Rheoliadau Safonau Sootechnegol (Cymru) 2018

Offerynnau Statudol Cymru

2018 Rhif 1152 (Cy. 234)

Anifeiliaid, Cymru

Iechyd Anifeiliaid

Rheoliadau Safonau Sootechnegol (Cymru) 2018

Gwnaed

6 Tachwedd 2018

Gosodwyd gerbron Cynulliad Cenedlaethol Cymru

9 Tachwedd 20181 Rhagfyr 2018

Coming into force

1st December 2018

Mae Gweinidogion Cymru wedi eu dynodi(1) at ddibenion adran 2(2) o Ddeddf y Cymunedau Ewropeaidd 1972(2) mewn perthynas â pholisi amaethyddol cyffredin yr Undeb Ewropeaidd.

Mae Gweinidogion Cymru yn gwneud y Rheoliadau hyn o dan y pwerau a roddir gan adran 2(2) o Ddeddf y Cymunedau Ewropeaidd 1972(3) a pharagraff 1A o Atodlen 2 iddi.

Mae’r Rheoliadau hyn yn gwneud darpariaeth at ddiben a grybwyllir yn adran 2(2) o Ddeddf y Cymunedau Ewropeaidd 1972 ac mae’n ymddangos i Weinidogion Cymru ei bod yn hwylus dehongli’r cyfeiriadau at ddarpariaethau offerynnau’r UE yn y Rheoliadau hyn fel cyfeiriadau at y darpariaethau hynny fel y’u diwygir o bryd i’w gilydd.

Enwi, cymhwyso a chychwyn

1.—( 1) Enw’r Rheoliadau hyn yw Rheoliadau Safonau Sootechnegol (Cymru) 2018.

(2) Mae’r Rheoliadau hyn yn gymwys o ran Cymru.

(3) Daw’r Rheoliadau hyn i rym ar 1 Rhagfyr 2018.

Dehongli

2.—( 1) Yn y Rheoliadau hyn, ystyr “y Rheoliad Bridio Anifeiliaid” yw Rheoliad (EU) 2016/1012(4) Senedd Ewrop a’r Cyngor dyddiedig 8 Mehefin 2016 ar amodau sootechnegol ac achyddol ar gyfer bridio a masnachu anifeiliaid bridio o frid pur, moch bridio hybrid a’u cynhyrchion cenhedlol, a dod â hwy i’r Undeb, ac sy’n diwygio Rheoliad (EU) Rhif 652/2014, Cyfarwyddebau’r Cyngor 89/608/EEC a 90/425/EEC ac yn diddymu actau penodol ym maes bridio anifeiliaid.

(2) Mae i ymadroddion nad ydynt wedi eu diffinio yn y Rheoliadau hyn ac y mae’r ymadroddion Saesneg cyfatebol yn digwydd yn y Rheoliad Bridio Anifeiliaid yr un ystyr yn y Rheoliadau hyn ag sydd gan yr ymadroddion Saesneg cyfatebol at ddibenion y Rheoliad Bridio Anifeiliaid.

Yr awdurdod cymwys

3.   Gweinidogion Cymru yw’r awdurdod cymwys at ddibenion y Rheoliad Bridio Anifeiliaid.

Gorfodi

4.   Gorfodir y Rheoliad Bridio Anifeiliaid gan yr awdurdod cymwys.

Hysbysiadau

5.—( 1) Caniateir i unrhyw hysbysiad sydd i’w gyflwyno o dan y Rheoliad Bridio Anifeiliaid gael ei anfon at y gweithredwr—

(a) drwy’r post; neu

(b) yn electronig,

i’r cyfeiriad post neu’r cyfeiriad electronig a ddarperir gan y gweithredwr i’r awdurdod cymwys.

(2) Os anfonir yr hysbysiad yn electronig at y gweithredwr, nid yw ond i’w drin fel pe bai wedi cael ei roi—

(a) os yw’r gweithredwr wedi mynegi i’r awdurdod cymwys ei barodrwydd i gael hysbysiad drwy gyfrwng electronig a’i fod wedi darparu cyfeiriad sy’n addas at y diben hwnnw; a

(b) os anfonwyd yr hysbysiad i’r cyfeiriad hwnnw.

Rhwymedigaeth i hysbysu’r awdurdod cymwys am newid i fanylion cyswllt

6.—( 1) Mae’r rheoliad hwn yn gymwys pan fo manylion cyswllt gweithredwr yn newid.

