Rheoliadau Deintyddiaeth Breifat (Cymru) 2017

RHAN 3 Rhedeg Practis Deintyddol Preifat

PENNOD 1 Ansawdd y Gwasanaethau a Ddarperir

Ansawdd y driniaeth a’r gwasanaethau eraill a ddarperir

13.—( 1) Yn ddarostyngedig i reoliad 5(4) (datganiad o ddiben), rhaid i’r person cofrestredig ddarparu unrhyw driniaeth a gwasanaethau eraill i gleifion yn unol â’r datganiad o ddiben a rhaid iddo sicrhau bod unrhyw driniaeth a gwasanaethau eraill a ddarperir i bob claf—

(a) yn diwallu anghenion unigol y claf; a

(b) yn sicrhau lles a diogelwch y claf.

(2) Rhaid i’r person cofrestredig sicrhau—

(a) bod yr holl gyfarpar a ddefnyddir yn, neu at ddibenion, y practis deintyddol preifat yn ddiogel ac mewn cyflwr da ac yn addas at y diben y mae i gael ei ddefnyddio ar ei gyfer; a

(b) bod staff wedi eu hyfforddi’n ddigonol i ddefnyddio unrhyw gyfarpar (gan gynnwys dyfeisiau meddygol a systemau diagnostig) y mae’n ofynnol iddynt ei ddefnyddio yn, neu at ddibenion, y practis deintyddol preifat.

(3) Pan fo dyfeisiau meddygol amldro yn cael eu defnyddio mewn practis deintyddol preifat, rhaid i’r person cofrestredig sicrhau—

(a) bod dyfeisiau o’r fath yn cael eu trin yn ddiogel;

(b) bod gweithdrefnau priodol yn cael eu gweithredu mewn perthynas â glanhau, diheintio, arolygu, pecynnu, sterileiddio, cludo a storio dyfeisiau o’r fath; ac

(c) bod trefniadau priodol yn eu lle ar gyfer delio’n ddi-oed ag unrhyw fethiant o ran dyfais neu system.

(4) Rhaid i’r person cofrestredig amddiffyn cleifion rhag y risgiau sy’n gysylltiedig â defnyddio a rheoli meddyginiaethau yn anniogel, drwy—

(a) gwneud trefniadau priodol ar gyfer cael, cofnodi, trin, defnyddio, cadw’n ddiogel, gweinyddu, rhoi a gwaredu’n ddiogel feddyginiaethau a ddefnyddir yn, neu at ddibenion, y practis deintyddol preifat;

(b) rhoi sylw i unrhyw ganllawiau a ddyroddir gan yr awdurdod cofrestru neu gan gorff arbenigol priodol mewn perthynas â thrin a defnyddio meddyginiaethau yn ddiogel;

(c) sicrhau bod deintyddion a phroffesiynolion gofal deintyddol wedi eu cymhwyso a’u hyfforddi i ragnodi a rhoi meddyginiaethau o fewn eu cwmpas ymarfer;

(d) sicrhau bod gan gleifion a staff fynediad at gyngor a gwybodaeth am feddyginiaethau a ddefnyddir yn, neu at ddibenion, y practis deintyddol preifat; ac

(e) sicrhau yr adroddir ar bob digwyddiad andwyol sy’n ymwneud â chyffuriau.

(5) Rhaid i’r person cofrestredig, i’r graddau y mae’n rhesymol ymarferol, sicrhau bod y personau a ganlyn yn cael eu hamddiffyn rhag y risgiau adnabyddadwy o gael haint sy’n gysylltiedig â gofal iechyd drwy’r dulliau a bennir ym mharagraff (6)—

(a) cleifion; a

(b) eraill a all fod yn wynebu risg o ddod i gysylltiad â haint o’r fath sy’n deillio o weithio mewn, neu at ddibenion, practis deintyddol preifat.

(6) Y dulliau y cyfeirir atynt ym mharagraff (5) yw—

(a) gweithrediad effeithiol systemau a ddyluniwyd i asesu’r risg o gael haint sy’n gysylltiedig â gofal iechyd ac atal, canfod a rheoli lledaeniad haint o’r fath;

(b) cynnal safonau priodol o lanweithdra a hylendid mewn perthynas ag—

(i) y mangreoedd a ddefnyddir at ddiben cynnal y practis deintyddol preifat;

(ii) cyfarpar a dyfeisiau meddygol amldro a ddefnyddir at ddiben cynnal y practis deintyddol preifat; a

(iii) deunyddiau sydd i gael eu defnyddio wrth drin defnyddwyr gwasanaethau, pan fo risg y gall deunyddiau o’r fath gael eu halogi; ac

(c) sicrhau bod system effeithiol yn cael ei gweithredu er mwyn sicrhau bod pob aelod o staff wedi cwblhau’n llwyddiannus—

(i) gwiriadau iechyd safonol; a

(ii) gwiriadau iechyd ychwanegol pan fydd staff yn gwneud triniaethau a all arwain at gysylltiad.

