Mae’r Rheoliadau hyn yn diwygio Rheoliadau Treth Trafodiadau Tir (Darpariaethau Trosiannol) (Cymru) 2018 er mwyn gwneud darpariaeth drosiannol bellach mewn cysylltiad ag achos penodol pan fo les cyfnod penodol yn parhau am gyfnod o fwy na blwyddyn ar ôl ei dyddiad terfynu contractiol (cyfnod a elwir yn gyfnod “dal drosodd”), ac yn cael ei hadnewyddu a’i hôl-ddyddio wedi hynny i ddiwrnod yn ystod y cyfnod dal drosodd.

Pan fo’r amodau ym mharagraff 8(1) o Atodlen 6 i Ddeddf Treth Trafodiadau Tir a Gwrthweithio Osgoi Trethi Datganoledig (Cymru) 2017 wedi eu bodloni, caiff y rhent sy’n daladwy o dan y les newydd ei ostwng at ddibenion y dreth trafodiadau tir gan swm y rhent trethadwy sy’n daladwy mewn cysylltiad â’r denantiaeth dal drosodd.

Mae’r diwygiad a wneir gan reoliad 2 yn sicrhau bod y gostyngiad sydd ar gael o dan baragraff 8(3) o’r Atodlen honno yn gymwys mewn cysylltiad â lesoedd a roddir cyn 1 Ebrill 2018 ond a adnewyddir ar y dyddiad hwnnw neu wedi hynny, er gwaethaf y ffaith bod treth dir y dreth stamp i’w chodi ar y rhent a oedd yn daladwy yn ystod y cyfnod dal drosodd.

Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Rheoliadau hyn. O ganlyniad, lluniwyd Asesiad Effaith Rheoleiddiol o’r costau a’r manteision sy’n debygol o ddeillio o gydymffurfio â’r Rheoliadau hyn. Gellir cael copi oddi wrth: Llywodraeth Cymru, Parc Cathays, Caerdydd, CF10 3NQ.