Mae'r Rheoliadau hyn yn gwneud darpariaeth o ran Cymru ynghylch y gofynion cofrestru a modrwyo neu farcio sy'n gymwys i adar a gynhwysir yn Atodlen 4 i Ddeddf Bywyd Gwyllt a Chefn Gwlad 1981 (“y Ddeddf”) at ddibenion adran 7(1) o'r Ddeddf. Mae adran 7(1) o'r Ddeddf yn darparu bod unrhyw berson sy'n cadw unrhyw aderyn a gynhwysir yn Atodlen 4, neu y mae aderyn o'r fath yn ei feddiant neu o dan ei reolaeth, a hwnnw'n aderyn nad yw wedi ei gofrestru a'i fodrwyo neu ei farcio yn unol â rheoliadau, yn euog o dramgwydd.

Mae'r pŵer i wneud rheoliadau mewn perthynas â Chymru o dan adran 7 o'r Ddeddf yn arferadwy gan Weinidogion Cymru.

Mae'r Rheoliadau hyn yn dirymu Rheoliadau Bywyd Gwyllt a Chefn Gwlad (Cofrestru, Modrwyo a Marcio Adar Caeth Penodol) (Cymru) 2003 (O.S. 2003/3235 (Cy.315)) a Rheoliadau Bywyd Gwyllt a Chefn Gwlad (Cofrestru, Modrwyo a Marcio Adar Caeth Penodol) (Cymru) (Diwygio) 2009 (O.S. 2009/1733 (Cy.161)).

Mae rheoliad 3 yn ei gwneud yn ofynnol i Weinidogion Cymru gadw cofrestr o'r adar sy'n cael eu cadw mewn cyfeiriadau yng Nghymru at ddibenion adran 7(1) o'r Ddeddf. Ni chaniateir i aderyn gael ei gofrestru gan Weinidogion Cymru onid ydynt wedi eu bodloni bod yr aderyn wedi ei fodrwyo neu ei farcio'n unol â rheoliad 6. Rhaid i gais am gofrestriad ar ffurflen a geir oddi wrth Weinidogion Cymru gael ei wneud gan geidwad neu ddarpar geidwad yr aderyn y mae'r cais yn ymwneud ag ef. Rhaid i Weinidogion Cymru ei gwneud yn ofynnol bod ffi yn dod gyda chais am gofrestriad a chânt wrthod gwneud cofnod yn y gofrestr mewn cysylltiad â chais hyd nes y bydd y ffi honno wedi ei thalu.

Mae rheoliad 4 yn manylu ar yr amgylchiadau y bydd cofrestriad yn peidio â chael effaith odanynt ac yn cael ei derfynu.

Mae rheoliad 5 yn darparu, pan fo cudyll bach neu hebog tramor wedi ei gofrestru yn y gofrestr o adar y mae tystysgrif, y cyfeirir ati yn Erthygl 10 o Reoliad y Cyngor (EC) Rhif 338/97 ynghylch gwarchod rhywogaethau ffawna a fflora gwyllt drwy ddiogelu'r fasnach ynddynt (“Rheoliad y Cyngor”), wedi ei dyroddi mewn cysylltiad â hwy, ei fod yn cael ei drin fel aderyn sy'n gofrestredig at ddibenion adran 7(1) o'r Ddeddf.

Mae rheoliad 6 yn darparu bod rhaid i bob aderyn y mae'r Rheoliadau hyn yn gymwys iddo gael ei fodrwyo â modrwy a geir oddi wrth Weinidogion Cymru onid yw wedi ei farcio'n unol â'r gofynion ynghylch marcio sbesimenau yn Erthygl 66 o Reoliad y Comisiwn (EC) Rhif 865/2006 sy'n gosod rheolau manwl ynghylch gweithredu Rheoliad y Cyngor.

Mae Rheoliad y Cyngor a Rheoliad y Comisiwn ill dau yn gweithredu'r Confensiwn ar y Fasnach Ryngwladol mewn Rhywogaethau Ffawna a Fflora Gwyllt mewn Perygl, y cyfeirir ato yn gyffredinol fel CITES.

Nid oes asesiad effaith rheoleiddiol wedi ei baratoi ar gyfer y Rheoliadau hyn.