(7) Rhaid i’r person cofrestredig roi sylw i’r canllawiau presennol a gyhoeddwyd gan Weinidogion Cymru(1) wrth weithredu’r system y cyfeirir ati ym mharagraff (6)(c).

(8) Rhaid i’r person cofrestredig ystyried unrhyw gyngor sy’n ymwneud â’r math o driniaeth y mae’r practis deintyddol preifat yn ei ddarparu ac sy’n ymwneud â gwybodaeth am ddiogelwch cleifion a gyhoeddir gan gyrff arbenigol rheoleiddiol, proffesiynol neu statudol cydnabyddedig.

(9) Rhaid i’r person cofrestredig sicrhau—

(a) bod cleifion yn cael gwybodaeth amserol a hygyrch am eu cyflwr, eu gofal, eu meddyginiaeth, eu triniaeth a’u trefniadau cymorth;

(b) bod cleifion yn cael cyfleoedd i drafod yr opsiynau sydd ar gael mewn perthynas â’u meddyginiaeth (os oes meddyginiaeth), eu triniaeth a’u cymorth a chytuno ar yr opsiynau hynny;

(c) bod gwybodaeth am gleifion yn cael ei thrin yn gyfrinachol; a

(d) bod cydsyniad dilys yn cael ei roi i’r driniaeth.

Diogelu cleifion

14.—( 1) Rhaid i’r person cofrestredig wneud trefniadau addas i sicrhau bod cleifion yn cael eu diogelu rhag y risg o gael eu cam-drin a’u trin yn amhriodol drwy—

(a) sicrhau bod staff yn ymwybodol o’r angen i ddiogelu plant ac oedolion sy’n wynebu risg(2) a’u bod yn gyfarwydd ag unrhyw weithdrefnau cenedlaethol ar gyfer amddiffyn plant ac oedolion sy’n wynebu risg;

(b) sicrhau bod staff wedi eu hyfforddi’n briodol mewn materion diogelu gan gynnwys amddiffyn plant ac oedolion sy’n wynebu risg;

(c) sicrhau bod staff yn gwybod â phwy i gysylltu yn lleol os bydd pryder sy’n ymwneud ag amddiffyn plant ac oedolion sy’n wynebu risg;

(d) cymryd camau rhesymol i nodi’r posibilrwydd o gam-drin ac ymateb yn briodol i unrhyw honiadau o gam-drin; ac

(e) sicrhau bod gan staff fynediad at gymorth a’r canllawiau diweddaraf os bydd pryder ynghylch lles a diogelwch plentyn neu oedolyn sy’n wynebu risg.

(2) Wrth wneud y trefniadau y cyfeirir atynt ym mharagraff (1), rhaid i’r person cofrestredig roi sylw i unrhyw ganllawiau a ddyroddir gan yr awdurdod cofrestru neu’r corff arbenigol priodol mewn perthynas ag amddiffyn plant ac oedolion sy’n wynebu risg.

Preifatrwydd, urddas a pherthnasau

15.—( 1) Rhaid i’r person cofrestredig wneud trefniadau addas i sicrhau bod y practis deintyddol preifat yn cael ei redeg mewn ffordd sy’n parchu preifatrwydd ac urddas cleifion.

(2) Wrth wneud y trefniadau y cyfeirir atynt ym mharagraff (1), rhaid i’r person cofrestredig roi sylw i’r nodweddion gwarchodedig a nodir yn Neddf Cydraddoldeb 2010(3).

(3) Rhaid i’r darparwr cofrestredig a’r rheolwr cofrestredig (os oes un) gymryd pob cam rhesymol i sicrhau bod y practis deintyddol preifat yn cael ei redeg ar sail perthnasau personol a phroffesiynol da—

(a) rhwng y naill a’r llall;

(b) rhyngddynt hwy ac aelodau’r staff; ac

(c) rhwng pob un sy’n cael ei gyflogi yn, neu at ddibenion, y practis deintyddol preifat a’r cleifion.

Asesu a monitro ansawdd y gwasanaethau a ddarperir gan gynnwys ffurflenni blynyddol

16.—( 1) Rhaid i’r person cofrestredig—

(a) asesu a monitro’n rheolaidd ansawdd y gwasanaethau a ddarperir wrth gynnal y practis yn erbyn y gofynion a nodir yn y Rheoliadau hyn; a

(b) nodi, asesu a rheoli risgiau sy’n ymwneud ag iechyd, lles a diogelwch staff a chleifion.

