Rheoliadau Ardrethu Annomestig (Taliadau Gohiriedig) (Cymru) 2012

Nodyn Esboniadol

(Nid yw'r nodyn hwn yn rhan o'r Rheoliadau)

Mae'r Rheoliadau hyn yn diwygio Rheoliadau Ardrethu Annomestig (Casglu a Gorfodi) (Rhestrau Lleol) 1989 (O.S.1989/1058) (“y Rheoliadau Rhestrau Lleol”) a'r Rheoliadau Ardrethu Annomestig (Casglu a Gorfodi) (Rhestrau Canolog) 1989 (O.S.1989/2260) (“y Rheoliadau Rhestru Canolog”) i wneud darpariaeth ar gyfer taliadau gohiriedig. Mae'r Rheoliadau hyn hefyd yn gwneud addasiadau canlyniadol i Reoliadau Ardrethu Annomestig (Hysbysiadau Galw am Dalu) (Cymru) 1993.

Mae'r Rheoliadau Rhestrau Lleol a'r Rheoliadau Rhestrau Canolog yn darparu ar gyfer diwallu'r rhwymedigaeth ardrethi flynyddol mewn rhandaliadau. Hyd 2009 yr oedd y rhandaliadau yn daladwy yn y flwyddyn ariannol yr oedd y galwad am dalu yn berthynol iddi. Yr oedd Rheoliadau Ardrethu Annomestig (Taliadau Gohiriedig) (Cymru) 2009 (O.S.2009/2154 (Cy.179)) (“Rheoliadau 2009”) yn gwneud darpariaeth arbennig ynglŷn â chasglu ardrethi annomestig a oedd yn daladwy mewn cysylltiad â'r flwyddyn ariannol a oedd yn cychwyn ar 1 Ebrill 2009.

Mewnosododd Rheoliadau 2009 Atodlen 1D newydd yn y Rheoliadau Rhestrau Lleol ac Atodlen 1B newydd yn y Rheoliadau Rhestrau Canolog i ddarparu y byddai trethdalwr a oedd yn ddarostyngedig i ardrethi annomestig mewn cysylltiad â blwyddyn ariannol 2009/10, ac yn bodloni amodau penodol, yn cael gohirio talu cyfran benodedig o'r rhwymedigaeth honno tan y blynyddoedd ariannol a oedd yn cychwyn ar 1 Ebrill 2010 ac 1 Ebrill 2011.

Mae'r Rheoliadau hyn yn gwneud darpariaeth bellach mewn perthynas â thaliadau gohiriedig drwy ddiwygio'r Rheoliadau Rhestrau Lleol a'r Rheoliadau Rhestrau Canolog er mwyn—

• rhoi ar gael yr un cyfleuster ar gyfer taliadau gohiriedig mewn cysylltiad â'r flwyddyn ariannol sy'n cychwyn ar 1 Ebrill 2012; a

• gwneud y darpariaethau ar gyfer taliadau gohiriedig yn fwy cyffredinol fel bod modd, os yw'r cyfleuster taliadau gohiriedig i'w roi ar gael ym mlynyddoedd ariannol y dyfodol, i hynny gael ei wneud heb yr angen i ddiwygio'r Rheoliadau Rhestrau Lleol a'r Rheoliadau Rhestrau Canolog yn gyfan gwbl.

Mae rheoliad 8 yn addasu rheoliad 6 o Reoliadau Cyfraniadau Ardrethu Annomestig (Cymru) 1992 O.S.1992/3238), gan alluogi awdurdodau bilio i ailgyfrifo eu cyfraniadau ardrethu annomestig oherwydd bod trethdalwyr yn gohirio talu ardrethi o dan y Rheoliadau hyn.

Mae rheoliad 9 o'r Rheoliadau hyn yn addasu'r diffiniad o “relevant year” yn rheoliad 2 o Reoliadau Ardrethu Annomestig (Hysbysiadau Galw am Dalu) (Cymru) 1993 (O.S.1993/252).

Cywirwyd rhai mân wallau teipograffyddol.

Ystyriwyd Cod Ymarfer Gweinidogion Cymru ar wneud Asesiadau Effaith Rheoleiddiol mewn perthynas â'r Rheoliadau hyn. O ganlyniad, ystyriwyd nad oedd hi'n angenrheidiol gwneud asesiad effaith rheoleiddiol o ran costau a manteision tebygol cydymffurfio â'r Rheoliadau hyn.