2015 Rhif 1822 (Cy. 264)
Cynllunio Gwlad A Thref, Cymru

Rheoliadau Cynllunio Gwlad a Thref (Penderfynu ar Apelau gan Bersonau Penodedig) (Dosbarthau Rhagnodedig) (Cymru) 2015

Gwnaed
Gosodwyd gerbron Cynulliad Cenedlaethol Cymru
Yn dod i rym
Mae Gweinidogion Cymru, drwy arfer y pwerau a roddwyd i’r Ysgrifennydd Gwladol gan adran 333 o Ddeddf Cynllunio Gwlad a Thref 19901 a pharagraff 1 o Atodlen 6 iddi, adran 93 o Ddeddf Cynllunio (Adeiladau Rhestredig ac Ardaloedd Cadwraeth) 19902 a pharagraff 1 o Atodlen 3 iddi ac adran 40 o Ddeddf Cynllunio (Sylweddau Peryglus) 19903 a pharagraff 1 o’r Atodlen iddi, sydd bellach yn arferadwy ganddynt hwy4, yn gwneud y Rheoliadau a ganlyn:

Enwi, cychwyn a chymhwyso1.

(1)

Enw’r Rheoliadau hyn yw Rheoliadau Cynllunio Gwlad a Thref (Penderfynu ar Apelau gan Bersonau Penodedig) (Dosbarthau Rhagnodedig) (Cymru) 2015 a deuant i rym ar 16 Rhagfyr 2015.

(2)

Mae’r Rheoliadau hyn yn gymwys o ran Cymru.

Dehongli2.

Yn y Rheoliadau hyn—

ystyr “y brif Ddeddf” (“the principal Act”) yw Deddf Cynllunio Gwlad a Thref 1990;

ystyr “y Ddeddf Adeiladau Rhestredig” (“the Listed Buildings Act”) yw Deddf Cynllunio (Adeiladau Rhestredig ac Ardaloedd Cadwraeth) 1990;

ystyr “y Ddeddf Sylweddau Peryglus” (“the Hazardous Substances Act”) yw Deddf Cynllunio (Sylweddau Peryglus) 1990;

ystyr “Rheoliadau 1997” (“the 1997 Regulations”) yw Rheoliadau Cynllunio Gwlad a Thref (Penderfynu ar Apelau gan Bersonau Penodedig) (Dosbarthiadau Rhagnodedig) 19975;
ystyr “Rheoliadau 2009” (“the 2009 Regulations”) yw Rheoliadau Cynllunio Gwlad a Thref (Asesu Effeithiau Amgylcheddol) (Adolygiadau Amhenderfynedig o Hen Ganiatadau Mwynau) (Cymru) 20096; ac
ystyr “ymgymerwyr statudol” yw ymgymerwyr statudol o fewn yr ystyr a roddir i “statutory undertakers” yn adran 262 o’r brif Ddeddf a phersonau eraill y bernir eu bod, yn rhinwedd is-adran (3) neu (6) o’r adran honno7, yn ymgymerwyr statudol at ddibenion adran 266 o’r Ddeddf honno.

Dosbarthau o apelau sydd i’w penderfynu gan bersonau penodedig3.

(1)

Yn ddarostyngedig i reoliad 4, mae’r dosbarthau o apelau a ganlyn wedi eu rhagnodi at ddibenion paragraff 1(1) o Atodlen 6 i’r brif Ddeddf fel apelau sydd i’w penderfynu gan berson a benodir gan Weinidogion Cymru—

(a)

apelau o dan adran 78 o’r brif Ddeddf (apelau yn erbyn penderfyniadau cynllunio a methiant i wneud penderfyniadau o’r fath), gan gynnwys apelau o dan yr adran honno fel y’i cymhwysir gan reoliad 15 o Reoliadau Cynllunio Gwlad a Thref (Rheoli Hysbysebion) 19928 (apelau yn erbyn gwrthod cais am gydsyniad datganedig i arddangos hysbysiad neu fethiant i wneud penderfyniad ar gais o’r fath) ac apelau o dan yr adran honno fel y’i cymhwysir gan adran 198(3)(c) a (4) o’r brif Ddeddf (apelau yn ymwneud â gorchmynion cadw coed);