(2) At ddibenion paragraff (1), rhaid i’r person cofrestredig—

(a) pan fo’n briodol, gael cyngor proffesiynol perthnasol;

(b) rhoi sylw i—

(i) yr wybodaeth sydd wedi ei chynnwys yn y cofnodion y cyfeirir atynt yn rheoliad 20 (cofnodion);

(ii) y sylwadau a’r cwynion a wneir, a’r safbwyntiau (gan gynnwys y disgrifiadau o’u profiadau o ofal a thriniaeth) a fynegir gan gleifion yn unol ag is-baragraff (c) a rheoliad 21 (cwynion);

(iii) unrhyw ymchwiliad a gynhelir gan y person cofrestredig mewn perthynas ag ymddygiad person a gyflogir at ddiben cynnal y practis deintyddol preifat; a

(iv) adroddiadau a lunnir gan yr awdurdod cofrestru o bryd i’w gilydd yn unol ag adran 32(5) o’r Ddeddf (arolygiadau: atodol) mewn perthynas â’r practis deintyddol preifat;

(c) mynd ati’n rheolaidd i geisio safbwyntiau (gan gynnwys y disgrifiadau o’u profiadau o ofal a thriniaeth) cleifion a phersonau sydd wedi eu cyflogi yn, neu at ddibenion, y practis deintyddol preifat; a

(d) pan fo angen, gwneud newidiadau i gyflenwi gwasanaethau, triniaeth neu ofal a ddarperir er mwyn adlewyrchu—

(i) y dadansoddiad o ddigwyddiadau a achosodd, neu a oedd â’r potensial i achosi, niwed i glaf;

(ii) casgliadau’r adolygiadau lleol a chenedlaethol o wasanaethau, archwiliadau clinigol a gwaith ymchwil a gynhelir gan gyrff arbenigol priodol; a

(iii) safbwyntiau cleifion a phersonau sydd wedi eu cyflogi yn, neu at ddibenion, y practis deintyddol preifat.

(3) Rhaid i’r person cofrestredig, pan ofynnir iddo wneud hynny, anfon i swyddfa briodol yr awdurdod cofrestru ffurflen flynyddol sy’n nodi sut y mae’r person cofrestredig wedi bodloni gofynion paragraff (1), ynghyd ag unrhyw gynlluniau sydd gan y person cofrestredig ar gyfer gwella safon y gwasanaethau, y driniaeth a’r gofal a ddarperir i gleifion gyda golwg ar sicrhau eu hiechyd, eu lles a’u diogelwch.

(4) Rhaid i’r person cofrestredig gymryd camau rhesymol i sicrhau nad yw’r ffurflen flynyddol yn gamarweiniol nac yn anghywir.

(5) Rhaid i’r person cofrestredig gyflenwi’r ffurflen flynyddol i swyddfa briodol yr awdurdod cofrestru o fewn yr amserlen a fynnir gan yr awdurdod.

Staffio

17.—( 1) Rhaid i’r person cofrestredig, wedi rhoi sylw i natur y practis deintyddol preifat, y datganiad o ddiben a nifer y cleifion a’u hanghenion—

(a) sicrhau bod personau sydd â’r cymwysterau, y sgiliau a’r profiad addas bob amser yn gweithio yn, neu at ddibenion, y practis deintyddol preifat a bod eu niferoedd yn briodol ar gyfer iechyd, lles a diogelwch y cleifion; a

(b) sicrhau na fydd cyflogi unrhyw bersonau ar sail dros dro yn, neu at ddibenion, y practis deintyddol preifat yn rhwystro cleifion rhag cael parhad gofal sy’n rhesymol i ddiwallu eu hanghenion.

(2) Rhaid i’r person cofrestredig sicrhau bod pob deintydd neu broffesiynolyn gofal deintyddol sy’n gweithio yn, neu at ddibenion, y practis deintyddol preifat wedi ei gofrestru â’r Cyngor Deintyddol Cyffredinol.

(3) Rhaid i’r person cofrestredig sicrhau bod pob person a gyflogir yn, neu at ddibenion, y practis deintyddol preifat—

(a) yn cael ei hyfforddi a’i oruchwylio’n briodol;

(b) yn cael ei alluogi o bryd i’w gilydd i gael hyfforddiant pellach sy’n briodol i’w rôl;

(c) yn cael disgrifiad swydd sy’n amlinellu cyfrifoldebau’r person;

(d) â chontract ysgrifenedig; ac

(e) â mynediad at brosesau sy’n ei alluogi i fynegi pryderon, yn gyfrinachol a heb ragfarnu ei gyflogaeth, am unrhyw agwedd ar gyflenwi gwasanaethau, triniaeth neu reoli.

(4) Rhaid i’r person cofrestredig sicrhau bod pob person a gyflogir yn, neu at ddibenion, y practis meddygol preifat yn cael ei harfarnu’n rheolaidd ac yn briodol, a rhaid iddo gymryd unrhyw gamau angenrheidiol er mwyn ymdrin ag unrhyw agwedd—

(a) ar ymarfer clinigol deintydd neu broffesiynolyn gofal deintyddol; neu

(b) ar berfformiad aelod o staff nad yw’n ddeintydd nac yn broffesiynolyn gofal deintyddol,

y cafwyd ei bod yn anfoddhaol.

