http://www.legislation.gov.uk/wsi/2007/2425/made/welshGorchymyn Crynoadau Anifeiliaid (Cymru) 2007cyKing's Printer of Acts of Parliament2011-07-05ANIFEILIAID, CYMRU;IECHYD ANIFEILIAIDMae'r Gorchymyn hwn yn dirymu ac yn ailddeddfu, gyda diwygiadau, Orchymyn Crynoadau Anifeiliaid (Cymru) 2004 (O.S. 2004/1803 (Cy.191)). Mae'r diwygiadau fel a ganlyn.Welsh Statutory Instruments2007 Rhif 2425 Cy.201)ANIFEILIAID, CYMRUIECHYD ANIFEILIAIDGorchymyn Crynoadau Anifeiliaid (Cymru) 2007Wedi'i wneud14 Awst 2007Yn dod i rym14 Awst 2007

Mae Gweinidogion Cymru, drwy arfer y pwerau a roddwyd iddynt gan adrannau 1, 7, 8 ac 83 o Ddeddf Iechyd Anifeiliaid 1981

1981 p.22. Trosglwyddwyd swyddogaethau'r Gweinidog a'r Ysgrifennydd Gwladol i Gynulliad Cenedlaethol Cymru drwy O.S. 1999/672 ac O.S. 2004/3044. Trosglwyddwyd swyddogaethau Cynulliad Cenedlaethol Cymru i Weinidogion Cymru yn rhinwedd paragraff 30 o Atodlen 11 o Ddeddf Llywodraeth Cymru 2006.

, yn gwneud y Gorchymyn canlynol:

Enwi, cychwyn a chymhwyso1.(1)

Enw'r Gorchymyn hwn yw Gorchymyn Crynoadau Anifeiliaid (Cymru) 2007.

(2)

Daw'r Gorchymyn hwn i rym ar 14 Awst 2007.

(3)

Mae'r Gorchymyn hwn yn gymwys o ran Cymru.

Dehongli2.

Yn y Gorchymyn hwn—

ystyr “anifeiliaid” (“animals”) yw gwartheg (ond heb gynnwys buail a iacod), ceirw, geifr, defaid a moch;

ystyr “arwerthiant defaid magu yn yr hydref” (“sheep autumn breeding sale”) yw crynhoad anifeiliaid a gynhelir rhwng 1 Awst a 31 Rhagfyr at y prif ddiben o werthu defaid bridio;

ystyr “crynhoad anifeiliaid” (“animal gathering”) yw achlysur pan gaiff anifeiliaid eu crynhoi ynghyd at un neu fwy o'r dibenion canlynol —

(a)

gwerthiant, sioe neu arddangosfa;

(b)

traddodi llwyth o anifeiliaid ymlaen o fewn Prydain Fawr;

(c)

archwiliad i gadarnhau bod gan yr anifeiliaid nodweddion brid penodol;

mae “cyfarpar” (“equipment”) yn cynnwys llociau a chlwydi;

ystyr “diheintydd a gymeradwywyd” (“approved disinfectant”) yw diheintydd a gymeradwywyd o dan Orchymyn Clefydau Anifeiliaid (Diheintyddion a Gymeradwywyd) 1978

O.S. 1978/32 fel y'i diwygiwyd ddiwethaf o ran Cymru gan O.S. 2006/3166 (Cy.291).

;

mae i “man i anifeiliaid” (“animal area”) yr ystyr a roddir yn erthygl 5(3)(c);

ystyr “mangre drwyddedig” (“licensed premises”) yw mangre a drwyddedwyd o dan erthygl 5;

ystyr “palmantog” (“paved”) yw arwyneb o sment, concrid, asffalt neu ddeunydd caled anhydrin arall y gellir ei lanhau a'i ddiheintio'n effeithiol.

Hysbysiadau a thrwyddedau3.(1)

O ran hysbysiad neu drwydded o dan Gorchymyn hwn —

(a)

rhaid iddynt fod yn ysgrifenedig;

(b)

gellir eu diwygio, eu hatal dros dro, neu eu dirymu drwy hysbysiad a ddyroddir gan arolygydd milfeddygol; ac

(c)

cânt fod yn ddarostyngedig i'r cyfryw amodau y mae'r arolygydd milfeddygol yn barnu bod eu hangen i atal cyflwyno clefyd i'r fangre drwyddedig neu i atal lledaenu clefyd o fewn y fangre drwyddedig neu'r tu allan iddi.

