2011 Rhif 2660 (Cy.284)
CYFRAITH TROSEDD, CYMRU

Rheoliadau Camddefnyddio Sylweddau (Llunio a Gweithredu Strategaeth) (Cymru) (Diwygio) 2011

Gwnaed
Gosodwyd gerbron Cynulliad Cenedlaethol Cymru
Yn dod i rym
Mae Gweinidogion Cymru, drwy arfer y pwerau a roddwyd i Gynulliad Cenedlaethol Cymru gan adran 6(2), (3), (4) a (9)(b) o Ddeddf Trosedd ac Anhrefn 19981 ac a freiniwyd bellach ynddynt hwy2, yn gwneud y Rheoliadau canlynol.

Enwi, cychwyn a dehongli

1.

(1)

Enw'r Rheoliadau hyn yw Rheoliadau Camddefnyddio Sylweddau (Llunio a Gweithredu Strategaeth) (Cymru) (Diwygio) 2011, a deuant i rym ar 5 Rhagfyr 2011.

(2)

Yn y Rheoliadau hyn, ystyr “Rheoliadau 2007” (“2007 Regulations”) yw Rheoliadau Camddefnyddio Sylweddau (Llunio a Gweithredu Strategaeth) (Cymru) 20073.

Diwygio Rheoliadau 2007

2.

Diwygir Rheoliadau 2007 fel a ganlyn.

3.

Yn lle rheoliad 3 rhodder—

“Swyddogaethau o ran llunio a gweithredu strategaeth3.

(1)

Mae grŵp strategaeth i fod ar gyfer pob ardal, a'i swyddogaethau fydd—

(a)

paratoi asesiadau strategol; a

(b)

paratoi a gweithredu cynllun partneriaeth,

ar gyfer yr ardal honno ar ran yr awdurdodau cyfrifol.

(2)

Yn ddarostyngedig i baragraff (3) rhaid i'r grŵp strategaeth gynnwys dau neu ragor o bersonau a benodwyd gan un neu ragor o'r awdurdodau cyfrifol yn yr ardal.

(3)

Os oes mwy nag un awdurdod cyfrifol o'r math a bennir yn adran 5(1)(aa) o Ddeddf 1998 yn yr ardal, rhaid i'r darparwyr hynny benodi ar y cyd un neu ragor o bersonau i'r grŵp strategaeth.

(4)

Mewn cyfarfod o grŵp strategaeth, caiff personau fod yn bresennol sy'n cynrychioli personau a chyrff sy'n cydweithredu ac yn cymryd rhan, ac unrhyw bersonau eraill a wahoddir gan y grŵp strategaeth.

(5)

Rhaid bod gan y grŵp strategaeth drefniadau ar waith i lywodraethu adolygiad o wariant arian partneriaeth ac i asesu darbodaeth, effeithlonrwydd ac effeithiolrwydd y cyfryw wariant.”.

4.

Yn rheoliad 9(a) hepgorer y geiriau “yn y cyfnod o dair blynedd sy'n dechrau gyda'r flwyddyn y cyfeirir ati yn rheoliad 8(2)”.

Carl Sargeant
Y Gweinidog Llywodraeth Leol a Chymunedau, un o Weinidogion Cymru
(Nid yw'r nodyn hwn yn rhan o'r Rheoliadau)

Mae'r Rheoliadau hyn yn darparu yn rheoliad 3 ar gyfer amnewid rheoliad 3 o Reoliadau Camddefnyddio Sylweddau (Llunio a Gweithredu Strategaeth) (Cymru) 2007 (“Rheoliadau 2007”), gan roi effaith i hynny o 5 Rhagfyr 2011 ymlaen. Mae rheoliad 3 o Reoliadau 2007 yn ymwneud ag aelodaeth a threfniadau cyfarfod grŵp strategaeth ar gyfer pob ardal llywodraeth leol, sydd â'r swyddogaeth o baratoi asesiadau strategol yn unol â rheoliadau 5 i 7 a pharatoi cynllun partneriaeth yn unol â rheoliadau 8 a 9.

Mae rheoliad 4 o'r Rheoliadau hyn yn hepgor y gofyniad ynglŷn â chyfnod o dair blynedd yn rheoliad 9(a) o Reoliadau 2007, mewn cysylltiad â chynllun partneriaeth.

Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â'r Rheoliadau hyn. O ganlyniad, ni thybiwyd bod angen cynnal asesiad effaith rheoleiddiol o gostau a buddion tebygol cydymffurfio â'r Rheoliadau hyn.