(5) Rhaid i’r person cofrestredig gymryd camau rhesymol i sicrhau bod unrhyw bersonau sy’n gweithio yn, neu at ddibenion, y practis deintyddol preifat, nad ydynt yn cael eu cyflogi gan y person cofrestredig ac nad yw paragraff (3) yn gymwys iddynt, yn cael eu goruchwylio’n briodol tra bônt yn cyflawni eu dyletswyddau, er mwyn sicrhau na pheryglir iechyd, lles a diogelwch y cleifion.

Addasrwydd gweithwyr

18.—( 1) Ni chaiff person cofrestredig—

(a) cyflogi person o dan gontract cyflogaeth i weithio mewn, neu at ddibenion, practis deintyddol preifat onid yw’r person hwnnw yn addas i wneud hynny; neu

(b) caniatáu i unrhyw berson arall weithio mewn, neu at ddibenion, practis deintyddol preifat onid yw’r person hwnnw yn addas i wneud hynny.

(2) At ddibenion paragraff (1) nid yw person yn addas i weithio yn, neu at ddibenion, y practis deintyddol preifat—

(a) onid yw’r person wedi ei gofrestru â’r Cyngor Deintyddol Cyffredinol, os yw’n ofynnol iddo wneud hynny;

(b) onid yw’r person yn addas o ran ei uniondeb ac o gymeriad da;

(c) onid oes gan y person y cymwysterau, y sgiliau a’r profiad angenrheidiol ar gyfer y gwaith y mae’r person hwnnw i’w wneud;

(d) onid yw’r person oherwydd ei iechyd, ar ôl i addasiadau rhesymol (os oes rhai) gael eu gwneud, yn gallu cyflawni tasgau sy’n rhan annatod o’r gwaith hwnnw yn briodol; ac

(e) onid oes wybodaeth neu ddogfennaeth lawn a boddhaol, yn ôl y digwydd, ar gael mewn perthynas â’r person mewn cysylltiad â phob un o’r materion a bennir yn Rhan 1 o Atodlen 3.

(3) Wrth asesu cymeriad unigolyn at ddibenion paragraff (2)(b), rhaid i’r materion a ystyrir gynnwys y rhai a restrir yn Rhan 2 o Atodlen 3.

Canllawiau ar gyfer deintyddion a phroffesiynolion gofal deintyddol

19.   Rhaid i’r person cofrestredig sicrhau bod unrhyw god moeseg neu god ymarfer proffesiynol a lunnir gan y Cyngor Deintyddol Cyffredinol yn cael ei roi ar gael yn y practis deintyddol preifat.

Cofnodion

20.—( 1) Rhaid i’r person cofrestredig sicrhau bod cofnod gofal deintyddol cynhwysfawr a gaiff fod ar ffurf bapur neu electronig yn cael ei gynnal mewn perthynas â phob claf—

(a) sy’n cynnwys—

(i) nodyn cyfredol a chywir o’r holl asesu, cynllunio triniaeth a thriniaeth a ddarperir i’r claf; a

(ii) hanes deintyddol y claf ac unrhyw hanes meddygol perthnasol ’a’r holl nodiadau eraill a lunnir gan ddeintydd neu broffesiynolyn gofal deintyddol ynghylch achos y claf; a

(b) bod y cofnod yn cael ei gadw am isafswm cyfnod o wyth mlynedd sy’n dechrau ar y dyddiad y daeth y driniaeth y mae’r cofnod yn cyfeirio ati i ben neu y cafodd y driniaeth honno ei therfynu.

(2) Rhaid i’r person cofrestredig sicrhau—

(a) bod cofnod gofal deintyddol person sydd ar hyn o bryd yn glaf yn cael ei gadw mewn lle diogel yn y fangre a ddefnyddir i gynnal y practis deintyddol preifat; a

(b) bod cofnod gofal deintyddol person nad yw’n glaf mwyach yn cael ei storio’n ddiogel (pa un ai yn y practis neu mewn man arall) a bod modd dod o hyd iddo pe bai angen.

(3) Pan fo practis deintyddol preifat yn peidio â gweithredu rhaid i’r person cofrestredig sicrhau bod y cofnodion a gynhelir yn unol â pharagraff (1) yn cael eu cadw’n ddiogel mewn man arall a rhaid iddo eu rhoi ar gael i’r awdurdod cofrestru edrych arnynt os bydd yr awdurdod yn gofyn amdanynt.

Cwynion

21.—( 1) Rhaid i’r person cofrestredig sefydlu a gweithredu’n effeithiol weithdrefn glir a hygyrch (“y weithdrefn gwyno”) ar gyfer ystyried cwynion a wneir i’r person cofrestredig gan glaf ac ymateb i’r cwynion hynny.

