2017 Rhif 1292 (Cy. 298)

Gofal Cymdeithasol, Cymru

Rheoliadau Gwasanaethau Rheoleiddiedig (Hysbysiadau Cosb) (Cymru) 2017

Gwnaed14 Rhagfyr 2017

Gosodwyd gerbron Cynulliad Cenedlaethol Cymru18 Rhagfyr 2017

Yn dod i rym2 Ebrill 2018

Mae Gweinidogion Cymru, drwy arfer y pwerau a roddir gan adrannau 52(1) a (6) a 187(1) o Ddeddf Rheoleiddio ac Arolygu Gofal Cymdeithasol (Cymru) 20161, yn gwneud y Rheoliadau a ganlyn:

Enwi, cychwyn a chymhwyso1

1

Enw’r Rheoliadau hyn yw Rheoliadau Gwasanaethau Rheoleiddiedig (Hysbysiadau Cosb) (Cymru) 2017.

2

Daw’r Rheoliadau hyn i rym ar 2 Ebrill 2018.

3

Maeʼr Rheoliadau hyn yn gymwys o ran Cymru.

Dehongli2

Yn y Rheoliadau hyn—

mae i “cyfnod talu” (“payment period”) yr ystyr a roddir yn rheoliad 5;
ystyr “derbynnydd” (“recipient”) yw person y rhoddir hysbysiad cosb iddo yn unol ag adran 52 o’r Ddeddf;
ystyr “y Ddeddf” (“the Act”) yw Deddf Rheoleiddio ac Arolygu Gofal Cymdeithasol (Cymru) 2016;
ystyr “hysbysiad cosb” (“penalty notice”) yw hysbysiad cosb a roddir yn unol ag adran 52 o’r Ddeddf;
ystyr “rheoleiddiwr gwasanaethau” (“service regulator”) yw Gweinidogion Cymru;
ystyr “y Rheoliadau Darparwyr Gwasanaethau” (“the Service Providers Regulations”) yw Rheoliadau Gwasanaethau Rheoleiddiedig (Darparwyr Gwasanaethau ac Unigolion Cyfrifol) (Cymru) 20172;
ystyr “trosedd” (“offence”) yw trosedd ragnodedig.

Troseddau rhagnodedig3

Mae’r troseddau o dan y darpariaethau a restrir yng ngholofn gyntaf y tabl yn yr Atodlen wedi eu rhagnodi3 fel troseddau rhagnodedig4 at ddibenion adran 52(1) o’r Ddeddf.

Swm y gosb4

Mae swm y gosb sydd i gael ei dalu ar gyfer pob trosedd wedi ei bennu yn nhrydedd golofn y tabl yn yr Atodlen.

Y cyfnod ar gyfer talu’r gosb5

Yr amser erbyn pryd y mae’r gosb a bennir mewn hysbysiad cosb i gael ei thalu yw diwedd y cyfnod o 28 o ddiwrnodau sy’n dechrau â’r dyddiad y ceir yr hysbysiad (“cyfnod talu”).

Talu’r gosb6

1

Rhaid talu’r gosb a bennir mewn hysbysiad cosb i’r rheoleiddiwr gwasanaethau drwy’r dull a bennir yn yr hysbysiad.

2

Mewn unrhyw achos, mae tystysgrif yr honnir ei bod wedi ei llofnodi gan y rheoleiddiwr gwasanaethau neu ar ei ran, sy’n datgan bod taliad cosb wedi dod i law neu heb ddod i law erbyn y dyddiad a bennir yn y dystysgrif, yn dystiolaeth i’r ffeithiau a ddatgenir.

Y cyfnod pan na chaniateir i achos gael ei gychwyn7

1

Pan fo derbynnydd yn cael hysbysiad cosb, ni chaniateir i achos am y drosedd y mae’r hysbysiad yn ymwneud â hi gael ei gychwyn yn erbyn y derbynnydd cyn diwedd y cyfnod talu.