(2)

Ond nid yw'r erthygl hon yn gymwys i hysbysiad neu drwydded a roddir gan Weinidogion Cymru o dan erthygl 8.

Eithriadau4.

Nid yw'r Gorchymyn hwn yn gymwys—

(a)

os yr un person sy'n berchen ar bob anifail y daethpwyd ag ef i'r crynhoad;

(b)

os bydd yr anifeiliaid i gyd yn dod o un set o fangreoedd y mae Gweinidogion Cymru wedi ei awdurdodi fel grwp meddiannaeth unigol o dan Orchymyn Rheoli Clefydau (Cymru) 2003

O.S. 2003/1966 (Cy.211), fel y'u diwygiwyd gan O.S. 2006/179 (Cy.30) ac O.S. 2006/1036 (Cy. 106).

; ac

(c)

os bydd y crynhoad anifeiliaid yn digwydd ar fangre y mae perchennog yr anifeiliaid yn berchen arni neu'n ei meddiannu.

Defnyddio mangreoedd ar gyfer crynoadau anifeiliaid5.(1)

Ni chaiff neb ddefnyddio unrhyw fangre ar gyfer crynhoad anifeiliaid oni bai bod y fangre honno wedi ei thrwyddedu i'r perwyl hwnnw gan arolygydd milfeddygol.

(2)

Rhaid i gais am drwydded fod yn ysgrifenedig.

(3)

Rhaid i drwydded bennu—

(a)

enw'r trwyddedai;

(b)

y fangre lle y caniateir crynhoi'r anifeiliaid; ac

(c)

y man y caniateir i'r anifeiliaid fynd iddo (“y man i anifeiliaid”).

Cyfyngiad o 27 o ddiwrnodau ar gynnal crynhoad anifeiliaid6.

Yn ddarostyngedig i erthyglau 7 ac 8, ni chaiff neb ganiatáu crynhoad anifeiliaid ar fangre y mae anifeiliaid wedi cael eu cadw arni nes bydd 27 o ddiwrnodau wedi mynd heibio ers y diwrnod—

(a)

y gadawodd yr anifail olaf y fangre honno; a

(b)

ar ôl i'r anifail olaf adael y fangre, pan fydd yr holl gyfarpar y daeth yr anifeiliaid i gysylltiad ag ef wedi ei lanhau fel nad oes unrhyw halogiad gweladwy.

Esemptiad ar gyfer mangre sydd â man palmantog i anifeiliaid7.(1)

Nid yw'r cyfyngiadau yn erthygl 6 yn gymwys os yw'r man i anifeiliaid yn y fangre drwyddedig wedi cael ei balmantu, ac os yw wedi cael ei lanhau a'i ddiheintio a bod gwastraff wedi cael ei waredu oddi yno yn unol â'r erthygl hon cyn bod crynhoad pellach o anifeiliaid yn cael ei gynnal.

(2)

O ran y gwaith glanhau a diheintio—

(a)

rhaid iddo beidio â dechrau nes bydd pob anifail wedi ei symud o'r rhan honno o'r man i anifeiliaid sy'n cael ei glanhau a'i diheintio; a

(b)

rhaid iddo gael ei gwblhau ar ôl i'r anifail olaf adael y fangre drwyddedig a chyn i grynhoad anifeiliaid gael ei gynnal eto ar y fangre.

(3)

Rhaid ysgubo neu grafu'n lân bob rhan o'r man i anifeiliaid (yn cynnwys unrhyw gyfarpar), a'i glanhau drwy ei golchi a'i diheintio â diheintydd a gymeradwywyd.