(b)

apelau o dan adran 174 o’r brif Ddeddf (apelau yn erbyn hysbysiadau gorfodi);

(c)

apelau o dan adran 195 o’r brif Ddeddf (apelau yn erbyn gwrthod cais am dystysgrif cyfreithlondeb defnydd neu ddatblygiad presennol neu arfaethedig neu fethiant i wneud penderfyniad ar gais o’r fath);

(d)

apelau o dan adran 208 o’r brif Ddeddf (apelau yn erbyn hysbysiadau adran 207– ailosod coed);

(e)

apelau o dan baragraff 11(1) o Atodlen 13 a pharagraff 9(1) o Atodlen 14 i Ddeddf yr Amgylchedd 19959 (apelau yn erbyn penderfynu ar amodau i’w hatodi i ganiatadau mwynau), gan gynnwys apelau o dan y darpariaethau hynny fel y’u cymhwysir gan reoliad 45 o Reoliadau 2009 (apelau yn erbyn methiant i benderfynu); ac

(f)

apelau o dan baragraff 5 o Atodlen 2 i Ddeddf Cynllunio a Digolledu 199110 (apelau yn ymwneud â hen ganiatadau mwyngloddio), gan gynnwys apelau o dan y ddarpariaeth honno fel y’i cymhwysir gan reoliad 45 o Reoliadau 2009.

(2)

Mae’r dosbarthau o apelau a ganlyn wedi eu rhagnodi at ddibenion paragraff 1(1) o Atodlen 3 i’r Ddeddf Adeiladau Rhestredig fel apelau sydd i’w penderfynu gan berson a benodir gan Weinidogion Cymru—

(a)

apelau o dan adran 20 o’r Ddeddf Adeiladau Rhestredig (cydsyniad adeilad rhestredig), gan gynnwys apelau o dan yr adran honno sy’n cael effaith yn rhinwedd adran 74 o’r Ddeddf honno (ardaloedd cadwraeth); a

(b)

apelau o dan adran 39 o’r Ddeddf Adeiladau Rhestredig (hysbysiadau gorfodi adeilad rhestredig), gan gynnwys apelau o dan yr adran honno sy’n cael effaith yn rhinwedd adran 74 o’r Ddeddf honno.

(3)

Mae apelau o dan adran 21 o’r Ddeddf Sylweddau Peryglus (apelau yn erbyn penderfyniadau yn ymwneud â sylweddau peryglus neu fethiant i wneud penderfyniadau o’r fath) wedi eu rhagnodi at ddibenion paragraff 1(1) o’r Atodlen i’r Ddeddf Sylweddau Peryglus fel apelau sydd i’w penderfynu gan berson a benodir gan Weinidogion Cymru.

Dosbarthau o apelau a gedwir yn ôl i’w penderfynu gan Weinidogion Cymru4.

(1)

Nid yw rheoliad 3 yn gymwys i’r dosbarthau o apelau a ganlyn—

(a)

apelau o dan adran 78 o’r brif Ddeddf gan ymgymerwyr statudol pan oedd y cais perthnasol yn ymwneud â thir y mae adran 266 o’r Ddeddf honno11 (ceisiadau am ganiatâd cynllunio gan ymgymerwyr statudol) yn gymwys;

(b)

apelau o dan adran 174 o’r brif Ddeddf gan ymgymerwyr statudol pan fo’r torri rheolaeth gynllunio a honnir yn yr hysbysiad gorfodi yn cynnwys ymgymryd â datblygiad ar dir y mae adran 266 o’r Ddeddf honno yn gymwys iddo, neu fethiant i gydymffurfio ag amod neu gyfyngiad sydd ynghlwm wrth roi caniatâd cynllunio ar gyfer datblygu unrhyw dir o’r fath; neu

(c)

apelau y mae Gweinidogion Cymru neu’r Gweinidog priodol wedi rhoi cyfarwyddyd i adran 266 o’r brif Ddeddf gael effaith mewn perthynas â hwy (ac nad yw’r cyfarwyddyd wedi ei ddirymu).