2

Mae adran 184 o’r Ddeddf5 yn gymwys i hysbysiad cosb fel y mae’n gymwys i hysbysiad y mae’n ofynnol ei roi o dan y Ddeddf.

Tynnu hysbysiad cosb yn ôl8

1

Caiff y rheoleiddiwr gwasanaethau dynnu hysbysiad cosb yn ôl drwy roi rhybudd ysgrifenedig o’r tynnu’n ôl i’r derbynnydd—

a

os yw’r rheoleiddiwr gwasanaethau yn penderfynu—

i

na ddylai fod wedi cael ei roi, neu

ii

na ddylai fod wedi cael ei roi i’r person a enwir fel y derbynnydd; neu

b

os yw’n ymddangos i’r rheoleiddiwr gwasanaethau fod yr hysbysiad yn cynnwys gwallau perthnasol.

2

Caniateir i hysbysiad cosb gael ei dynnu’n ôl yn unol â pharagraff (1) pa un a yw’r cyfnod talu wedi dod i ben ai peidio, a pha un a yw’r gosb wedi cael ei thalu ai peidio.

3

Pan fo hysbysiad cosb wedi cael ei dynnu’n ôl yn unol â pharagraff (1), rhaid i’r rheoleiddiwr gwasanaethau ad-dalu unrhyw swm sydd wedi ei dalu fel cosb yn unol â’r hysbysiad hwnnw, i’r person a’i talodd.

4

Ac eithrio fel y darperir ym mharagraff (5), ni chaniateir i achos gael ei gychwyn neu ei barhau yn erbyn derbynnydd am y drosedd y mae’r hysbysiad cosb yn ymwneud â hi pan fo’r hysbysiad wedi cael ei dynnu’n ôl yn unol â pharagraff (1).

5

Pan fo hysbysiad cosb wedi cael ei dynnu’n ôl o dan baragraff (1)(b), caniateir i achos gael ei gychwyn neu ei barhau am y drosedd y rhoddwyd yr hysbysiad cosb hwnnw mewn cysylltiad â hi os yw hysbysiad cosb pellach wedi cael ei roi mewn cysylltiad â’r drosedd ac nad yw’r gosb wedi ei thalu cyn diwedd y cyfnod talu.

Cynnwys hysbysiad cosb9

1

Rhaid i hysbysiad cosb roi’r manylion hynny am yr amgylchiadau yr honnir eu bod yn drosedd y mae’n ymddangos i’r rheoleiddiwr gwasanaethau eu bod yn rhesymol ofynnol i roi gwybodaeth i’r derbynnydd amdani.

2

Rhaid i hysbysiad cosb ddatgan—

a

enw a chyfeiriad y derbynnydd;

b

swm y gosb;

c

y cyfnod talu;

d

y bydd talu o fewn y cyfnod hwnnw yn rhyddhau unrhyw atebolrwydd am y drosedd;

e

y cyfnod pan na fydd achos yn cael ei ddwyn mewn cysylltiad â’r drosedd y mae’r hysbysiad yn ymwneud â hi;

f

y canlyniadau os na chaiff y gosb ei thalu cyn i’r cyfnod ar gyfer ei thalu ddod i ben;

g

y person y caniateir i’r gosb gael ei thalu iddo a’r cyfeiriad lle y caniateir ei thalu ac y caniateir anfon unrhyw ohebiaeth am yr hysbysiad cosb iddo;

h

y dulliau a ganiateir ar gyfer talu’r gosb;

i

ar ba seiliau y caniateir i’r hysbysiad cosb gael ei dynnu’n ôl.

Cofnodion10

Rhaid i’r rheoleiddiwr gwasanaethau gadw cofnod o unrhyw hysbysiadau cosb a roddir, y mae rhaid iddo gynnwys—

a

copi o bob hysbysiad cosb a roddir;

b

cofnod o’r holl daliadau a wnaed a’r dyddiad pan y’u derbyniwyd;

c

manylion unrhyw hysbysiad cosb sydd wedi ei dynnu’n ôl a’r seiliau dros hynny;

d

manylion ynghylch a gafodd y derbynnydd ei erlyn am y drosedd y rhoddwyd yr hysbysiad cosb ar ei chyfer.

