwnnw neu’r ardd honno; (iv) Datblygiad o fewn tirwedd hanesyddol gofrestredig y mae angen Asesiad o’r Effaith Amgylcheddol ar ei gyfer; neu (v) Datblygiad sy’n debygol o gael effaith ar werth byd-eang eithriadol Safle Treftadaeth y Byd | Gweinidogion Cymru” |
(b)hepgorer paragraff (k); ac
(c)ar ôl paragraff (t) mewnosoder—
| “(u) | Datblygiad— (i) ar dir a ddynodwyd yn Barth Llifogydd C2; (ii) sy’n ymwneud â, neu sy’n cynnwys, datblygiad gwasanaethau brys neu ddatblygiad a all fod mewn perygl mawr, ar dir a ddynodwyd yn Barth Llifogydd C1 neu ar dir yr hysbyswyd yr awdurdod cynllunio lleol yn ei gylch gan Gorff Adnoddau Naturiol Cymru at ddiben y ddarpariaeth hon | Corff Adnoddau Naturiol Cymru |
| (v) | Unrhyw ddatblygiad | Yr ymgymerwr dŵr a charthffosiaeth perthnasol” |
3. Yn y diffiniadau a roddir o dan y pennawd “Dehongli’r Tabl”—
(a)yn lle paragraff (d) rhodder—
“(d)ym mharagraff (h)—
(i)mae i “heneb gofrestredig” yr un ystyr ag a roddir i “scheduled monument” yn adran 1(11) o Ddeddf Henebion ac Ardaloedd Archeolegol 1979 (henebion cofrestredig)(7);
(ii)mae cyfeiriad at uchder datblygiad i’w ddehongli fel cyfeiriad at ei uchder wedi ei fesur o lefel y ddaear; ac at ddibenion y paragraff hwn ystyr “lefel y ddaear” (“ground level”) yw lefel arwyneb y ddaear yn union gerllaw’r datblygiad dan sylw neu, pan na fo lefel arwyneb y ddaear y lleolir y datblygiad arno yn wastad, lefel rhan uchaf yr arwyneb yn union gerllaw’r datblygiad;
(iii)ystyr “parc hanesyddol cofrestredig neu ardd hanesyddol gofrestredig” (“registered historic park or garden”) a “tirwedd hanesyddol gofrestredig” (“registered historic landscape”) yw’r parc, yr ardd neu’r dirwedd sydd wedi ei gynnwys neu ei chynnwys yn y Gofrestr o Dirweddau, Parciau a Gerddi o Ddiddordeb Hanesyddol Arbennig yng Nghymru a gynhelir gan Weinidogion Cymru(8);
(iv)ystyr “Safle Treftadaeth y Byd” (“World Heritage Site”) yw tir sy’n ymddangos ar Restr Treftadaeth y Byd a gedwir o dan erthygl 11(2) o Gonfensiwn UNESCO ar Amddiffyn Treftadaeth Ddiwylliannol a Naturiol y Byd a fabwysiadwyd ym Mharis ar 16 Tachwedd 1972(9);”; a
(b)ar ôl paragraff (i) mewnosoder—
“(j)ym mharagraff (u)—
(i)ystyr “Parth Llifogydd C1” (“Flood Zone C1”) yw ardal o orlifdir sydd wedi ei datblygu ac a wasanaethir gan seilwaith arwyddocaol, gan gynnwys amddiffynfeydd rhag llifogydd(10);
(ii)ystyr “Parth Llifogydd C2” (“Flood Zone C2”) yw ardal o orlifdir sydd heb seilwaith arwyddocaol i’w hamddiffyn rhag llifogydd;
(iii)mae i “datblygiad gwasanaethau brys” (“emergency services development”) a “datblygiad a all fod mewn perygl mawr” (“highly vulnerable development”) yr un ystyron ag a roddir iddynt yng Nghyfarwyddyd Cynllunio Gwlad a Thref (Hysbysu) (Cymru) 2012(11).”
NODYN ESBONIADOL
(Nid yw’r nodyn hwn yn rhan o’r Gorchymyn)
Mae’r Gorchymyn hwn yn diwygio Gorchymyn Datblygiadau o Arwyddocâd Cenedlaethol (Gweithdrefn) (Cymru) 2016 (“y Gorchymyn Gweithdrefn”).
