Nodyn Esboniadol
(Nid yw'r nodyn hwn yn rhan o'r Rheoliadau)
Mae'r Rheoliadau hyn yn nodi'r weithdrefn sydd i'w dilyn mewn achosion gerbron Tribiwnlys Anghenion Addysgol Arbennig Cymru. Mae'r Rheoliadau hyn yn gwneud darpariaeth ynghylch arfer awdurdodaeth y Tribiwnlys o dan Ran 4 o Ddeddf Addysg 1996 sy'n ymwneud ag apelau anghenion addysgol arbennig, a Phennod 1 o Ran 6 o Ddeddf Cydraddoldeb 2010 sy'n ymwneud â hawliadau o wahaniaethu ar sail anabledd mewn perthynas â disgyblion ysgol.
Mae Rhan A yn cynnwys darpariaethau cyffredinol sy'n cynnwys dirymiadau, arbedion a darpariaethau trosiannol. Mae hefyd yn gwneud darpariaeth ynglŷn â chyfansoddiad y Tribiwnlys.
Mae Rhan B yn gwneud darpariaeth ynglŷn â chychwyn achosion, paratoi achosion, gwrandawiadau, penderfyniadau'r Tribiwnlys, ac adolygiadau ac apelau yn erbyn penderfyniadau'r Tribiwnlys. Mae'n gwneud darpariaeth hefyd ynglŷn â gorchmynion Tribiwnlys, y terfynau amser ar gydymffurfiaeth awdurdodau lleol â gorchmynion o'r fath, a'r terfynau amser ar gyfer camau penodedig sydd i'w cymryd gan awdurdodau lleol ar ôl iddynt ildio rhai apelau a wneir i'r Tribiwnlys.
Mae Rhan C yn gwneud darpariaeth mewn perthynas ag apelwyr neu hawlwyr sy'n blant. Mae'n pennu'r weithdrefn sydd i'w dilyn a'r darpariaethau y mae'n rhaid eu bodloni cyn y caiff person weithredu fel cyfaill achos i blentyn.
Mae Rhan CH yn cynnwys darpariaethau amrywiol sy'n gymwys i achosion gerbron y Tribiwnlys.