Huw Irranca-DaviesGweinidog Gofal Cymdeithasol a Phlant, o dan awdurdod Ysgrifennydd y Cabinet dros Iechyd a Gwasanaethau Cymdeithasol, un o Weinidogion Cymru14 Rhagfyr 2017

YR ATODLENTroseddau rhagnodedig

Rheoliadau 3 a 4

Y ddarpariaeth sy’n creu’r drosedd	Natur gyffredinol y drosedd	Swm y gosb
Adran 47 o’r Ddeddf	Gwneud datganiadau anwir	Swm sy’n cyfateb i ddwywaith a hanner lefel 4 ar y raddfa safonol(1)
Adran 48 o’r Ddeddf	Methiant i gyflwyno datganiad blynyddol	Swm sy’n cyfateb i lefel 4 ar y raddfa safonol
Adran 49 o’r Ddeddf	Methiant i ddarparu gwybodaeth	Swm sy’n cyfateb i lefel 4 ar y raddfa safonol
Rheoliad 7(3) a (5) o’r Rheoliadau Darparwyr Gwasanaethau	Mynd yn groes i’r gofynion mewn perthynas â’r datganiad o ddiben, neu fethiant i gydymffurfio â hwy	Swm sy’n cyfateb i ddwywaith a hanner lefel 4 ar y raddfa safonol
Rheoliad 11(3) o’r Rheoliadau Darparwyr Gwasanaethau	Mynd yn groes i’r gofynion mewn perthynas â sefyllfa ariannol y gwasanaeth, neu fethiant i gydymffurfio â hwy	Swm sy’n cyfateb i lefel 4 ar y raddfa safonol
Rheoliad 12(1) a (2) o’r Rheoliadau Darparwyr Gwasanaethau	Mynd yn groes i’r gofynion i gael polisïau a gweithdrefnau penodedig yn eu lle, neu fethiant i gydymffurfio â hwy	Swm sy’n cyfateb i lefel 4 ar y raddfa safonol
Rheoliad 19(1), (2) a (3) o’r Rheoliadau Darparwyr Gwasanaethau	Mynd yn groes i’r gofynion mewn perthynas â darparu gwybodaeth am y gwasanaeth, neu fethiant i gydymffurfio â hwy	Swm sy’n cyfateb i ddwywaith lefel 4 ar y raddfa safonol
Rheoliad 20(1) o’r Rheoliadau Darparwyr Gwasanaethau	Mynd yn groes i’r gofynion mewn perthynas â darparu cytundeb gwasanaeth, neu fethiant i gydymffurfio â hwy	Swm sy’n cyfateb i lefel 4 ar y raddfa safonol
Rheoliad 35(1) o’r Rheoliadau Darparwyr Gwasanaethau	Mynd yn groes i’r gofynion mewn perthynas ag addasrwydd staff, neu fethiant i gydymffurfio â hwy	Swm sy’n cyfateb i ddwywaith a hanner lefel 4 ar y raddfa safonol
Rheoliad 38(1) o’r Rheoliadau Darparwyr Gwasanaethau	Mynd yn groes i’r gofynion mewn perthynas â darparu gwybodaeth ar gyfer staff, neu fethiant i gydymffurfio â hwy	Swm sy’n cyfateb i ddwywaith lefel 4 ar y raddfa safonol
