Yng Nghymru, bydd y Rheoliadau hyn yn gymwys i’r rhaglen weithredol a sefydlwyd o dan Reoliad (EU) Rhif 508/2014 Senedd Ewrop a’r Cyngor dyddiedig 15 Mai 2014 ar Gronfa’r Môr a Physgodfeydd Ewrop (“Rheoliad 508/2014”) a Rheoliad (EU) Rhif 1303/2013 Senedd Ewrop a’r Cyngor dyddiedig 17 Rhagfyr 2013 sy’n gosod darpariaethau cyffredin ar Gronfa Datblygu Rhanbarthol Ewrop, Cronfa Gymdeithasol Ewrop, y Gronfa Gydlyniant, Cronfa Amaethyddol Ewrop ar gyfer Datblygu Gwledig a Chronfa’r Môr a Physgodfeydd Ewrop. Mae’r Rheoliadau hyn yn darparu y caiff Gweinidogion Cymru wneud taliadau at ddibenion Teitl V o Reoliad 508/2014. Bydd y Rheoliadau hyn yn rheoleiddio’r rhaglenni a weinyddir gan Weinidogion Cymru mewn perthynas â Chymru.

Mae’r Rheoliadau hyn yn ychwanegu at ddeddfwriaeth yr Undeb Ewropeaidd a restrir yn yr Atodlen i’r Rheoliadau (“deddfwriaeth yr UE”). Mae darpariaethau deddfwriaeth yr UE yn gymwys yn uniongyrchol ac yn cael effaith uniongyrchol mewn Aelod-wladwriaeth. Mae’r Rheoliadau hyn yn darparu fframwaith cyfreithiol domestig ar gyfer gweithredu deddfwriaeth yr UE yng Nghymru.

Mae’r Rheoliadau hyn yn darparu pŵer i Weinidogion Cymru gymeradwyo ceisiadau i gael cymorth ariannol (rheoliad 4) a thalu cymorth ariannol (rheoliad 3) mewn cysylltiad â gweithrediad a gymeradwywyd. Ystyr “gweithrediad” yw prosiect, contract, gweithred neu grŵp o brosiectau sydd ar gyfer unrhyw rai o’r dibenion a bennir yn Nheitl V o Reoliad 508/2014 ac sy’n gymwys i gael cymorth o Gronfa’r Môr a Physgodfeydd Ewrop. Ystyr “gweithrediad a gymeradwywyd” yw gweithrediad y mae Gweinidogion Cymru, mewn ysgrifen, wedi ei gymeradwyo i gael cymorth ariannol. Mae’r Rheoliadau hefyd yn pennu o dan ba amgylchiadau y caniateir dirymu cymeradwyaeth a roddwyd i weithrediad, ac atal neu adennill cymorth ariannol a dalwyd i fuddiolwr mewn perthynas â’r gweithrediad hwnnw (rheoliad 11).

Mae’r Rheoliadau hyn yn darparu pwerau mynediad ac arolygu i bersonau awdurdodedig mewn perthynas â mangre y mae gweithrediad a gymeradwywyd yn ymwneud â hi, neu y credir y deuir o hyd i ddogfennau ynddi sy’n ymwneud â gweithrediad a gymeradwywyd (rheoliadau 8 a 9) (diffinnir “person awdurdodedig” yn rheoliad 2). Mae’r Rheoliadau yn ei gwneud yn ofynnol hefyd fod buddiolwyr sy’n cael cymorth ariannol yn cadw cofnodion ynglŷn â gweithrediad a gymeradwywyd am gyfnod penodedig (rheoliad 10), yn cyflenwi y cyfryw wybodaeth sy’n ofynnol gan Weinidogion Cymru ynglŷn â gweithrediad a gymeradwywyd (rheoliad 6) ac yn cynorthwyo person awdurdodedig sy’n arfer ei bwerau o dan reoliad 9. Cyn gwneud unrhyw daliadau o gymorth ariannol, caniateir ei gwneud yn ofynnol ddangos tystiolaeth fod gwariant wedi ei dynnu’n briodol (rheoliad 7).

Mae rheoliad 12 yn caniatáu i Weinidogion Cymru hawlio llog ar symiau sy’n ddyledus iddynt. Mae rheoliad 13 yn darparu bod symiau sy’n daladwy i Weinidogion Cymru yn adenilladwy fel dyled.

Mae’r Rheoliadau hyn yn creu trosedd (rheoliad 14) o wneud datganiadau anwir gan wybod hynny neu yn ddi-hid, rhwystro yn fwriadol berson awdurdodedig rhag gweithredu i gyflawni’r Rheoliadau hyn, a methu (heb esgus rhesymol) â chadw cofnodion perthnasol am y cyfnod sy’n ofynnol o dan reoliad 10.

Mae rheoliad 15 yn gymwys i droseddau a gyflawnir gan gorff corfforaethol, partneriaeth neu gymdeithas anghorfforedig arall. Mae rheoliad 16 yn ei gwneud yn ofynnol fod buddiolwr yn rhoi ymgymeriad os yw Gweinidogion Cymru yn tybio bod hynny’n briodol.

Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Rheoliadau hyn. O ganlyniad, paratowyd asesiad effaith rheoleiddiol o’r costau a’r manteision sy’n debygol o ddeillio o gydymffurfio â’r Rheoliadau hyn yng Nghymru. Gellir cael copi ohono oddi wrth Lywodraeth Cymru, Parc Cathays, Caerdydd CF10 3NQ.