Rheoliadau Cynllunio Gofal, Lleoli ac Adolygu Achosion (Cymru) (Diwygio) 2018

Offerynnau Statudol Cymru

2018 Rhif 111 (Cy. 26)

Plant A Phobl Ifanc, Cymru

Rheoliadau Cynllunio Gofal, Lleoli ac Adolygu Achosion (Cymru) (Diwygio) 2018

Gwnaed

29 Ionawr 2018

Gosodwyd gerbron Cynulliad Cenedlaethol Cymru

2 Chwefror 2018

Yn dod i rym

2 Ebrill 2018

Mae Gweinidogion Cymru, drwy arfer y pwerau a roddir gan adrannau 81(6)(d), 84(f), 87, 107(8) a 196(2) o Ddeddf Gwasanaethau Cymdeithasol a Llesiant (Cymru) 2014(1), yn gwneud y Rheoliadau a ganlyn:

Enwi a chychwyn

1.—( 1) Enw’r Rheoliadau hyn yw Rheoliadau Cynllunio Gofal, Lleoli ac Adolygu Achosion (Cymru) (Diwygio) 2018.

(2) Daw’r Rheoliadau hyn i rym ar 2 Ebrill 2018.

Diwygio Rheoliadau Cynllunio Gofal, Lleoli ac Adolygu Achosion (Cymru) 2015

2.—( 1) Mae rheoliad 12 (penderfyniad lleoli) o Reoliadau Cynllunio Gofal, Lleoli ac Adolygu Achosion (Cymru) 2015(2) wedi ei ddiwygio yn unol â’r rheoliad hwn.

(2) Ym mharagraff (6)(b) hepgorer “ddim hwyrach na 5 diwrnod gwaith ar ôl gwneud y lleoliad”.

(3) Ym mharagraff (8), yn lle’r diffiniad o “hysbysu” rhodder—

““ystyr “hysbysu” (“notified”) ym mharagraff (6)(b) yw fod rhaid i’r awdurdod cyfrifol ddarparu—

(a)

ddim hwyrach na 24 awr ar ôl gwneud y lleoliad—

(i)

enw a dyddiad geni C,

(ii)

cadarnhad ynghylch a yw C yn derbyn gofal gan yr awdurdod lleol ar sail wirfoddol(3) neu o dan orchymyn gofal(4),

(iii)

manylion am unrhyw un neu ragor o’r gorchmynion a ganlyn sydd wedi eu gwneud mewn perthynas ag C ac sy’n parhau mewn grym—

(aa)

unrhyw orchymyn a wnaed o dan Ddeddf Plant 1989(5),

(bb)

gorchymyn adsefydlu ieuenctid, gofyniad preswylio awdurdod lleol neu orchymyn adsefydlu ieuenctid â maethu(6),

(cc)

gorchymyn goruchwylio gorfodol neu orchymyn goruchwylio gorfodol interim(7), a

(iv)

manylion am unrhyw ffactorau amddiffyn plant neu ffactorau risg sylweddol sy’n ymwneud ag C, gan gynnwys unrhyw berygl o gamfanteisio’n rhywiol ar blant, materion iechyd corfforol neu iechyd meddwl, hanes o ddianc a/neu ymwneud ag asiantaethau cyfiawnder ieuenctid, ond heb fod yn gyfyngedig i’r ffactorau hynny; a

(b)

ddim hwyrach na 5 diwrnod gwaith ar ôl gwneud y lleoliad—

(i)

manylion o’i asesiad o anghenion C a’r rhesymau pam yr ystyrir mai’r lleoliad a ddewiswyd yw’r ffordd fwyaf priodol o ddiwallu anghenion C, a

(ii)

copi o gynllun gofal a chymorth C os na ddarparwyd copi ohono eisoes;”.

Huw Irranca-Davies

Y Gweinidog Gofal Cymdeithasol a Phlant, o dan awdurdod Ysgrifennydd y Cabinet dros Iechyd a Gwasanaethau Cymdeithasol, un o Weinidogion Cymru

29 Ionawr 2018

NODYN ESBONIADOL

(Nid ywʼr nodyn hwn yn rhan oʼr Rheoliadau)

Mae’r Rheoliadau hyn yn diwygio Rheoliadau Cynllunio Gofal, Lleoli ac Adolygu Achosion (Cymru) 2015 (“Rheoliadau 2015”).

Mae Rhan 3 o Reoliadau 2015 yn cynnwys darpariaethau cyffredinol ynghylch lleoli plentyn sy’n derbyn gofal, gyda rheoliad 12 yn gwneud darpariaeth benodol mewn perthynas â lleoliadau y tu allan i’r ardal.

Mae rheoliad 2 o’r Rheoliadau hyn yn ychwanegu at yr wybodaeth y mae rhaid i’r awdurdod cyfrifol ei hysbysu i’r awdurdod lleol y tu allan i’r ardal neu’r awdurdod lleol yn Lloegr y lleolwyd y plentyn yn ei ardal o dan reoliad 12(8) o Reoliadau 2015, ac y mae rhaid ei chyflenwi ddim hwyrach na 24 awr ar ôl gwneud y lleoliad.

Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Rheoliadau hyn. O ganlyniad, ystyriwyd nad oedd yn angenrheidiol cynnal asesiad effaith rheoleiddiol o’r costau a’r manteision sy’n debygol o ddeillio o gydymffurfio â’r Rheoliadau hyn.

(1)

2014 dccc 4.

(2)

O.S. 2015/1818 (Cy. 261), y mae diwygiadau iddo nad ydynt yn berthnasol i’r Rheoliadau hyn.

(3)

Gweler adran 76 o Ddeddf Gwasanaethau Cymdeithasol a Llesiant (Cymru) 2014.

(4)

Gweler adran 31(11) o Ddeddf Plant 1989 (p. 41).

(5)

1989 p. 41.

(6)

Gweler adran 7 o Ddeddf Cyfiawnder Troseddol a Mewnfudo 2008 (p. 4).

(7)

Gweler adrannau 83 a 86 o Ddeddf Gwrandawiadau Plant (Yr Alban) 2011 (dsa 1).