(2) Rhaid i’r person cofrestredig—

(a) sicrhau yr ymchwilir i unrhyw gŵyn a wneir o dan y weithdrefn gwyno;

(b) sicrhau bod camau angenrheidiol a chymesur yn cael eu cymryd mewn ymateb i unrhyw fethiant a nodir gan y gŵyn neu’r ymchwiliad; ac

(c) wrth weithredu’r weithdrefn gwyno, gymryd i ystyriaeth ddymuniadau a theimladau’r claf hyd y gellir eu canfod a pharchu preifatrwydd y claf gymaint ag y bo’n bosibl.

(3) Rhaid i’r person cofrestredig gyflenwi copi ysgrifenedig o’r weithdrefn gwyno ar gais i glaf ac unrhyw ddarpar glaf.

(4) Rhaid i’r copi ysgrifenedig o’r weithdrefn gwyno gynnwys—

(a) enw, cyfeiriad a rhif ffôn yr awdurdod cofrestru; a

(b) y weithdrefn (os oes un) y mae’r person cofrestredig wedi ei hysbysu amdani gan yr awdurdod cofrestru ar gyfer gwneud cwynion i’r awdurdod cofrestru ynghylch y practis deintyddol preifat.

(5) Rhaid i’r person cofrestredig gynnal cofnod o bob cwyn, gan gynnwys manylion yr ymchwiliadau a wneir, y canlyniad ac unrhyw gamau canlyniadol a gymerir, gan gynnwys a oes angen gweithredu i wella ansawdd y driniaeth neu’r gwasanaethau.

(6) Rhaid i’r person cofrestredig gyflenwi copïau o’r cofnodion a gynhelir o dan baragraff (5) i’r awdurdod cofrestru, ar ei gais, a hynny heb fod yn hwyrach nag 28 o ddiwrnodau sy’n dechrau ar y dyddiad ar ôl cael y cais.

PENNOD 2 Mangreoedd

Addasrwydd mangreoedd

22.—( 1) Ni chaiff y person cofrestredig ddefnyddio mangre i gynnal practis deintyddol preifat oni bai bod y fangre honno o ddyluniad a chynllun ffisegol sy’n addas at ddiben cyflawni’r nodau a’r amcanion a nodir yn y datganiad o ddiben.

(2) Rhaid i’r person cofrestredig sicrhau—

(a) bod y fangre yn darparu amgylchedd glân, diogel ac wedi ei ddiogelu;

(b) bod y fangre o adeiladwaith cadarn ac yn cael ei chadw mewn cyflwr da yn allanol ac yn fewnol; ac

(c) bod maint a chynllun y fangre yn addas at y dibenion y caiff ei defnyddio atynt a’i bod wedi ei chyfarparu a’i dodrefnu’n addas.

(3) Rhaid i’r person cofrestredig ddarparu’r canlynol ar gyfer cyflogeion—

(a) cyfleusterau at ddibenion newid; a

(b) cyfleusterau storio.

(4) Yn ddarostyngedig i baragraff (5) rhaid i’r person cofrestredig—

(a) cymryd rhagofalon digonol yn erbyn y risg o dân, gan gynnwys darparu a chynnal a chadw cyfarpar digonol i atal a chanfod tân;

(b) darparu dulliau digonol o ddianc os digwydd tân;

(c) gwneud trefniadau er mwyn i bersonau a gyflogir yn y practis deintyddol preifat gael hyfforddiant addas mewn atal tân;

(d) sicrhau, drwy gynnal driliau ac ymarferion tân fesul ysbaid addas, fod cyflogeion y practis deintyddol preifat yn ymwybodol o’r weithdrefn sydd i gael ei dilyn yn achos tân;

(e) adolygu rhagofalon tân, addasrwydd cyfarpar tân a’r weithdrefn sydd i gael ei dilyn yn achos tân fesul ysbaid nad yw’n hwy na deuddeng mis; ac

(f) llunio a chynnal asesiad risg diogelwch tân ysgrifenedig.

(5) Pan fo Gorchymyn Diwygio Rheoleiddio (Diogelwch Tân) 2005(4) yn gymwys i’r practis deintyddol preifat—

(a) nid yw paragraff (4) yn gymwys; a

(b) rhaid i’r person cofrestredig sicrhau y cydymffurfir â gofynion y Gorchymyn hwnnw, ac unrhyw reoliadau a wneir odano, ac eithrio erthygl 23 (dyletswyddau cyffredinol cyflogeion yn y gwaith), mewn cysylltiad â’r fangre a ddefnyddir at ddiben darparu gwasanaethau deintyddol preifat.

PENNOD 3 Rheoli

Ymweliadau gan ddarparwr cofrestredig â phractis deintyddol preifat

23.—( 1) Pan fo’r person cofrestredig yn unigolyn nad yw’n rheoli’r practis deintyddol preifat, rhaid i’r unigolyn hwnnw ymweld â’r fangre a ddefnyddir i gynnal y practis deintyddol preifat yn unol â’r rheoliad hwn.