Rheoliad 59(1), (2) a (3) o’r Rheoliadau Darparwyr Gwasanaethau	Mynd yn groes i’r gofynion mewn perthynas â chreu a chynnal cofnodion, neu fethiant i gydymffurfio â hwy	Swm sy’n cyfateb i ddwywaith lefel 4 ar y raddfa safonol
Rheoliad 60(1), (2) a (4) o’r Rheoliadau Darparwyr Gwasanaethau	Mynd yn groes i’r gofynion mewn perthynas â hysbysiadau i’r rheoleiddiwr gwasanaethau, neu fethiant i gydymffurfio â hwy	Swm sy’n cyfateb i ddwywaith lefel 4 ar y raddfa safonol
Rheoliad 67(1) o’r Rheoliadau Darparwyr Gwasanaethau	Mynd yn groes i’r gofynion mewn perthynas â dyletswydd unigolyn cyfrifol i benodi rheolwr, neu fethiant i gydymffurfio â hwy	Swm sy’n cyfateb i ddwywaith a hanner lefel 4 ar y raddfa safonol
Rheoliad 74(1) a (2) o’r Rheoliadau Darparwyr Gwasanaethau	Mynd yn groes i’r gofynion mewn perthynas â dyletswydd unigolyn cyfrifol i adrodd ar ddigonolrwydd yr adnoddau, neu fethiant i gydymffurfio â hwy	Swm sy’n cyfateb i ddwywaith lefel 4 ar y raddfa safonol
Rheoliad 75(1) o’r Rheoliadau Darparwyr Gwasanaethau	Mynd yn groes i’r gofynion mewn perthynas ag unigolyn cyfrifol yn gwneud adroddiadau eraill i’r darparwr gwasanaeth, neu fethiant i gydymffurfio â hwy	Swm sy’n cyfateb i ddwywaith lefel 4 ar y raddfa safonol
Rheoliad 80(4) o’r Rheoliadau Darparwyr Gwasanaethau	Mynd yn groes i’r gofynion mewn perthynas â llunio gan unigolyn cyfrifol adroddiad mewn cysylltiad ag adolygiad o ansawdd y gofal, neu fethiant i gydymffurfio â hwy	Swm sy’n cyfateb i ddwywaith lefel 4 ar y raddfa safonol
Rheoliad 81(1) o’r Rheoliadau Darparwyr Gwasanaethau	Mynd yn groes i’r gofynion mewn perthynas â llunio gan unigolyn cyfrifol ddatganiad o gydymffurfedd â’r gofynion o ran safonau gofal a chymorth, neu fethiant i gydymffurfio â hwy	Swm sy’n cyfateb i ddwywaith lefel 4 ar y raddfa safonol
Rheoliad 84(1) a (3) o’r Rheoliadau Darparwyr Gwasanaethau	Mynd yn groes i’r gofynion mewn perthynas â dyletswydd yr unigolyn cyfrifol i wneud hysbysiadau i’r rheoleiddiwr gwasanaethau, neu fethiant i gydymffurfio â hwy	Swm sy’n cyfateb i ddwywaith lefel 4 ar y raddfa safonol
(1) Gweler adran 37 o Ddeddf Cyfiawnder Troseddol 1982 (p. 48) (“Deddf 1982”); ar y dyddiad y daw’r Rheoliadau hyn i rym, mae lefel 4 ar y raddfa safonol wedi ei phennu’n £2,500 (caniateir i’r ffigur hwn gael ei gynyddu yn rhinwedd diwygiad i Ddeddf 1982).

