2018 Rhif 969 (Cy. 196)
Rheoliadau Trwyddedu Petrolewm (Ffioedd) (Cymru) 2018
Gwnaed
Gosodwyd gerbron Cynulliad Cenedlaethol Cymru
Yn dod i rym
Enwi, cychwyn a chymhwyso1
1
Enw’r Rheoliadau hyn yw Rheoliadau Trwyddedu Petrolewm (Ffioedd) (Cymru) 2018 a deuant i rym ar 1 Hydref 2018.
2
Mae’r Rheoliadau hyn yn gymwys o ran Cymru.
Dehongli2
Yn y Rheoliadau hyn—
ystyr “atal ffynnon dros dro” (“well suspension”) yw atal defnyddio ffynnon dros dro fel y gellir ei hailddefnyddio at ddiben drilio neu waith arall;
ystyr “cynnig ardal ddatblygu” (“development area proposal”) yw cynnig a gyflwynir yn unol â thrwydded datblygu a fforio petrolewm sy’n diffinio’r lleoliadau daearyddol o fewn maes petrolewm pan fo’r trwyddedai yn cynnig gwneud gwaith datblygu a chynhyrchu gan gynnwys, pan fo’n berthnasol, cynllun sy’n nodi’r gweithgareddau i’w gwneud;
ystyr “cynnig ardal gadw” (“retention area proposal”) yw cynnig a gyflwynir yn unol â thrwydded datblygu a fforio petrolewm sy’n diffinio lleoliadau daearyddol pan fo’r trwyddedai yn cynnig gwneud gweithgareddau fforio a gwerthuso;
mae “ffynnon” (“well”) yn cynnwys twll turio;
ystyr “gweithredwr” (“operator”) yw person sydd wedi ei benodi’n weithredwr gosod, yn weithredwr ffynnon neu’r ddau;
ystyr “hysbysu” (“notify”) yw hysbysu’n ysgrifenedig;
ystyr “rhaglen ddatblygu a chynhyrchu” (“development and production programme”) yw rhaglen a gyflwynir yn unol â thrwydded petrolewm sy’n nodi’r mesurau y cynigir eu cymryd mewn cysylltiad â datblygu a chynhyrchu maes petrolewm;
ystyr “rhaglen waith” (“work programme”) yw rhaglen sydd wedi ei nodi mewn atodlen i drwydded petrolewm sy’n nodi’r archwiliadau sydd i’w cynnal yn ystod y tymor cychwynnol, gan gynnwys unrhyw arolwg daearegol drwy unrhyw ddull ffisegol neu gemegol ac unrhyw brofion drilio;
ystyr “Rheoliadau 2015” (“the 2015 Regulations”) yw Rheoliadau Trwyddedu Petrolewm (Ceisiadau) 20153;
mae i “trwydded datblygu a fforio petrolewm” yr ystyr a roddir i “petroleum exploration and development licence” yn rheoliad 2 o Reoliadau 2015;
mae i “trwydded draenio methan” yr ystyr a roddir i “methane drainage licence” yn rheoliad 2 o Reoliadau 2015;
mae i “trwydded fforio petrolewm tua’r tir” yr ystyr a roddir i “landward petroleum exploration licence” yn rheoliad 2 o Reoliadau 2015;
ystyr “trwydded petrolewm” (“petroleum licence”) yw trwydded a roddir o dan adran 3 o Ddeddf Petrolewm 1998 (chwilio am betrolewm, ei durio a chael gafael arno) neu o dan adran 2 o Ddeddf Petrolewm (Cynhyrchu) 1934 (trwyddedau i chwilio am betrolewm a chael gafael arno)4; ac
ystyr “trwyddedai” (“licensee”) yw deiliad trwydded petrolewm.
Y ffioedd sy’n daladwy ar gyfer cais am drwydded petrolewm3
Rhaid i berson sy’n gwneud cais i Weinidogion Cymru am drwydded petrolewm a restrir yng ngholofn gyntaf Tabl 1 dalu’r ffi gyfatebol yn ail golofn y tabl hwnnw.
Math o drwydded | Y ffi sy’n daladwy |
|---|---|
Trwydded fforio petrolewm tua’r tir | £500 |
Trwydded draenio methan | £50 |
Trwydded datblygu a fforio petrolewm | £1,400 |
Ffi am gydsyniad ar gyfer rhaglen ddatblygu a chynhyrchu4
1
Rhaid i drwyddedai sy’n gwneud cais i Weinidogion Cymru am gydsyniad ar gyfer rhaglen ddatblygu a chynhyrchu dalu ffi.
2
Mae swm y ffi sy’n daladwy o dan baragraff (1) yn cael ei bennu gan y fformiwla—
pan fo—
A yn nifer y diwrnodau; a
B yn nifer y swyddogion
sy’n ofynnol er mwyn gwneud penderfyniad ynghylch y cais.
3
Rhaid i’r ffi sy’n daladwy o dan baragraff (1) gael ei thalu o fewn 30 diwrnod i’r adeg y mae Gweinidogion Cymru yn hysbysu’r trwyddedai am y penderfyniad ynghylch y cais oni bai bod Gweinidogion Cymru yn hysbysu’r trwyddedai y caniateir i’r ffi gael ei thalu ar ddyddiad diweddarach.