(2) Pan fo’r darparwr cofrestredig yn sefydliad neu’n bartneriaeth, rhaid i’r canlynol ymweld â’r fangre a ddefnyddir i gynnal y practis deintyddol preifat yn unol â’r rheoliad hwn—

(a) yr unigolyn cyfrifol;

(b) un arall o’r cyfarwyddwyr neu, yn ôl y digwydd, y partneriaid, neu’r personau eraill sy’n gyfrifol am reoli’r sefydliad neu’r bartneriaeth; neu

(c) un o gyflogeion y sefydliad sydd â’r cymwysterau, y sgiliau a’r profiad priodol at y diben ac nad yw’n ymwneud yn uniongyrchol â rhedeg y practis deintyddol preifat.

(3) Rhaid gwneud ymweliadau o dan baragraff (1) neu (2) o leiaf bob deuddeng mis a chaniateir iddynt fod yn ddirybudd.

(4) Rhaid i’r person sy’n ymgymryd â’r ymweliad—

(a) cyf-weld ag unrhyw gyflogeion yr ymddengys ei bod yn angenrheidiol er mwyn ffurfio barn ynghylch safon y gofal, y driniaeth a’r gwasanaethau eraill a ddarperir yn, neu at ddibenion, y practis deintyddol preifat;

(b) arolygu’r fangre a ddefnyddir i gynnal y practis deintyddol preifat a chofnodion o unrhyw gwynion; ac

(c) llunio adroddiad ysgrifenedig ar y ffordd y mae’r practis deintyddol preifat yn cael ei redeg.

(5) Rhaid i’r darparwr cofrestredig gyflenwi copi o’r adroddiad y mae’n ofynnol ei wneud o dan baragraff (4)(c)—

(a) i’r rheolwr cofrestredig; ac

(b) yn achos ymweliad o dan baragraff (2)—

(i) pan fo’r darparwr cofrestredig yn sefydliad, i bob un o’r cyfarwyddwyr neu’r personau eraill sy’n gyfrifol am reoli’r sefydliad;

(ii) pan fo’r darparwr cofrestredig yn bartneriaeth, i bob un o’r partneriaid.

(6) Rhaid i’r darparwr cofrestredig, os yw’r awdurdod cofrestru yn gofyn felly, gyflenwi copi iddo o’r adroddiad y mae’n ofynnol ei wneud o dan baragraff (4)(c).

Sefyllfa ariannol

24.   Rhaid i’r darparwr cofrestredig gymryd pob cam rhesymol i gynnal y practis deintyddol preifat mewn modd sy’n debygol o sicrhau y bydd yn hyfyw yn ariannol at ddiben cyflawni’r nodau a’r amcanion a nodir yn ei ddatganiad o ddiben.

PENNOD 4 Hysbysiadau sydd i Gael eu Rhoi i’r Awdurdod Cofrestru

Hysbysu am ddigwyddiadau

25.—( 1) Rhaid i’r person cofrestredig roi hysbysiad i swyddfa briodol yr awdurdod cofrestru, cyn gynted ag y bo’n ymarferol gwneud hynny—

(a) am farwolaeth claf neu unrhyw anaf difrifol i glaf—

(i) yn ystod triniaeth a ddarperir yn, neu at ddibenion, y practis deintyddol preifat;

(ii) o ganlyniad i driniaeth a ddarperir yn y practis deintyddol preifat; neu

(iii) sydd fel arall ar fangre’r practis deintyddol preifat;

(b) am achos o unrhyw glefyd heintus sydd, ym marn unrhyw ddeintydd neu broffesiynolyn gofal deintyddol sy’n gweithio yn y practis, yn ddigon difrifol i roi hysbysiad yn ei gylch felly; neu

(c) am unrhyw honiad o gamymddwyn sy’n arwain at niwed gwirioneddol neu niwed posibl i glaf gan y person cofrestredig neu unrhyw berson a gyflogir yn, neu at ddibenion, y practis deintyddol preifat.

(2) Yn achos marwolaeth claf, rhaid i’r person cofrestredig hefyd hysbysu’r awdurdod cofrestru am ddyddiad, amser, rheswm (pan fo’n hysbys) ac amgylchiadau marwolaeth y claf.

(3) Rhaid i’r person cofrestredig gadw cofnod ysgrifenedig diogel o’r holl ddigwyddiadau a restrir yn is-baragraffau (a) i (c) o baragraff (1).

Hysbysiad o absenoldeb dros dro berson cofrestredig

26.—( 1) Pan fo—

(a) darparwr cofrestredig sy’n rheoli’r practis deintyddol preifat; neu

(b) rheolwr cofrestredig,

yn bwriadu bod yn absennol o’r practis deintyddol preifat am gyfnod parhaus o 28 o ddiwrnodau neu ragor, rhaid i’r person cofrestredig roi hysbysiad ysgrifenedig i swyddfa briodol yr awdurdod cofrestru.