(4)

Rhaid i'r trwyddedai sicrhau bod yr holl fwyd anifeiliaid y mae'r anifeiliaid wedi cael mynd ato, a'r holl sarn, y dom a'r deunydd arall sy'n dod o anifeiliaid ac halogion eraill sy'n dod o anifeiliaid sydd yn y man i anifeiliaid—

(a)

yn cael eu difa,

(b)

yn cael eu trin er mwyn sicrhau nad oes perygl y byddant yn trosglwyddo clefydau; neu

(c)

yn cael eu gwaredu fel nad yw anifeiliaid yn gallu mynd atynt,

cyn gynted ag y bo modd a chyn i anifeiliaid gael mynd i mewn i'r fangre drwyddedig eto.

(5)

Os, ar ôl yr achlysur diwethaf pan gafodd y man i anifeiliaid ei lanhau a'i ddiheintio yn unol â'r erthygl hon, y'i halogir â thom anifeiliaid neu ddeunydd arall sy'n dod o anifeiliaid neu unrhyw halogyn sy'n dod o anifeiliaid, rhaid ysgubo neu grafu'n lân y man i anifeiliaid neu'r rhannau hynny ohono sydd wedi eu halogi felly, a'u glanhau drwy olchi a thrwy ddefnyddio diheintydd a gymeradwywyd cyn i unrhyw anifail gael mynd i'r fangre drwyddedig eto.

(6)

Pan na fo cyfres o grynoadau anifeiliaid, sy'n cael eu cynnal ar fangre sydd â man palmantog i anifeiliaid, yn para'n hwy na chyfanswm o 48 awr, caiff y crynoadau hynny eu trin fel un crynhoad anifeiliaid.

Esemptiad ar gyfer arwerthiannau defaid magu yn yr hydref8.(1)

Os bydd gan fangre drwyddedig fan palmantog i anifeiliaid, yn achos arwerthiant defaid magu yn yr hydref, caiff y trwyddedai wneud cais i Weinidogion Cymru am drwydded ychwanegol—

(a)

i ganiatáu bod defaid yn yr arwerthiant defaid magu yn yr hydref yn gallu mynd y tu allan i'r man palmantog i anifeiliaid; a

(b)

i gynnal crynhoad anifeiliaid pellach o fewn 27 o ddiwrnodau o ddiwedd yr arwerthiant defaid magu yn yr hydref.

(2)

Rhaid i'r drwydded bennu'r man y tu allan i'r man palmantog i anifeiliaid y caiff y defaid fynd iddo a'r dyddiad pan ganiateir y mynediad hwnnw.

(3)

Rhaid i'r drwydded beidio â chaniatáu mynediad i unrhyw ran o'r man y tu allan i'r man palmantog fwy nag unwaith bob 27 o ddiwrnodau.

(4)

Rhaid i'r drwydded bennu'r mesurau bioddiogelwch y mae'n rhaid eu rhoi ar waith.

(5)

Nid yw'r drwydded yn effeithio ar unrhyw grynhoad anifeiliaid a gynhelir yn y cyfnod o 27 o ddiwrnodau ar ôl diwedd yr arwerthiant defaid magu yn yr hydref sydd yn digwydd yn unig ar y man palmantog i anifeiliaid y mae erthygl 7 yn gymwys iddo.

(6)

Rhaid i unrhyw gais a wneir i Weinidogion Cymru o dan baragraff (1)—

(a)

bod yn ysgrifenedig;

(b)

datgan dyddiad arfaethedig yr arwerthiant defaid magu yn yr hydref;

(c)

datgan dyddiad arfaethedig unrhyw grynhoad anifeiliaid y mae'r trwyddedai am ei gynnal o fewn 27 o ddiwrnodau o ddiwedd yr arwerthiant defaid magu yn yr hydref a natur y crynhoad anifeiliaid hwnnw; ac

(ch)

dod i law Gweinidogion Cymru o leiaf bedair wythnos cyn dechrau'r arwerthiant defaid magu yn yr hydref.

(7)

O ran unrhyw drwydded a ddyroddir o dan yr erthygl hon—

(a)

rhaid iddi fod yn ysgrifenedig; a

(b)

caniateir ei diwygio, ei hatal dros dro, neu ei dirymu drwy hysbysiad a ddyroddir gan Weinidogion Cymru.

