Rheoliadau Adeiladu (Diwygio) (Cymru) 2019

NODYN ESBONIADOL

(Nid yw’r nodyn hwn yn rhan o’r Rheoliadau)

Mae’r Rheoliadau hyn yn diwygio Rheoliadau Adeiladu 2010 (“Rheoliadau 2010”).

Mae rheoliad 2(2) yn mewnosod diffiniadau o “external wall” a “specified attachment” yn rheoliad 2 (dehongli).

Mae rheoliad 2(3) yn diwygio rheoliad 4(2) (gofynion sy’n ymwneud â gwaith adeiladu) i egluro’r modd y mae’n gymwys i ofynion rheoliad 7 (fel y’i diwygiwyd).

Mae rheoliad 2(4) a (5) yn diwygio rheoliad 5 (ystyr newid defnydd sylweddol) a 6 (gofynion sy’n ymwneud â newid defnydd sylweddol) yn y drefn honno i ddarparu ar gyfer cyflwyno gofyniad newydd ar gyfer y deunyddiau sydd wedi eu cynnwys mewn wal allanol neu atodyn penodedig i adeilad sydd, ar ôl newid defnydd, yn cael ei ddefnyddio fel adeilad a ddisgrifir yn y rheoliad 7(4) newydd. Rhaid i’r deunyddiau hynny sicrhau Dosbarthiad Ewropeaidd A2-s1, d0 neu A1.

Mae rheoliad 2(6) yn diwygio rheoliad 7 i ddarparu, yn ddarostyngedig i’r eitemau esempt yn y rheoliad 7(3) newydd, mai dim ond deunyddiau sy’n sicrhau Dosbarthiad Ewropeaidd A2-s1, d0 neu A1 a gaiff ddod yn rhan o wal allanol neu atodyn penodedig i adeilad perthnasol. Mae’r rheoliad 7(4) newydd yn darparu’r diffiniad o “relevant building”.

Mae rheoliad 2(7) yn gwneud diwygiadau i reoliad 37A i gywiro mân wallau.

Mae rheoliad 3 yn gwneud darpariaethau trosiannol fel na fydd y diwygiadau a wneir gan reoliad 2 yn gymwys pan fo hysbysiad adeiladu neu hysbysiad cychwynnol wedi ei roi i awdurdod lleol, neu pan fo cynlluniau llawn wedi eu hadneuo gydag awdurdod lleol, cyn 13 Ionawr 2020 a phan fo’r gwaith adeiladu eisoes wedi dechrau neu’n dechrau o fewn 8 wythnos i’r dyddiad hwnnw.

Hysbyswyd y Comisiwn Ewropeaidd am y Rheoliadau ar ffurf ddrafft (Hysbysiad Rhif 2019/0384/UK ar 30 Gorffennaf 2019) yn unol â Chyfarwyddeb (EU) 2015/1535 Senedd Ewrop a’r Cyngor (OJ Rhif L 241, 17.9.2015, t. 1), sy’n gosod gweithdrefn ar gyfer darparu gwybodaeth ym maes safonau technegol a rheoleiddio.

Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Rheoliadau hyn. O ganlyniad, lluniwyd asesiad effaith rheoleiddiol o’r costau a’r manteision sy’n debygol o ddeillio o gydymffurfio â’r Rheoliadau hyn. Gellir cael copi oddi wrth: Llywodraeth Cymru, Parc Cathays, Caerdydd, CF10 3NQ ac mae ar gael ar y wefan ar www.llyw.cymru.

Bydd copïau o’r Safon Brydeinig y mae’r Rheoliadau hyn yn cyfeirio ati ar gael i edrych arnynt yn rhad ac am ddim drwy gysylltu â’r Tîm Polisi Rheoliadau Adeiladu yn Llywodraeth Cymru yn y cyfeiriad uchod.