(2) Ac eithrio yn achos argyfwng, rhaid i’r hysbysiad y cyfeirir ato ym mharagraff (1) gael ei roi heb fod yn hwyrach nag un mis cyn dechrau’r absenoldeb arfaethedig, neu o fewn unrhyw gyfnod byrrach y cytunir arno â’r awdurdod cofrestru a rhaid i’r hysbysiad bennu, mewn cysylltiad â’r absenoldeb—

(a) ei hyd neu ei hyd disgwyliedig;

(b) y rheswm drosto;

(c) y trefniadau sydd wedi eu gwneud ar gyfer rhedeg y practis deintyddol preifat;

(d) enw, cyfeiriad a chymwysterau’r person a fydd yn gyfrifol am y practis deintyddol preifat yn ystod yr absenoldeb hwnnw; ac

(e) y trefniadau sydd wedi, neu y bwriedir, eu gwneud ar gyfer penodi person arall i reoli’r practis deintyddol preifat yn ystod yr absenoldeb hwnnw, gan gynnwys erbyn pa ddyddiad y bwriedir gwneud y penodiad hwnnw.

(3) Pan fo’r absenoldeb yn codi o ganlyniad i argyfwng, rhaid i’r person cofrestredig roi hysbysiad o’r absenoldeb o fewn un wythnos i’r argyfwng ddigwydd, gan bennu’r materion a nodir yn is-baragraffau (a) i (e) o baragraff (2).

(4) Pan fo—

(a) darparwr cofrestredig sy’n rheoli’r practis deintyddol preifat; neu

(b) rheolwr cofrestredig,

wedi bod yn absennol o’r practis deintyddol preifat am gyfnod parhaus o 90 o ddiwrnodau neu ragor, ac nad yw hysbysiad wedi cael ei roi i swyddfa briodol yr awdurdod cofrestru am yr absenoldeb, rhaid i’r person cofrestredig roi hysbysiad ysgrifenedig i’r swyddfa honno, cyn gynted ag y bo’n ymarferol gwneud hynny, gan bennu’r materion a nodir yn is-baragraffau (a) i (e) o baragraff (2).

(5) Rhaid i’r person cofrestredig hysbysu swyddfa briodol yr awdurdod cofrestru bod person a grybwyllir yn is-baragraff (a) neu (b) o baragraff (4) wedi dychwelyd i’r gwaith, heb fod yn hwyrach na 7 niwrnod ar ôl y dyddiad y mae’r person hwnnw yn dychwelyd i’r gwaith.

Hysbysiad o newidiadau

27.—( 1) Rhaid i’r person cofrestredig roi hysbysiad ysgrifenedig i swyddfa briodol yr awdurdod cofrestru, cyn gynted ag y bo’n ymarferol gwneud hynny, os bydd unrhyw un neu ragor o’r digwyddiadau a ganlyn yn digwydd neu os bwriedir iddynt ddigwydd—

(a) bod person ac eithrio’r person cofrestredig yn cynnal neu’n rheoli’r practis deintyddol preifat;

(b) bod person yn peidio â chynnal neu reoli’r practis deintyddol preifat;

(c) pan fo’r person cofrestredig yn unigolyn, bod yr unigolyn hwnnw yn newid ei enw;

(d) pan fo’r darparwr cofrestredig yn bartneriaeth, bod unrhyw newid yn aelodaeth y bartneriaeth;

(e) pan fo’r darparwr cofrestredig yn sefydliad—

(i) bod enw neu gyfeiriad y sefydliad yn newid;

(ii) bod unrhyw newid i gyfarwyddwr, rheolwr, ysgrifennydd neu swyddog tebyg arall o’r sefydliad;

(f) bod yr unigolyn cyfrifol yn newid ei enw;

(g) bod newid i hunaniaeth yr unigolyn cyfrifol;

(h) pan fo’r darparwr cofrestredig yn unigolyn, bod ymddiriedolwr mewn methdaliad yn cael ei benodi, neu fod compównd neu drefniant yn cael ei wneud â chredydwyr;

(i) pan fo’r darparwr cofrestredig yn gwmni neu’n bartneriaeth, bod derbynnydd, rheolwr, datodwr neu ddatodwr dros dro yn cael ei benodi; neu

(j) bod y fangre a ddefnyddir i gynnal y practis deintyddol preifat yn cael ei newid neu ei hestyn yn sylweddol, neu fod mangre ychwanegol yn cael ei chaffael y bwriedir ei defnyddio at ddibenion y practis.

Hysbysu am droseddau

28.   Pan fo’r person cofrestredig neu’r unigolyn cyfrifol yn cael ei euogfarnu o unrhyw drosedd, pa un ai yng Nghymru neu yn rhywle arall, rhaid i’r person sydd wedi ei euogfarnu roi hysbysiad ysgrifenedig ar unwaith i swyddfa briodol yr awdurdod cofrestru—

(a) o ddyddiad a man yr euogfarn;

(b) o’r drosedd yr euogfernir y person ohoni; ac

(c) o’r gosb a osodir ar y person mewn cysylltiad â’r drosedd.

Penodi datodwyr etc.