NODYN ESBONIADOL

(Nid ywʼr nodyn hwn yn rhan oʼr Rheoliadau)

Mae Rhan 1 o Ddeddf Rheoleiddio ac Arolygu Gofal Cymdeithasol (Cymru) 2016 (“y Ddeddf”) yn sefydlu system newydd o reoleiddio ac arolygu gwasanaethau gofal cymdeithasol yng Nghymru, sy’n disodli’r system a sefydlwyd o dan Ddeddf Safonau Gofal 2000.

Mae adran 2 o’r Ddeddf ac Atodlen 1 iddi yn pennu’r gwasanaethau sy’n “gwasanaethau rheoleiddiedig” at ddibenion y Ddeddf.

Cyfeirir at berson sydd wedi ei gofrestru’n ddarparwr gwasanaethau rheoleiddiedig fel “darparwr gwasanaeth” ac mae rheoliadau a wneir o dan adran 27 o’r Ddeddf yn gosod gofynion ar ddarparwyr gwasanaethau mewn cysylltiad â’r gwasanaethau rheoleiddiedig y maent yn eu darparu.

Mae adran 6 o’r Ddeddf yn ei gwneud yn ofynnol i ddarparwr gwasanaeth ddynodi unigolyn fel yr “unigolyn cyfrifol” mewn cysylltiad â phob man y mae gwasanaeth rheoleiddiedig i gael ei ddarparu ynddo, ohono neu mewn perthynas ag ef ac mae rheoliadau a wneir o dan adran 28 o’r Ddeddf yn gosod gofynion ar yr unigolyn cyfrifol mewn perthynas â’r gwasanaethau rheoleiddiedig y mae’n gyfrifol amdanynt.

Mae adran 52 o’r Ddeddf yn rhoi’r pŵer i Weinidogion Cymru (gan weithredu fel y rheoleiddiwr gwasanaethau) i roi hysbysiad cosb i berson yn lle dwyn achos am drosedd, ond dim ond mewn perthynas â’r troseddau hynny a ragnodir mewn rheoliadau. Mae’r pŵer hwn yn ddarostyngedig i’r cyfyngiadau a bennir yn adran 52(2) o’r Ddeddf.

Mae rheoliad 3 a’r golofn gyntaf yn y tabl yn yr Atodlen yn rhagnodi’r troseddau y caiff Gweinidogion Cymru roi hysbysiad cosb ar eu cyfer. Mae’r ail golofn yn y tabl hwnnw yn cynnwys disgrifiad o’r drosedd.

Mae rheoliad 4 a’r drydedd golofn yn y tabl yn yr Atodlen yn pennu swm y gosb sy’n daladwy mewn cysylltiad â phob un o’r troseddau rhagnodedig. Mynegir y symiau sy’n daladwy fel lluosrifau o’r swm sy’n cyfateb i lefel 4 ar y raddfa safonol (ac maent yn amrywio rhwng lluosrifau o un i ddwywaith a hanner).

Mae rheoliadau 5 a 6 yn gwneud darpariaeth ynghylch yr amser erbyn pryd y mae rhaid talu hysbysiad cosb ac yn pennu’r ffordd y caniateir i swm gael ei dalu ynddi.

Mae rheoliad 7 yn gwneud darpariaeth ynghylch y cyfnod pan na chaniateir i achos gael ei gychwyn am y drosedd y mae’r hysbysiad cosb yn ymwneud â hi.

Mae rheoliad 8 yn gwneud darpariaeth ynghylch yr amgylchiadau pan ganiateir i hysbysiad cosb gael ei dynnu’n ôl wedi iddo gael ei roi, canlyniadau’r tynnu’n ôl hwnnw, ac yn pennu pa bryd y caniateir i achos gael ei gychwyn neu ei barhau mewn cysylltiad â’r drosedd y mae’r hysbysiad cosb yn ymwneud â hi.

Mae rheoliad 9 yn nodi’r gofynion ar gyfer cynnwys hysbysiad cosb.

Mae rheoliad 10 yn nodi’r gofynion o ran y cofnodion sydd i gael eu cadw gan y rheoleiddiwr gwasanaethau mewn cysylltiad ag unrhyw hysbysiad cosb a roddir ganddo.

Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Rheoliadau hyn. O ganlyniad, lluniwyd asesiad effaith rheoleiddiol o’r costau a’r manteision sy’n debygol o ddeillio o gydymffurfio â’r Rheoliadau hyn. Gellir cael copi oddi wrth yr Adran Iechyd a Gwasanaethau Cymdeithasol, Llywodraeth Cymru, Parc Cathays, Caerdydd, CF10 3NQ.