1.—(1) Enw'r Gorchymyn hwn yw Gorchymyn Defaid a Geifr (Cofnodion, Adnabod a Symud) (Cymru) 2006.
(2) Mae'r Gorchymyn hwn yn gymwys o ran Cymru ac yn dod i rym ar 5 Ebrill 2006.
2.—(1) Yn y Gorchymyn hwn, ac eithrio pan fo'r cyd—destun yn mynnu fel arall—
ystyr “awdurdod lleol” (“local authority”) mewn perthynas ag unrhyw ardal yw y cyngor sir neu'r cyngor bwrdeistref sirol ar gyfer yr ardal honno;
ystyr “canolfan ymgynnull” (“assembly centre”) yw canolfan ymgynnull fel y'i diffinnir yn rheoliad 1(2) o Reoliadau Anifeiliaid a Chynhyrchion Anifeiliaid (Mewnforio ac Allforio) (Cymru) 2005(1);
ystyr “cofrestr” (“register”) yw'r gofrestr sy'n ofynnol gan Erthygl 5 o Reoliad y Cyngor;
ystyr “CPH” (“CPH”) yn y ffurfiau yn Atodlenni 2 a 3, yw Rhif y daliad ym mhlwyf y sir, a neilltuir o bryd i'w gilydd i unrhyw fangre neu ran o fangre gan Gynulliad Cenedlaethol Cymru;
ystyr “Cyfarwyddeb y Cyngor 92/102/EEC” (“Council Directive 92/102/EEC”) yw Cyfarwyddeb y Cyngor 92/102/EEC ynglŷn ag adnabod a chofrestru anifeiliaid (2);
ystyr “daliad mewnforio” (“holding of import”) yw'r daliad lle mae anifeiliaid sydd wedi eu mewnforio o drydedd gwlad yn cael eu symud iddo gyntaf at bwrpas ffermio da byw;
ystyr “dogfen symud” (“movement document”) yw'r ddogfen symud sy'n ofynnol gan Erthygl 6 o Reoliad y Cyngor;
ystyr “y Gorchmynion blaenorol” (“the previous Orders”) yw—
Gorchymyn Adnabod a Symud Defaid a Geifr (Mesurau Dros Dro) (Lloegr) (Rhif 2) 2002(3);
Gorchymyn Adnabod a Symud Defaid a Geifr (Mesurau Dros Dro) (Lloegr) 2002(4);
Gorchymyn Adnabod Defaid a Geifr (Lloegr) 2000(5);
Gorchymyn Adnabod a Symud Defaid a Geifr (Mesurau Dros Dro) (Cymru) (Rhif 2) Gorchymyn 2002(6);
Gorchymyn Adnabod a Symud Defaid a Geifr (Mesurau Dros Dro) (Cymru) 2002(7);
Rheoliadau Adnabod a Symud Defaid a Geifr (Mesurau Dros Dro) (Cymru) 2002(8);
Rheoliadau Adnabod Defaid a Geifr (Cymru) 2000(9);
Gorchymyn Adnabod a Symud Defaid a Geifr (Gogledd Iwerddon) 2004(10);
Gorchymyn Adnabod a Symud Defaid a Geifr (Gogledd Iwerddon) 1997(11);
Rheoliadau Adnabod Defaid a Geifr (Yr Alban) 2000 (12); neu
Gorchymyn Symud Defaid a Geifr (Mesurau Dros Dro) (Yr Alban) 2002(13);
ystyr “nod y ddiadell” (“flockmark”), ac eithrio ym mharagraff 18 o Atodlen 1, yw'r Rhif a ddyrannwyd gan Gynulliad Cenedlaethol Cymru mewn perthynas â diadell o ddefaid ar ddaliad;
ystyr “nod yr eifre” (“herdmark”), ac eithrio ym mharagraff 18 o Atodlen 1, yw'r Rhif a ddyrannwyd gan Gynulliad Cenedlaethol Cymru mewn perthynas â geifre o eifr ar ddaliad;
ystyr “Rheoliad y Cyngor” (“Council Regulation”) yw Rheoliad y Cyngor (EC) Rhif 21/2004 sy'n sefydlu system ar gyfer adnabod a chofrestru defaid a geifr ac yn diwygio Rheoliad (EC) Rhif 1782/2003 a Chyfarwyddebau 92/102/EEC a 64/432/EEC(14);
ystyr “tag adnabod” (“identification tag”) yw'r tag clust y cyfeiriwyd ato ym mharagraff 5 o Atodlen 1 ac a gymeradwywyd gan Gynulliad Cenedlaethol Cymru yn unol ag erthygl 22;
ystyr “tag R” (“R tag”) yw tag clust coch a gymeradwywyd gan Gynulliad Cenedlaethol Cymru yn unol ag erthygl 22 gyda chod yn cynnwys yr wybodaeth ganlynol, wedi ei hargraffu yn y drefn sy'n dilyn—
y llythrennau “UK”;
nod y ddiadell neu nod yr eifre ar gyfer y ddiadell neu'r eifre lle mae'r anifail pan roddir y tag clust;
Rhif unigryw; a'r
llythyren “R”;
ystyr “tatŵ R” (“R tattoo”) yw tatŵ gyda'r wybodaeth ganlynol, yn y drefn sy'n dilyn—