4
Ym mharagraff (2), ystyr “swyddog” (“officer”) yw person a gymerir ymlaen gan Weinidogion Cymru, neu ar eu rhan, i gyflawni’r swyddogaeth y mae’r ffi berthnasol yn daladwy mewn cysylltiad â hi.
Y ffi sy’n daladwy am gydsyniad ar gyfer cynnig ardal gadw neu gynnig ardal ddatblygu5
1
Rhaid i drwyddedai sy’n gwneud cais i Weinidogion Cymru am gydsyniad ar gyfer cynnig ardal gadw neu gynnig ardal ddatblygu dalu ffi o £1068 os yw Gweinidogion Cymru yn rhoi cydsyniad.
2
Rhaid talu’r ffi sy’n daladwy o dan baragraff (1) o fewn 30 diwrnod i’r adeg y mae Gweinidogion Cymru yn hysbysu’r trwyddedai am y penderfyniad ynghylch y cais oni bai bod Gweinidogion Cymru yn hysbysu’r trwyddedai y caniateir i’r ffi gael ei thalu ar ddyddiad diweddarach.
Ffioedd penodedig sy’n daladwy am gydsyniadau eraill6
1
Rhaid i drwyddedai sy’n gwneud cais i Weinidogion Cymru am gydsyniad ar gyfer gweithgaredd neu fater a restrir yng ngholofn gyntaf Tabl 2 dalu’r ffi gyfatebol yn ail golofn y tabl hwnnw.
2
Yn ddarostyngedig i baragraff (3), rhaid talu’r ffi sy’n daladwy o dan baragraff (1) ar adeg gwneud y cais, oni bai bod Gweinidogion Cymru yn hysbysu’r trwyddedai y caniateir i’r ffi gael ei thalu ar ddyddiad diweddarach.
3
Mewn perthynas â’r gweithgareddau a restrir ym mharagraff (4), rhaid i’r ffi sy’n daladwy o dan baragraff (1) gael ei thalu o fewn 30 diwrnod i’r adeg y mae Gweinidogion Cymru yn hysbysu’r trwyddedai am y penderfyniad ynghylch y cais oni bai bod Gweinidogion Cymru yn hysbysu’r trwyddedai y caniateir i’r ffi gael ei thalu ar ddyddiad diweddarach.
4
Mae’r gweithgareddau fel a ganlyn—
a
cais am gydsyniad i estyn tymor cychwynnol, ail dymor neu dymor terfynol trwydded petrolewm;
b
cais am gydsyniad i ddiwygio rhaglen waith.
Gweithgaredd neu fater y mae cydsyniad yn ofynnol ar ei gyfer | Y ffi sy’n daladwy |
|---|---|
Drilio prif ffynnon | £729 |
Drilio ffynnon ddargyfeirio sy’n fforchio o’r brif ffynnon i leoliad targed gwahanol i’r brif ffynnon | £596 |
Gosod neu ailosod offer mewn ffynnon at ddiben galluogi cynhyrchu neu chwistrellu hydrocarbon | £566 |
Cael gafael ar betrolewm o ardal drwyddedig | £1,052 |
Newid cydsyniad er mwyn cael gafael ar betrolewm o ardal drwyddedig | £1,052 |
Llosgi neu awyru petrolewm o ffynnon | £765 |
Newid cydsyniad i losgi neu awyru petrolewm o ffynnon | £765 |
Atal ffynnon dros dro | £596 |
Ailddechrau defnyddio unrhyw ffynnon sydd wedi ei hatal dros dro | £566 |
Cefnu ar ffynnon yn barhaol | £566 |
Newid trwyddedai trwydded petrolewm | £401 |
Newid y buddiolwr hawliau a roddir gan drwydded petrolewm | £401 |
Penodi gweithredwr o dan drwydded petrolewm | £1,201 |
Estyn tymor cychwynnol, ail dymor neu dymor terfynol trwydded petrolewm | £1,000 |
Diwygio rhaglen waith | £1,000 |
Y ffi sy’n daladwy er mwyn pennu maes olew7
1
Rhaid i drwyddedai sy’n gwneud cais i Weinidogion Cymru am benderfyniad o dan Atodlen 1 i Ddeddf Trethu Olew 19755 (pennu meysydd olew) dalu ffi o £1,124.
2
Rhaid i’r ffi sy’n daladwy o dan baragraff (1) gael ei thalu o fewn 30 diwrnod i’r adeg y mae Gweinidogion Cymru yn hysbysu’r trwyddedai am y penderfyniad ynghylch y cais oni bai bod Gweinidogion Cymru yn hysbysu’r trwyddedai y caniateir i’r ffi gael ei thalu ar ddyddiad diweddarach.
Talu ffioedd8
1
Rhaid i ffi sy’n daladwy o dan y Rheoliadau hyn gael ei thalu yn y fath fodd ag y mae Gweinidogion Cymru yn ei bennu.
2
Nid yw ffi wedi ei thalu o dan y Rheoliadau hyn hyd nes bod Gweinidogion Cymru wedi cael swm cyfan y ffi mewn arian cliriedig.
3
Mae ffi sy’n ddyledus o dan y Rheoliadau hyn yn adferadwy fel dyled sifil.
(Nid yw’r nodyn hwn yn rhan o’r Rheoliadau)