Rheoliadau Prynu Tir yn Orfodol (Ffurfiau Rhagnodedig) (Cynulliad Cenedlaethol Cymru) 2004

Offerynnau Statudol Cymru

2004 Rhif 2732 (Cy.239)

CAFFAEL TIR, CYMRU

Rheoliadau Prynu Tir yn Orfodol (Ffurfiau Rhagnodedig) (Cynulliad Cenedlaethol Cymru) 2004

Wedi'u gwneud

19 Hydref 2004

Yn dod i rym

31 Hydref 2004

Mae Cynulliad Cenedlaethol Cymru (“y Cynulliad Cenedlaethol”), drwy arfer ei bwerau yn adrannau 7(2), 10(2), 11(1) a (3), 12(1), 15(5) a 22 o Ddeddf Caffael Tir 1981 a pharagraffau 2(1) a (3), 3(1) a 6(5) o Atodlen 1 a pharagraff 9 o Atodlen 3 iddi (“y Ddeddf”)(1), a phob pŵ er arall sy'n ei alluogi yn y cyswllt hwnnw, drwy hyn yn gwneud y Rheoliadau a ganlyn(2):

Enwi, cychwyn a chymhwyso

1.—( 1) Enw'r Rheoliadau hyn yw Rheoliadau Prynu Tir yn Orfodol (Ffurfiau Rhagnodedig) (Cynulliad Cenedlaethol Cymru) 2004 a deuant i rym ar 31 Hydref 2004.

(2) Mae'r Rheoliadau hyn yn gymwys i orchymyn prynu gorfodol—

(a) sy'n ddarostyngedig i gadarnhad gan y Cynulliad Cenedlaethol o dan Ran 2 o'r Ddeddf ac nad yw'r awdurdod caffael, cyn i'r Rheoliadau hyn ddod i rym, wedi cyhoeddi hysbysiad ar wneud y gorchymyn prynu gorfodol yn unol ag adran 11(1) o'r Ddeddf; neu

(b) a baratowyd ar ffurf drafft gan y Cynulliad Cenedlaethol o dan baragraff 1 o Atodlen 1 i'r Ddeddf ac nad yw'r Cynulliad Cenedlaethol, cyn i'r Rheoliadau hyn ddod i rym, wedi cyhoeddi hysbysiad bod gorchymyn prynu gorfodol drafft wedi'i baratoi yn unol â pharagraff 2(1) o Atodlen 1 i'r Ddeddf.

Dehongli

2.—( 1) Yn y Rheoliadau hyn—

ystyr “y Ddeddf Adeiladau Rhestredig ” (“the Listed Buildings Act”) yw Deddf Cynllunio (Adeiladau Rhestredig ac Ardaloedd Cadwraeth) 1990(3); ac

ystyr “gorchymyn prynu gorfodol clirio” (“clearance compulsory purchase order”) yw gorchymyn prynu gorfodol a wnaed yn unol ag adran 290 o Ddeddf Tai 1985(4).

(2) Mae unrhyw gyfeiriad yn y Rheoliadau hyn at ffurf â Rhif yn gyfeiriad at—

(a) y ffurf sy'n dwyn y Rhif hwnnw yn yr Atodlen i'r Rheoliadau hyn;

(b) ffurf a addaswyd, yn ôl y gofyn, o'r ffurf honno sy'n dwyn y Rhif hwnnw er mwyn bodloni amgylchiadau achos penodol; neu

(c) ffurf y mae ei heffaith yn sylweddol debyg i'r ffurf honno, p'un ai a chafodd ei haddasu ai peidio; ac

(ch) mewn perthynas â ffurf a ganiateir gan is-baragraffau (a) i (c) uchod, y ffurf honno yn Gymraeg neu'n Saesneg, neu'r ddwy iaith.

(3) Mae unrhyw gyfeiriad yn y Rheoliadau hyn at adran â Rhif yn gyfeiriad at yr adran honno yn y Ddeddf ac mae unrhyw gyfeiriad at Atodlen â Rhif yn gyfeiriad at yr Atodlen honno i'r Ddeddf.