(2) Yn ddarostyngedig i baragraff (3), rhaid i’r gweithredwr hysbysu’r awdurdod cymwys fod ei fanylion cyswllt wedi newid yn ddim hwyrach na 10 diwrnod gwaith ar ôl y newid, a bydd y cyfnod hwnnw o 10 diwrnod yn dechrau â’r diwrnod y mae’r newid yn digwydd.

(3) Rhaid i hysbysiad a roddir o dan y rheoliad hwn gael ei anfon i’r awdurdod cymwys yn y cyfeiriad penodedig.

(4) Yn y rheoliad hwn, ystyr “cyfeiriad penodedig” yw’r cyfeiriad post neu’r cyfeiriad electronig a roddir gan Weinidogion Cymru o bryd i’w gilydd at ddibenion y rheoliad hwn.

Cosbau

7.   Pan fo gweithredwr yn torri rhwymedigaeth o dan y Rheoliad Bridio Anifeiliaid neu o dan y Rheoliadau hyn, bydd yr awdurdod cymwys yn ymdrin â’r toriad hwnnw yn unol â’r darpariaethau yn Erthygl 47 o’r Rheoliad Bridio Anifeiliaid.

Adolygiad mewn cysylltiad â phenderfyniad a wnaed o dan Erthygl 47 o’r Rheoliad Bridio Anifeiliaid

8.—( 1) Pan fo’r awdurdod cymwys wedi rhoi hysbysiad i gymdeithas y brid neu weithrediad bridio o dan Erthygl 47(2)(a) o’r Rheoliad Bridio Anifeiliaid mewn cysylltiad â phenderfyniad i dynnu yn ôl gydnabyddiaeth cymdeithas y brid neu’r gweithrediad bridio a roddwyd yn unol ag Erthygl 4(3) o’r Rheoliad hwnnw, caiff cymdeithas y brid neu’r gweithrediad bridio hwnnw wneud cais i’r awdurdod cymwys ailystyried y penderfyniad a roddwyd yn yr hysbysiad hwnnw.

(2) Rhaid i gais o dan baragraff (1)—

(a) cael ei wneud gan gymdeithas y brid neu’r gweithrediad bridio o fewn y cyfnod o 28 o ddiwrnodau sy’n dechrau â’r diwrnod y cyflwynir yr hysbysiad perthnasol; a

(b) nodi’r rhesymau dros wneud y cais a chael ei gyflwyno gyda’r dystiolaeth honno y mae cymdeithas y brid neu’r gweithrediad bridio yn credu ei bod yn ategu’r rhesymau hynny.

(3) Caiff yr awdurdod cymwys ofyn am dystiolaeth gan gymdeithas y brid neu’r gweithrediad bridio i ategu’r cais.

(4) Rhaid i’r awdurdod cymwys, cyn gynted ag y bo’n rhesymol ymarferol—

(a) ystyried y cais a gwneud penderfyniad mewn cysylltiad ag ef;

(b) rhoi hysbysiad ysgrifenedig i gymdeithas y brid neu’r gweithrediad bridio yn nodi a yw’r penderfyniad wedi ei gadarnhau neu ei wrthdroi; ac

(c) os caiff y penderfyniad ei wrthdroi, cymryd y camau priodol mewn cysylltiad â’r penderfyniad a gafodd ei wrthdroi.

(5) Nid yw argaeledd adolygiad o dan y rheoliad hwn yn atal hysbysiad a ddisgrifir ym mharagraff (1) rhag cael effaith yn syth ar ôl ei gyflwyno.

Diwygio Rheoliadau’r Fasnach mewn Anifeiliaid a Chynhyrchion Perthynol (Cymru) 2011

9.—( 1) Mae Rheoliadau’r Fasnach mewn Anifeiliaid a Chynhyrchion Perthynol (Cymru) 2011(5) wedi eu diwygio fel a ganlyn.

(2) Yn rheoliad 15(1) (gweithdrefn wrth fewnforio), ar ôl is-baragraff (c) mewnosoder—

“(ch) y gwiriadau sy’n ofynnol gan Erthygl 37(1) o Reoliad (EU) 2016/1012 Senedd Ewrop a’r Cyngor dyddiedig 8 Mehefin 2016 ar amodau sootechnegol ac achyddol ar gyfer bridio a masnachu anifeiliaid bridio o frid pur, moch bridio hybrid a’u cynhyrchion cenhedlol, a dod â hwy i’r Undeb, ac sy’n diwygio Rheoliad (EU) Rhif 652/2014, Cyfarwyddebau’r Cyngor 89/608/EEC a 90/425/EEC ac yn diddymu actau penodol ym maes bridio anifeiliaid.”