Terfynau amser9.(1)

Rhaid i grynhoad anifeiliaid a gynhelir at ddibenion gwerthiant (boed y gwerthiant yn unig ddiben neu beidio) ar fangre sydd â man palmantog i anifeiliaid neu arwerthiant defaid magu yn yr hydref a drwyddedwyd o dan erthygl 8 beidio â phara am fwy na 48 awr, gan ddechrau ganol dydd.

(2)

Caiff arolygydd milfeddygol drwy hysbysiad estyn cyfnod crynhoad anifeiliaid o dan baragraff (1) os yw'r arolygydd milfeddygol wedi'i fodloni—

(a)

bod angen yr estyniad er lles yr anifeiliaid; neu

(b)

mai bach yw'r perygl o gyflwyno clefydau yn y gwerthiant ac o ledaenu clefydau wedi hynny.

(3)

Yn achos crynhoad anifeiliaid nad yw paragraff (1) yn gymwys iddo, os un o ddibenion y crynhoad yw crynhoi anifeiliaid ynghyd i'w traddodi ymlaen o fewn Prydain Fawr, rhaid i'r crynhoad beidio â phara am fwy na 48 awr, gan ddechrau ganol dydd.

Newid ar amser dechrau crynoadau anifeiliaid at ddibenion gwerthu10.(1)

Yn achos crynhoad anifeiliaid a gynhelir at ddibenion gwerthiant (boed y gwerthiant yn unig ddiben neu beidio) ar fangre sydd â man palmantog i anifeiliaid neu arwerthiant defaid magu yn yr hydref a drwyddedwyd o dan erthygl 8, caiff y trwyddedai newid yr amser dechrau am ganol dydd, drwy o leiaf bythefnos ymlaen llaw—

(a)

hysbysu Gweinidogion Cymru yn ogystal â'r awdurdod lleol o ddyddiad ac amser dechrau a diweddu'r crynhoad anifeiliaid neu'r arwerthiant defaid magu yn yr hydref; a

(b)

rhoi cyhoeddusrwydd i'r crynhoad anifeiliaid neu'r arwerthiant defaid magu yn yr hydref fel y bydd y sawl sy'n dod ag anifeiliaid yno yn cael gwybod am yr amser dechrau a diweddu newydd.

(2)

Os yw'r crynoadau anifeiliaid yn un o gyfres o grynoadau o'r fath, caniateir i'r hysbysiad a'r cyhoeddusrwydd fod ar gyfer y gyfres honno.

Gwerthiant cigydda dynodedig a chasgliadau cigydda dynodedig11.(1)

Ni chaiff neb gynnal gwerthiant cigydda dynodedig neu gasgliad cigydda dynodedig onid yw ar fangre sydd â man palmantog i anifeiliaid.

(2)

Ni chaiff neb gynnal gwerthiant cigydda dynodedig neu gasgliad cigydda dynodedig fel rhan o grynhoad anifeiliaid sy'n cael ei gynnal at unrhyw ddiben arall.

(3)

Rhaid i'r trwyddedai hysbysu Gweinidogion Cymru a'r awdurdod lleol fod y trwyddedai yn bwriadu cynnal gwerthiant cigydda dynodedig neu gasgliad cigydda dynodedig o leiaf 3 diwrnod cyn y gwerthiant neu'r casgliad.

(4)

Rhaid i'r trwyddedai roi cyhoeddusrwydd i'r crynhoad anifeiliaid fel bod y sawl sy'n dod ag anifeiliaid iddo yn cael gwybod ei fod yn werthiant cigydda dynodedig neu'n gasgliad cigydda dynodedig.

(5)

Yn yr erthygl hon—

(a)

ystyr “gwerthiant cigydda dynodedig” yw achlysur pan grynhoir anifeiliaid ynghyd at ddibenion gwerthiant cyn eu traddodi ymlaen yn uniongyrchol i'w cigydda ym Mhrydain Fawr;

(b)

ystyr “casgliad cigydda dynodedig” yw achlysur pan grynhoir anifeiliaid ynghyd at ddibenion eu traddodi ymlaen yn uniongyrchol i'w cigydda ym Mhrydain Fawr.

Y dyletswyddau sydd ar bersonau sy'n bresennol mewn crynhoad anifeiliaid12.