Cyhoeddusrwydd ar gyfer cyfarwyddydau5.

(1)

Os gwneir cyfarwyddyd o dan—

(a)

paragraff 1(2) o Atodlen 6 i’r brif Ddeddf;

(b)

paragraff 1(2) o Atodlen 3 i’r Ddeddf Adeiladau Rhestredig; neu

(c)

paragraff 1(2) o’r Atodlen i’r Ddeddf Sylweddau Peryglus,

caiff Gweinidogion Cymru ei gwneud yn ofynnol i’r awdurdod cynllunio lleol ar gyfer pob ardal y mae’r cyfarwyddyd yn cael effaith mewn cysylltiad â hi gyhoeddi hysbysiad o’r cyfarwyddyd mewn o leiaf un papur newydd sy’n cylchredeg yn yr ardal.

(2)

Rhaid i’r hysbysiad gynnwys—

(a)

datganiad cryno o effaith y cyfarwyddyd; a

(b)

manylion ynghylch ble y gellir edrych ar gopi o’r cyfarwyddyd.

Dirymu ac arbed6.

(1)

Mae Rheoliadau 1997 wedi eu dirymu ac eithrio mewn perthynas ag apelau y rhoddwyd hysbysiad mewn cysylltiad â hwy cyn i’r Rheoliadau hyn ddod i rym.

(2)

Nid yw’r Rheoliadau hyn yn gymwys mewn cysylltiad ag apelau y cyfeirir atynt ym mharagraff (1).

Carl Sargeant
Y Gweinidog Cyfoeth Naturiol, un o Weinidogion Cymru
NODYN ESBONIADOL
(Nid yw’r nodyn hwn yn rhan o’r Rheoliadau)

Mae’r Rheoliadau hyn yn dirymu ac yn disodli, gyda rhai newidiadau, Reoliadau Cynllunio Gwlad a Thref (Penderfynu ar Apelau gan Bersonau Penodedig) (Dosbarthau Rhagnodedig) 1997, o ran Cymru.

Mae rheoliad 3 yn rhagnodi’r dosbarthau o apelau a wneir o dan Ddeddf Cynllunio Gwlad a Thref 1990, Deddf Cynllunio (Adeiladau Rhestredig ac Ardaloedd Cadwraeth) 1990 a Deddf Cynllunio (Sylweddau Peryglus) 1990 sydd i’w penderfynu gan bersonau a benodir gan Weinidogion Cymru, yn hytrach na’u penderfynu gan Weinidogion Cymru.

Mae rheoliad 4 yn rhagnodi dosbarthau penodol o achosion, o fewn y dosbarthau o apelau a ragnodir o dan reoliad 3, sydd i barhau i gael eu penderfynu gan Weinidogion Cymru.

Mae rheoliad 5 yn gwneud darpariaeth am gyhoeddi unrhyw gyfarwyddyd a wneir gan Weinidogion Cymru sy’n pennu’r dosbarthau o achosion, o fewn y dosbarthau o apelau yn rheoliad 3, sydd i’w penderfynu gan Weinidogion Cymru.

Mae rheoliad 6 yn gwneud darpariaeth dirymu ac arbed.

Mae Asesiad Effaith Rheoleiddiol sy’n gymwys i’r Rheoliadau hyn ar gael gan Lywodraeth Cymru yn: Parc Cathays, Caerdydd CF10 3NQ ac ar wefan Llywodraeth Cymru yn www.llyw.cymru.