(3) Yn Atodlen 1 (Deddfwriaeth yr Undeb Ewropeaidd), ar y diwedd mewnosoder—

“Rheoliad (EU) 2016/1012 Senedd Ewrop a’r Cyngor dyddiedig 8 Mehefin 2016 ar amodau sootechnegol ac achyddol ar gyfer bridio a masnachu anifeiliaid bridio o frid pur, moch bridio hybrid a’u cynhyrchion cenhedlol, a dod â hwy i’r Undeb

Anifeiliaid bridio o frid pur, moch bridio hybrid a’u cynhyrchion cenhedlol”.

Dirymiadau

10.   Mae’r Rheoliadau a ganlyn wedi eu dirymu—

(a) Rheoliadau Ceffylau (Safonau Sootechnegol) (Cymru) 2006(6); a

(b) Rheoliadau Safonau Sootechnegol (Cymru) 2015(7).

Lesley Griffiths

Ysgrifennydd y Cabinet dros Ynni, Cynllunio a Materion Gwledig, un o Weinidogion Cymru

6 Tachwedd 2018

NODYN ESBONIADOL

(Nid yw’r nodyn hwn yn rhan o’r Rheoliadau)

Mae’r Rheoliadau hyn yn ychwanegu at Reoliad (EU) 2016/1012 Senedd Ewrop a’r Cyngor ar amodau sootechnegol ac achyddol ar gyfer bridio a masnachu anifeiliaid bridio o frid pur, moch bridio hybrid a’u cynhyrchion cenhedlol, a dod â hwy i’r Undeb, (“y Rheoliad Bridio Anifeiliaid”) ac yn gwneud darpariaeth ar gyfer ei orfodi.

Mae’r Rheoliadau hyn yn dirymu ac yn disodli Rheoliadau Ceffylau (Safonau Sootechnegol) (Cymru) 2006 a Rheoliadau Safonau Sootechnegol (Cymru) 2015. Maent hefyd yn diwygio Rheoliadau’r Fasnach mewn Anifeiliaid a Chynhyrchion Perthynol (Cymru) 2011 i wneud darpariaeth mewn cysylltiad â gwiriadau ffiniau o dan amgylchiadau penodol a ragwelir gan y Rheoliad Bridio Anifeiliaid.

Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Rheoliadau hyn. O ganlyniad, ystyriwyd nad oedd yn angenrheidiol cynnal asesiad effaith rheoleiddiol o’r costau a’r manteision sy’n debygol o ddeillio o gydymffurfio â’r Rheoliadau hyn.

(1)

O.S. 2010/2690.

(2)

1972 p. 68.

(3)

Mewnosodwyd paragraff 1A o Atodlen 2 gan adran 28 o Ddeddf Diwygio Deddfwriaethol a Rheoleiddiol 2006 (p. 51).

(4)

OJ Rhif L 171, 29.06.2016, t. 66. Gweler hefyd Reoliad Gweithredu’r Comisiwn (EU) 2017/716 sy’n gwneud darpariaeth mewn cysylltiad â’r ffurfiau enghreifftiol sydd i’w defnyddio ar gyfer yr wybodaeth sydd i’w chynnwys yn y rhestrau o gymdeithasau brid cydnabyddedig a gweithrediadau bridio; Rheoliad Gweithredu’r Comisiwn (EU) 2017/717 sy’n gosod rheolau ar gyfer cymhwyso Rheoliad (EU) 2016/1012 o ran ffurfiau enghreifftiol tystysgrifau sootechnegol ar gyfer anifeiliaid bridio a’u cynhyrchion cenhedlol; a Rheoliad Dirprwyedig y Comisiwn (EU) 2017/1940 o ran cynnwys a ffurf tystysgrifau sootechnegol a ddyroddir ar gyfer anifeiliaid bridio o frid pur o’r rhywogaeth equine a gynhwysir mewn un ddogfen adnabod gydol oes ar gyfer equidae.

(5)

O.S. 2011/2379 (Cy. 252), a ddiwygiwyd gan O.S. 2014/3158.

(6)

O.S. 2006/2607 (Cy. 220).

(7)

O.S. 2015/1686 (Cy. 218).