Pan gynhelir crynhoad anifeiliaid (heblaw mewn sioe neu arddangosfa) mae darpariaethau'r Atodlen (gofynion ynghylch crynhoad anifeiliaid) yn effeithiol.

Cyfyngiadau yn dilyn crynhoad anifeiliaid13.(1)

Mae darpariaethau'r erthygl hon yn gymwys unwaith y bydd yr anifail olaf mewn crynhoad anifeiliaid wedi gadael y fangre drwyddedig.

(2)

Ni chaiff neb ganiatáu i anifeiliaid fynd ar y fangre drwyddedig hyd nes bydd pob cyfarpar y daeth yr anifeiliaid i gyffyrddiad ag ef yn y crynhoad wedi'i lanhau fel nad oes arno halogiad gweladwy.

(3)

Ni chaiff neb symud o'r fangre drwyddedig unrhyw gyfarpar y daeth anifeiliaid mewn crynhoad anifeiliaid i gyffyrddiad ag ef—

(a)

onid yw'r halogion gweladwy wedi eu glanhau oddi ar y cyfarpar ac onibai bod cyfnod o 27 o ddiwrnodau wedi mynd heibio ers i'r anifail olaf mewn crynhoad anifeiliaid adael y fangre drwyddedig; neu

(b)

oni chafodd y cyfarpar ei ysgubo a'i grafu'n lân, ac yna ei lanhau drwy ei olchi a'i ddiheintio â diheintydd a gymeradwywyd.

Gorfodi14.(1)

Rhaid i'r Gorchymyn hwn gael ei orfodi gan yr awdurdod lleol.

(2)

Caiff Gweinidogion Cymru gyfarwyddo, o ran achosion o ddisgrifiad penodol neu unrhyw achos penodol, mai Gweinidogion Cymru, ac nid yr awdurdod lleol, sydd i weithredu'r swyddogaeth orfodi a osodir ar awdurdod lleol o dan yr erthygl hon.

Dirymu15.

Dirymir Gorchymyn Crynoadau Anifeiliaid (Cymru) 2004

O.S. 2004/1803 (Cy.191).

Elin JonesY Gweinidog dros Faterion Gwledig, un o Weinidogion Cymru14 Awst 2007YR ATODLEN

Erthygl 12

Gofynion mewn crynhoad anifeiliaidDyletswyddau trwyddedai1.(1)

Rhaid i'r trwyddedai sicrhau bod unrhyw berson sy'n mynd ar y fangre drwyddedig yn cael gwybod bod y fangre'n drwyddedig o dan y Gorchymyn hwn, pa un ai trwy gyfrwng system o hysbysiadau y gwneir hynny neu mewn rhyw ffordd arall.

(2)

Rhaid i'r trwyddedai ddarparu'r canlynol wrth yr allanfeydd o'r man i anifeiliaid ac wrth unrhyw fan llwytho a dadlwytho—

(a)

baddonau traed sy'n cynnwys diheintydd a gymeradwywyd; a

(b)

cyfleusterau ar gyfer tynnu oddi ar esgidiau laid, tom anifeiliaid ac unrhyw halogion eraill sy'n dod o anifeiliaid cyn defnyddio'r baddonau traed.

(3)

Rhaid i'r trwyddedai ddarparu cyfleusterau ar y fangre drwyddedig ar gyfer newid, glanhau a diheintio dillad a gwaredu dillad y gellir eu taflu.

(4)

Rhaid i'r trwyddedai —

(a)

sicrhau mai yn y man i anifeiliaid yn unig y caiff yr anifeiliaid eu dadlwytho a'u llwytho; a

(b)

sicrhau, i'r graddau y mae hynny'n rhesymol ymarferol, nad yw anifeiliaid yn gadael y man i anifeiliaid ac eithrio ar gerbyd.

(5)

Pan gynhelir crynhoad anifeiliaid y mae'r terfynau amser yn erthyglau 9 a 10 yn gymwys iddo, rhaid i'r trwyddedai sicrhau—

(a)

na ddeuir â'r un anifail i'r fangre cyn dechrau'r crynhoad anifeiliaid; a

(b)

bod pob anifail yn cael ei symud o'r fangre erbyn diwedd y crynhoad anifeiliaid.