29.—( 1) Rhaid i unrhyw berson y mae paragraff (2) yn gymwys iddo—

(a) rhoi hysbysiad ysgrifenedig i swyddfa briodol yr awdurdod cofrestru am benodiad y person, gan nodi’r rhesymau dros ei benodi;

(b) penodi rheolwr i fod â gofal llawnamser o ddydd i ddydd am y practis deintyddol preifat mewn unrhyw achos pan na fo’r ddyletswydd o dan reoliad 10(1) yn cael ei chyflawni; ac

(c) cyn diwedd y cyfnod o 28 o ddiwrnodau sy’n dechrau ar ddyddiad penodiad y person, hysbysu swyddfa briodol yr awdurdod cofrestru am fwriadau’r person ynglŷn â gweithrediad y practis deintyddol preifat yn y dyfodol y mae’r penodiad yn ymwneud ag ef.

(2) Mae’r paragraff hwn yn gymwys i unrhyw berson a benodir—

(a) yn dderbynnydd neu’n rheolwr eiddo sefydliad sy’n ddarparwr cofrestredig practis deintyddol preifat;

(b) yn ddatodwr neu’n ddatodwr dros dro i gwmni sy’n ddarparwr cofrestredig practis deintyddol preifat;

(c) yn ymddiriedolwr mewn methdaliad i ddarparwr cofrestredig practis deintyddol preifat.

Marwolaeth person cofrestredig

30.—( 1) Os oes mwy nag un person wedi ei gofrestru mewn cysylltiad â phractis deintyddol preifat, a bod person cofrestredig yn marw, rhaid i unrhyw berson cofrestredig sy’n goroesi roi hysbysiad ysgrifenedig o’r farwolaeth i swyddfa briodol yr awdurdod cofrestru cyn gynted ag y bo’n ymarferol gwneud hynny.

(2) Os dim ond un person sydd wedi ei gofrestru mewn cysylltiad â phractis deintyddol preifat, a bod y person yn marw, rhaid i gynrychiolwyr personol y person—

(a) rhoi hysbysiad ysgrifenedig o’r farwolaeth i swyddfa briodol yr awdurdod cofrestru, cyn gynted ag y bo’n ymarferol gwneud hynny; a

(b) rhoi hysbysiad i’r awdurdod hwnnw o’u bwriadau ynglŷn â rhedeg y practis deintyddol preifat yn y dyfodol, o fewn 28 o ddiwrnodau i’r farwolaeth.

(3) Caiff cynrychiolwyr personol y darparwr cofrestredig ymadawedig gynnal y practis deintyddol preifat heb gael eu cofrestru mewn cysylltiad ag ef—

(a) am gyfnod nad yw’n hwy nag 28 o ddiwrnodau; a

(b) am unrhyw gyfnod pellach a benderfynir gan yr awdurdod cofrestru yn unol â pharagraff (4).

(4) Caiff yr awdurdod cofrestru estyn y cyfnod a bennir ym mharagraff (3)(a) am unrhyw gyfnod pellach, nad yw’n hwy na chwe mis, a benderfynir gan yr awdurdod cofrestru, a rhaid iddo hysbysu’r cynrychiolwyr personol am unrhyw benderfyniad o’r fath yn ysgrifenedig.

(5) Rhaid i’r cynrychiolwyr personol benodi rheolwr i fod â gofal llawnamser o ddydd i ddydd am y practis deintyddol preifat yn ystod unrhyw gyfnod pan fyddant, yn unol â pharagraff (3), yn cynnal y practis deintyddol preifat heb gael eu cofrestru mewn cysylltiad ag ef.

(6) Mae darpariaethau rheoliad 11 yn gymwys i reolwr a benodir yn unol â pharagraff (5).

(7) Pan fo’r awdurdod cofrestru yn cael cais i gofrestru fel darparwr mewn cysylltiad â’r practis deintyddol preifat y cyfeirir ato ym mharagraff (1), caniateir estyn y chwe mis y cyfeirir ato ym mharagraff (4) am gyfnod nad yw’n hwy na chwe mis fel y’i penderfynir gan yr awdurdod cofrestru.

(1)

Mae’r canllawiau ar gliriadau iechyd ar gyfer gweithwyr iechyd ar hyn o bryd wedi eu nodi yng Nghylchlythyr Iechyd Cymru WHC (2006) 86 a gyhoeddwyd gan Lywodraeth Cymru. Mae’r canllawiau hyn yn ddarostyngedig i ddiwygiadau.

(2)

Mae i “oedolion sy’n wynebu risg” yr un ystyr ag yn adran 126(1) o Ddeddf Gwasanaethau Cymdeithasol a Llesiant (Cymru) 2014 (dccc 4).

(3)

2010 p. 15. Mae’r nodweddion gwarchodedig wedi eu nodi ym Mhennod 1 o Ran 2 o Ddeddf Cydraddoldeb 2010.

(4)

O.S. 2005/1541.