Mae erthygl 2 yn diwygio erthyglau 8 a 12 o’r Gorchymyn Gweithdrefn. Mae’r diwygiadau yn ychwanegu gofynion pan fo datblygiad yn cynnwys gosod mathau penodol o linellau trydan uwchben. Mae’r gofynion yn ymwneud â’r wybodaeth y mae’n rhaid i berson sy’n bwriadu gwneud cais am ganiatâd cynllunio ei chyhoeddi, a chynnwys y cais hwnnw.
Mae Atodlenni 1 a 2 yn amnewid y ffurflenni hysbysu yn Atodlenni 1 a 2 i’r Gorchymyn Gweithdrefn er mwyn ystyried y ffaith y caniateir i benderfyniadau ynghylch cydsyniadau sy’n gysylltiedig â datblygu llinellau trydan uwchben penodol gael eu cymryd gan berson a benodir gan Weinidogion Cymru at y diben hwnnw.
Mae Atodlen 3 yn diwygio Atodlen 5 i’r Gorchymyn Gweithdrefn. Effaith y diwygiadau hynny yw diwygio’r gofynion mewn cysylltiad â’r ymgyngoreion arbenigol y mae’n rhaid i Weinidogion Cymru, o dan erthygl 22 o’r Gorchymyn hwnnw, ymgynghori â hwy cyn rhoi caniatâd cynllunio.
Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Gorchymyn hwn. O ganlyniad, ystyriwyd nad oedd yn angenrheidiol cynnal Asesiad Effaith Rheoleiddiol o’r costau a’r manteision sy’n debygol o ddeillio o gydymffurfio â’r Gorchymyn hwn.
1990 p. 8. Mewnosodwyd adran 61Z gan adran 17(3) o Ddeddf Cynllunio (Cymru) 2015 (dccc 4) (“Deddf 2015”). Mewnosodwyd adran 62R gan adran 25 o Ddeddf 2015. Diwygiwyd adran 333 gan: adran 78 o Ddeddf yr Amgylchedd 1995 (p. 25), a pharagraff 32(12) o Atodlen 10 iddi; adran 118(1) o Ddeddf Cynllunio a Phrynu Gorfodol 2004 (p. 5), a pharagraffau 1 a 4 o Atodlen 6 iddi; O.S. 2014/2773 (Cy. 280) ac adran 55 o Ddeddf 2015, a pharagraffau 3 a 6 o Atodlen 7 iddi. Mae diwygiadau eraill i adran 333 nad ydynt yn berthnasol i’r Gorchymyn hwn.
Diwygiwyd adran 59 gan adran 27 o Ddeddf 2015, a pharagraff 3 o Atodlen 4 iddi, a chan adran 55 o Ddeddf 2015, a pharagraff 5 o Atodlen 7 iddi, Mae diwygiadau eraill i adran 59 nad ydynt yn berthnasol i’r Gorchymyn hwn.
Trosglwyddwyd swyddogaethau’r Ysgrifennydd Gwladol i Gynulliad Cenedlaethol Cymru gan erthygl 2 o Orchymyn Cynulliad Cenedlaethol Cymru (Trosglwyddo Swyddogaethau) 1999 (O.S. 1999/672); gweler y cofnod yn Atodlen 1 ar gyfer Deddf Cynllunio Gwlad a Thref 1990. Trosglwyddwyd swyddogaethau Cynulliad Cenedlaethol Cymru i Weinidogion Cymru yn rhinwedd adran 162 o Ddeddf Llywodraeth Cymru 2006 (p. 32), a pharagraffau 30 a 32 o Atodlen 11 iddi.
O.S. 2016/55 (Cy. 25), a ddiwygiwyd gan O.S. 2017/567 (Cy. 136).
O.S. 2016/53 (Cy. 23), a ddiwygiwyd gan O.S. 2016/358 (Cy. 111) ac O.S. 2019/283 (Cy. 65).
Gweler http://whc.unesco.org/en/list.
Mae mapiau sy’n dangos parthau llifogydd ar gael oddi wrth Lywodraeth Cymru ar http://data.wales.gov.uk/apps/floodmapping.
Cylchlythyr Llywodraeth Cymru: 07/2012.