Y dyletswyddau sydd ar bersonau sy'n bresennol mewn crynhoad anifeiliaid2.(1)

Ni chaiff neb fynd ar fangre drwyddedig yn gwisgo dillad allanol neu esgidiau y gellir gweld eu bod wedi'u halogi â llaid, tom anifeiliaid neu halogion eraill sy'n dod o anifeiliaid.

(2)

Os bydd person yn y man i anifeiliaid yn gwisgo dillad allanol neu esgidiau y gellir gweld eu bod wedi eu halogi â llaid, tom anifeiliaid neu halogion eraill sy'n dod o anifeiliaid, rhaid iddo ar ei union wrth adael y man i anifeiliaid, lanhau halogi garw oddi ar ei ddillad allanol neu ei esgidiau (onid ydynt i gael eu gwaredu) a naill ai—

(a)

eu diheintio;

(b)

newid i ddillad neu esgidiau glân;

(c)

eu gwaredu; neu

(ch)

ymadael â'r fangre drwyddedig.

(3)

Os bydd person y tu allan i'r man i anifeiliaid yn gwisgo dillad allanol neu esgidiau y gellir gweld eu bod wedi eu halogi â llaid, tom anifeiliaid neu halogion eraill sy'n dod o anifeiliaid, caiff arolygydd gyflwyno iddo hysbysiad yn rhoi iddo'r dewis a hynny ar ei union—

(a)

glanhau ei ddillad allanol neu ei esgidiau;

(b)

newid i ddillad neu esgidiau glân;

(c)

gwaredu dillad neu esgidiau y gellir eu taflu; neu

(ch)

ymadael â'r fangre drwyddedig.

Esgidiau i'w gwisgo yn y man i anifeiliaid3.

Rhaid i unrhyw berson sy'n ymadael â'r man i anifeiliaid, gan ddefnyddio'r cyfleusterau a ddarperir, dynnu'r llaid, tom anifeiliaid ac unrhyw halogion eraill sy'n dod o anifeiliaid oddi ar ei esgidiau ac yna diheintio'r esgidiau hynny yn y baddon traed a ddarperir sy'n cynnwys diheintydd a gymeradwywyd.

Cerbydau4.(1)

Ni chaiff neb ddod ag unrhyw gerbyd na chyfarpar a gludir ar y cerbyd hwnnw ar y fangre drwyddedig na mynd â hwy oddi yno os gellir gweld eu bod wedi'u halogi â thom anifeiliaid neu unrhyw halogiad arall sy'n dod o anifeiliaid.

(2)

Ni fydd y paragraff hwn yn gymwys i unrhyw gerbyd neu gyfarpar a gludir ar y cerbyd hwnnw sy'n dod ar fangre drwyddedig —

(a)

os yw'r dom anifeiliaid neu halogiad arall yn dod yn unig o'r anifeiliaid a gludir ar y cerbyd pan ddaethpwyd â'r cerbyd ar y fangre drwyddedig; neu

(b)

yn unswydd er mwyn eu glanhau a'u diheintio, os eir â hwy yn unionsyth i'r cyfleusterau glanhau a diheintio yn ddi-oed ar ôl cyrraedd y fangre.

(3)

Ni fydd y paragraff hwn yn gymwys i unrhyw gerbyd neu gyfarpar a gludir ar y cerbyd hwnnw sy'n ymadael â'r fangre drwyddedig—

(a)

os yw'r dom anifeiliaid neu halogiad arall yn dod yn unig o'r anifeiliaid a ddadlwythwyd o'r cerbyd ar y fangre drwyddedig; neu

(b)

os yw'r dom anifeiliaid neu halogiad arall yn dod yn unig o'r anifeiliaid a lwythwyd ar y cerbyd ar y fangre drwyddedig.

(Nid yw'r nodyn hwn yn rhan o'r Gorchymyn)

Mae'r Gorchymyn hwn yn dirymu ac yn ailddeddfu, gyda diwygiadau, Orchymyn Crynoadau Anifeiliaid (Cymru) 2004 (O.S. 2004/1803 (Cy.191)). Mae'r diwygiadau fel a ganlyn.