Ffurfiau rhagnodedig mewn cysylltiad â gorchmynion prynu gorfodol

3.—( 1) At ddibenion adran 10(2) o'r Ddeddf, ffurf y gorchymyn prynu gorfodol (heblaw gorchymyn prynu gorfodol clirio) y mae'n rhaid ei defnyddio yw—

(a) Ffurf 1; neu

(b) os yw'r gorchymyn yn darparu ar gyfer breinio tir a roddir yn gyfnewid yn unol ag adran 19 o'r Ddeddf, neu baragraff 6 o Atodlen 3 iddi (tir comin, mannau agored etc.), Ffurf 2; neu

(c) os nad yw'r gorchymyn yn darparu ar gyfer breinio tir a roddir yn gyfnewid yn unol ag adran 19 o'r Ddeddf neu baragraff 6 o Atodlen 3 iddi, ond yn darparu ar gyfer rhyddhau'r tir a brynwyd o'r hawliau, ymddiriedolaethau a nodweddion yn unol â'r adran honno neu'r paragraff hwnnw, Ffurf 3.

(2) At ddibenion adran 10(2), ffurf y gorchymyn prynu gorfodol clirio y mae'n rhaid ei defnyddio yw—

(a) Ffurf 4; neu

(b) os yw'r gorchymyn yn darparu ar gyfer breinio tir a roddir yn gyfnewid yn unol ag adran 19 o'r Ddeddf, neu baragraff 6 o Atodlen 3 iddi (tir comin, mannau agored etc.), Ffurf 5; neu

(c) os nad yw'r gorchymyn yn darparu ar gyfer breinio tir a roddir yn gyfnewid yn unol ag adran 19 o'r Ddeddf neu baragraff 6 o Atodlen 3 iddi, ond yn darparu ar gyfer rhyddhau'r tir a brynwyd o'r hawliau, ymddiriedolaethau a nodweddion yn unol â'r adran honno neu'r paragraff hwnnw, Ffurf 6.

(3) At ddibenion—

(a) adran 11(1) o'r Ddeddf a pharagraff 2(1) o Atodlen 1 iddi, ffurf yr hysbysiad mewn papur newydd; a

(b) adran 11(3) o'r Ddeddf a pharagraff 2(3) o Atodlen 1 iddi, ffurf yr hysbysiad sydd i'w gosod ar neu gerllaw'r tir sydd yn y gorchymyn,

y mae'n rhaid ei defnyddio yw Ffurf 7.

(4) Yn ddarostyngedig i reoliad 4 —

(a) at ddibenion adran 12(1) o'r Ddeddf a paragraff 3(1) o Atodlen 1 iddi, ffurf yr hysbysiad i berson cymwys(5) y mae'n rhaid ei defnyddio yw Ffurf 8; neu

(b) os gwneir y gorchymyn o dan adran 121 neu 125 o Ddeddf Llywodraeth Leol 1972(6) ar ran prif gyngor(7) neu gyngor cymuned, neu yn unol â chytundeb o dan adran 8 o Ddeddf Priffyrdd 1980(8)) ar ran awdurdod priffyrdd(8), y ffurf y mae'n rhaid ei defnyddio yw Ffurf 9.

(5) At ddibenion adran 15 o'r Ddeddf a pharagraff 6 o Atodlen 1 iddi, ffurf yr hysbysiad o gadarnhau (9)) neu wneud (10) y mae'n rhaid ei defnyddio yw Ffurf 10, ac eithrio pan wneir y cadarnhau gan yr awdurdod caffael yn unol ag adran 14A o'r Ddeddf, ac yn yr achos hwnnw y ffurf y mae'n rhaid ei defnyddio yw Ffurf 11.

(6) At ddibenion adran 22 o'r Ddeddf a pharagraff 9 o Atodlen 3 iddi, ffurf yr hysbysiad mewn papur newydd, sy'n datgan bod tystysgrif wedi cael ei rhoi o dan adran 16 neu 19 o'r Ddeddf neu baragraff 3 neu 6 o Atodlen 3 iddi, y mae'n rhaid ei defnyddio yw Ffurf 12.

