(Nid yw'r nodyn hwn yn rhan o'r Rheoliadau)
Mae Rheoliadau Cyngor Addysgu Cyffredinol Cymru (Cyfansoddiad) 1999, (“Rheoliadau 1999”) yn darparu ar gyfer cyfansoddiad Cyngor Addysgu Cyffredinol Cymru (“y Cyngor”). Mae'r Rheoliadau hyn yn diwygio Rheoliadau 1999 o ganlyniad i Ddeddf Addysg 2011 (“Deddf 2011”), sy'n darparu ar gyfer diddymu Cyngor Addysgu Cyffredinol Lloegr ac yn darparu mewn perthynas â gwahardd personau rhag cyflawni gwaith addysgu.
Diwygir rheoliad 5(2)(a) o Reoliadau 1999 i ddarparu ynghylch person sy'n destun gorchymyn gwahardd sydd wedi'i wneud gan yr Ysgrifennydd Gwladol o dan adran 141B o Ddeddf Addysg 2002 (“Deddf 2002”). Mae'r diwygiad yn darparu ynghylch cymhwyster person o'r fath ar gyfer cael ei ethol yn aelod o'r Cyngor, ar gyfer cael ei benodi'n aelod o dan reoliadau 7, 8 neu 11, ac ar gyfer pleidleisio mewn etholiad am aelodau etholedig o dan gynllun sydd wedi'i wneud o dan reoliad 6. Mewnosodir adran 141B yn Neddf 2002 gan Ddeddf 2011.
Diwygir rheoliad 10(5)(a) o Reoliadau 1999 fel bod darpariaeth yn cael ei hychwanegu drwy'r hon y bydd aelod o'r Cyngor yn peidio â dal y swydd os bydd cyflogaeth y person hwnnw'n destun gorchymyn gwahardd sydd wedi'i wneud gan yr Ysgrifennydd Gwladol o dan adran 141B o Ddeddf 2002.