Yn gyntaf, pan na fo cyfres o grynoadau anifeiliaid, sy'n cael eu cynnal ar fangre â man palmantog i anifeiliaid, yn para'n hwy na chyfanswm o 48 awr, caiff y crynoadau hynny eu trin fel un crynhoad anifeiliaid (erthygl 7(6)). Yn ail, mae erthygl 8 yn darparu y caiff trwyddedai wneud cais i Weinidogion Cymru ganiatáu i ddefaid mewn arwerthiant defaid magu yn yr hydref gael mynd i fannau y tu allan i'r man palmantog i anifeiliaid ac i gael caniatâd i gynnal crynoadau pellach o anifeiliaid o fewn 27 niwrnod i'r arwerthiant hwnnw o ddefaid magu yn yr hydref. Yn drydydd, mae paragraff 1(2) o'r Atodlen yn ei gwneud yn ofynnol i'r trwyddedai ddarparu cyfleusterau ar gyfer gwaredu llaid, tom a halogion eraill sy'n dod o anifeiliaid oddi ar esgidiau, yn ogystal â darparu baddonau traed. Mae paragraff 3 o'r Atodlen yn ei gwneud yn ofynnol i unrhyw berson sy'n ymadael â'r man i anifeiliaid ddefnyddio'r cyfleusterau hynny cyn defnyddio'r baddon traed sy'n cynnwys diheintydd a gymeradwywyd. Yn bedwerydd, mae paragraff 2(1) o'r Atodlen yn darparu na chaiff unrhyw berson fynd i mewn i fangre drwyddedig gyda dillad allanol neu esgidiau y gellir gweld eu bod wedi'u halogi â llaid, yn ychwanegol at ddom anifeiliaid neu unrhyw halogydd anifeiliaid arall a bennwyd yng Ngorchymyn 2004.

Mae erthygl 4 yn darparu na fydd y Gorchymyn hwn yn gymwys os yw'r holl anifeiliaid y deuir â hwy i grynhoad anifeiliaid ym mherchenogaeth yr un person ac yn dod o fangre a awdurdodir fel grwp meddiannaeth unigol o dan Orchymyn Rheoli Clefydau (Cymru) 2003 (O.S. 2003/1966 (Cy.211)) ac os crynhoir yr anifeiliaid ar fangre y mae perchennog yr anifeiliaid yn berchen arni neu'n ei meddiannu.

Mae erthygl 5 yn ei gwneud yn ofynnol i gael trwydded ar gyfer crynoadau anifeiliaid. Mae erthygl 6 yn pennu y gellir cynnal crynhoad anifeiliaid dim ond 27 o ddiwrnodau neu fwy ar ôl i'r anifail olaf adael y fangre honno a bod y fangre honno wedi'i glanhau a'r cyfarpar hwnnw ar y fangre wedi'i lanhau o halogiad gweladwy. Os ar fangre balmantog y cynhelir y crynhoad, mae erthygl 7 yn gwneud darpariaeth ar gyfer glanhau a diheintio'r fangre honno ac yn caniatáu cynnal crynhoad o fewn y terfynau amser arferol. Mae erthygl 9 yn gosod terfyn amser o 48 awr ar grynoadau anifeiliaid at ddibenion gwerthiant ar fangre balmantog ac arwerthiannau defaid magu yn yr hydref a llwythi sy'n cael eu traddodi ymlaen ar unrhyw fangre. Mae erthygl 12 a'r Atodlen yn gosod dyletswyddau ar bersonau sy'n mynd i grynhoad anifeiliaid. Mae erthygl 13 yn gosod cyfyngiadau yn dilyn crynhoad anifeiliaid. Mae erthygl 14 yn ymdrin â gorfodi.

Mae torri'r Gorchymyn yn dramgwydd o dan adran 73 o Ddeddf Iechyd Anifeiliaid 1981, ac yn dwyn cosb yn unol ag adran 75 o'r Ddeddf honno.

Mae asesiad effaith rheoleiddiol wedi'i baratoi a gellir cael copïau oddi wrth Lywodraeth Cynulliad Cymru, Parc Cathays, Caerdydd, CF10 3NQ.