Darpariaethau ychwanegol o ran adeiladau rhestredig

4.   Os caiff gorchymyn prynu gorfodol ei wneud o dan adran 47 o'r Ddeddf Adeiladau Rhestredig (caffaeliad gorfodol o adeiladau rhestredig y mae angen eu trwsio), rhaid cynnwys —

(a) yn Ffurf 1, pan fo'n briodol, y paragraff â Rhif 4 yn y Ffurf honno;

(b) ar ddiwedd paragraff 2 o Ffurf 8—

(i) ym mhob achos, y paragraffau ychwanegol yn y nodiadau i Ffurf 8 a rifwyd 3 a 5;

(ii) yn unrhyw achos lle mae angen hysbysiad yn ôl adran 50(3) o'r Ddeddf Adeiladau Rhestredig (lleiafswm iawndal yn achos adeilad a adawyd i ddadfeilio'n fwriadol) i gynnwys datganiad bod yr awdurdod neu'r Cynulliad Cenedlaethol wedi cynnwys cyfarwyddyd ar gyfer lleiafswm iawndal, y paragraff ychwanegol yn y nodiadau i Ffurf 8 â Rhif 4,

ac mae gweddill y paragraffau i'w hailrifo'n unol â hynny.

Dirymu

5.   Dirymir Rheoliadau Prynu Tir yn Orfodol 1994(11) i'r graddau y byddent yn gymwys i orchymyn prynu gorfodol y mae'r Rheoliadau hyn yn gymwys iddo.

Llofnodwyd ar ran Cynulliad Cenedlaethol Cymru yn unol ag adran 66(1) o Ddeddf Llywodraeth Cymru 1998(12).

D.Elis-Thomas

Llywydd y Cynulliad Cenedlaethol

19 Hydref 2004

Rheoliad 2(2)

ATODLEN

CYNNWYS

Ffurf 1	Gorchymyn prynu gorfodol (heblaw gorchymyn prynu gorfodol clirio).
Ffurf 2	Gorchymyn prynu gorfodol (heblaw gorchymyn prynu gorfodol clirio) sy'n darparu ar gyfer breinio tir cyfnewid.
Ffurf 3	Gorchymyn prynu gorfodol (heblaw gorchymyn prynu gorfodol clirio) nad yw'n darparu ar gyfer breinio tir cyfnewid, ond y mae'n darparu ar gyfer rhyddhau o hawliau, ymddiriedolaethau a nodweddion.
Ffurf 4	Gorchymyn prynu gorfodol clirio.
Ffurf 5	Gorchymyn prynu gorfodol clirio sy'n darparu ar gyfer breinio tir cyfnewid.
Ffurf 6	Gorchymyn prynu gorfodol clirio nad yw'n darparu ar gyfer breinio tir cyfnewid, ond y mae'n darparu ar gyfer rhyddhau o hawliau, ymddiriedolaethau a nodweddion.
Ffurf 7	Hysbysiad ynghylch gorchymyn prynu gorfodol ar gyfer cyhoeddiad papur newydd ac arddangos ar neu gerllaw'r tir sy'n destun y gorchymyn.
Ffurf 8	Hysbysiad i berson cymwys o dir (neu dir sy'n ddarostyngedig i hawliau newydd) a geir mewn gorchymyn prynu gorfodol.
Ffurf 9	Hysbysiad i berson cymwys o dir (neu dir sy'n ddarostyngedig i hawliau newydd) a geir mewn gorchymyn prynu gorfodol a wneir ar ran cyngor.
Ffurf 10	Hysbysiad o wneud neu gadarnau gorchymyn prynu gorfodol (gan awdurdod nad yw'n awdurdod caffael).
Ffurf 11	Hysbysiad o gadarnau gorchymyn prynu gorfodol gan awdurdod caffael.
Ffurf 12	Hysbysiad papur newydd o roi tystysgrif o dan adran 16 neu 19 o Ddeddf Caffael Tir 1981 neu baragraff 3 neu 6 o Atodlen 3 iddi.

Rheoliad 3(1)(a)

FFURF 1 FFURF GORCHYMYN PRYNU GORFODOL

Rheoliad 3(1)(b)

FFURF 2 FFURF GORCHYMYN PRYNU GORFODOL SY'N DARPARU AR GYFER BREINIO TIR CYFNEWID

Rheoliad 3(1)(c)

FFURF 3 FFURF GORCHYMYN PRYNU GORFODOL SY'N DARPARU AR GYFER RHYDDHAU HAWLIAU, YMDDIRIEDOLAETHAU A NODWEDDION

Rheoliad 3(2)(a)

FFURF 4 FFURF GORCHYMYN PRYNU GORFODOL CLIRIO

Rheoliad 3(2)(b)

FFURF 5 FFURF GORCHYMYN PRYNU GORFODOL CLIRIO SY'N DARPARU AR GYFER BREINIO TIR CYFNEWID

Rheoliad 3(2)(c)