nod y ddiadell neu nod yr eifre ar gyfer y ddiadell neu'r eifre lle mae'r anifail pan roddir y tatŵ;
Rhif unigryw; a'r
lythyren “R”;
ystyr “tag symud” (“movement tag”), ac eithrio ym mharagraff 18 o Atodlen 1, yw tag clust a gymeradwywyd gan Gynulliad Cenedlaethol Cymru yn unol ag erthygl 22 gyda chod yn cynnwys yr wybodaeth ganlynol, wedi ei hargraffu yn y drefn sy'n dilyn—
y llythyren “S”; a
nod y ddiadell neu nod yr eifre ar gyfer y ddiadell neu'r eifre y mae'r anifail yn ei gadael;
ystyr “tir pori dros dro” (“temporary grazing”) yw daliad lle mae ceidwad yn symud anifail am gyfnod cyfyngedig er mwyn iddo gael ei fwydo neu gael pori;
ystyr “Rhif unigryw” (“unique number”) yw Rhif sy'n unigryw i anifail mewn diadell neu eifre ac nid yw'n cynnwys mwy na 6 digid;
ystyr “tag X” (“X tag”) yw tag clust a gymeradwywyd gan Gynulliad Cenedlaethol Cymru yn unol ag erthygl 22 gyda chod yn cynnwys yr wybodaeth ganlynol, wedi ei hargraffu yn y drefn sy'n dilyn—
y llythrennau “UK”;
nod y ddiadell neu nod yr eifre ar gyfer y ddiadell neu'r eifre y mae'r anifail yn ei gadael;
Rhif unigryw; a'r
llythyren “X”.
(2) Mae gan y dywediadau sydd heb eu diffinio ym mharagraff (1) ac a ddefnyddir yn y Gorchymyn hwn ac yn Rheoliad y Cyngor hefyd, yr un ystyr yn y Gorchymyn hwn ag yn y Rheoliad Cyngor hwnnw.
3.—(1) Mae cyfeiriad yn y Gorchymyn hwn at “cod adnabod unigol”(“individual identification code”) anifail, ac eithrio anifail sydd â mwy nag un tag clust neu datŵ gyda Rhif adnabod unigol i'r anifail, yn gyfeiriad at y cod ar—
(a)y dull cyntaf o adnabod a roddwyd ar yr anifail yn unol â Rheoliad y Cyngor; neu
(b)y tag clust neu datŵ a ddefnyddiwyd i adnabod yn unigol, anifail a anwyd ar neu cyn 9 Gorffennaf 2005 yn unol ag unrhyw un o'r Gorchmynion blaenorol neu, yn achos anifail sydd heb ei adnabod felly, y cod ar y tag adnabod.
(2) Yn achos anifail sydd â mwy nag un tag clust neu datŵ gyda Rhif i adnabod yr anifail yn unigol, mae cyfeiriad yn y Gorchymyn hwn at y “cod adnabod unigol” (“individual identification code”) yn gyfeiriad at—
(a)yn achos anifail nad yw'n dod o Ogledd Iwerddon, y tag clust neu datŵ gyda'r llythrennau “UK”a Rhif sy'n adnabod yr anifail yn unigol neu, os nad yw'r anifail wedi ei nodi felly, y tag clust neu datŵ a roddwyd yn fwyaf diweddar ar yr anifail sy'n ei adnabod yn unigol; neu
(b)yn achos anifail o Ogledd Iwerddon, y cod sydd wedi ei roi ar y tag clust yng nghlust chwith yr anifail.
4. Cynulliad Cenedlaethol Cymru yw'r awdurdod cymwys at ddibenion Rheoliad y Cyngor.
5. Mae'n rhaid i unrhyw awdurdodi, cymeradwyo neu ganiatâd a roddwyd o dan y Gorchymyn hwn neu trwy Reoliad y Cyngor fod mewn ysgrifen. Gall fod yn ddarostyngedig i amodau a gellir ei ddiwygio, ei atal neu ei ddirymu trwy hysbysiad ysgrifenedig ar unrhyw adeg.
OJ Rhif L 355, 5.12.92, t.32.
O.S. 2002/2153, diwygiwyd gan O.S. 2003/29, O.S. 2003/502 ac O.S. 2003/1728.
O.S. 2002/240, diwygiwyd O.S. 2002/764 ac O.S. 2002/1349.
O.S. 2000/2027, diwygiwyd gan O.S. 2001/281.
O.S. 2002/2302 (Cy. 227), diwygiwyd gan O.S. 2003/167 (Cy.27), O.S. 2003/946 (Cy.127) ac O.S. 2003/1966 (Cy.211).
O.S. 2002/274 (Cy. 30), diwygiwyd gan O.S. 2002/811 (Cy.91).
S.R. (NI) 1997 Rhif 173, diwygiwyd gan S.R. (NI) 1998 Rhif 393.
S.S.I. 2000/418, diwygiwyd gan S.S.I 2002/531 a S.S.I 2002/39.
S.S.I. 2002/38, diwygiwyd gan S.S.I. 2002/221.
OJ Rhif L 5, 9.1.04, t.8.