FFURF 6 FFURF GORCHYMYN PRYNU GORFODOL SY'N DARPARU AR GYFER RHYDDHAU HAWLIAU, YMDDIRIEDOLAETHAU A NODWEDDION

Rheoliad 3(3)

FFURF 7 FFURF HYSBYSU YNGHYLCH GORCHYMYN PRYNU GORFODOL AR GYFER CYHOEDDIAD PAPUR NEWYDD AC ARDDANGOS AR NEU GERLLAW'R TIR SYDD YN Y GORCHYMYN

Rheoliad 3(4)(a)

FFURF 8 FFURF HYSBYSU I BERSON CYMWYS MEWN PERTHYNAS Å THIR (NEU DIR SY'N DDAROSTYNGEDIG I HAWLIAU NEWYDD) A GEIR MEWN GORCHYMYN PRYNU GORFODOL

Rheoliad 3(4)(b)

FFURF 9 FFURF HYSBYSIAD I BERSON CYMWYS MEWN PERTHYNAS Å THIR (NEU DIR A FYDD YN DDAROSTYNGEDIG I HAWLIAU NEWYDD) A GEIR MEWN GORCHYMYN PRYNU GORFODOL A WNEIR AR RAN CYNGOR (a)

Rheoliad 3(5)

FFURF 10 FFURF HYSBYSIAD O WNEUD NEU GADARNAU GORCHYMYN PRYNU GORFODOL (GAN AWDURDOD NAD YW'N AWDURDOD CAFFAEL)

Rheoliad 3(5)

FFURF 11 FFURFLEN HYSBYSU O WNEUD GORCHYMYN PRYNU GORFODOL GAN AWDURDOD CAFFAEL

Rheoliad 3(6)

FFURF 12 FFURF HYSBYSIAD PAPUR NEWYDD AR ROI TYSTYSGRIF O DAN ADRAN 16 NEU 19 O DDEDDF CAFFAEL TIR 1981, NEU BARAGRAFF 3 NEU 6 O ATODLEN 3 IDDI

Nodyn Esboniadol

(Nid yw'r nodyn hwn yn rhan o'r Rheoliadau)

Mae'r Rheoliadau hyn yn ailddeddfu, gyda diwygiadau, Reoliadau Prynu Tir yn Orfodol 1994 (O.S. 1994/2145) drwy ragnodi ffurfiau i'w defnyddio mewn cysylltiad â phrynu tir yn orfodol, a phrynu'n orfodol hawliau newydd dros dir, a'r prynu hwnnw yn brynu sy'n ddarostyngedig i'r gweithdrefnau a geir yn Neddf Caffael Tir 1981 (“Deddf 1981”) os yr awdurdod caffael neu'r awdurdod cadarnhau yw Cynulliad Cenedlaethol Cymru (“y Cynulliad Cenedlaethol”).

Mae'r diwygiadau yn cymryd sylw o'r newidiadau deddfwriaethol yn Neddf Cynllunio a Phrynu Gorfodol 2004 (p.5) ac yn gwneud mân newidiadau drafftio.

Prif nodweddion y diwygiadau hynny yw darparu—

(a) ffurfiau a ragnodwyd ar gyfer categori estynedig o berson (y cyfeirir ato fel “person cymwys”) y mae'n rhaid cyflwyno hysbysiad iddo o wneud gorchymyn prynu gorfodol (adran 12(1) o Ddeddf 1981). Diwygir y ffurfiau rhagnodedig er mwyn cynnwys y categori estynedig hwn yn yr Atodlen i orchymyn prynu gorfodol (Ffurfiau 1 i 6);

(b) ffurf a ragnodwyd ar gyfer hysbysiad o wneud neu baratoi, ar ffurf drafft, orchymyn prynu gorfodol sydd i'w lynu wrth wrthrych neu wrthrychau amlwg ar neu gerllaw'r tir sydd yn y gorchymyn (adran 11(3) o Ddeddf 1981 a pharagraff 2(3) o Atodlen 1 iddi) (Ffurf 7). Yr un ffurf ragnodedig yw hon â'r un ar gyfer hysbysiad mewn papur newydd sy'n hysbysebu'r gorchymyn prynu gorfodol;

(c) ffurf a ragnodwyd ar gyfer hysbysiad bod y Cynulliad Cenedlaethol wedi cadarnhau neu wneud gorchymyn prynu gorfodol sydd i'w lynu wrth wrthrych neu wrthrychau amlwg ar neu gerllaw'r tir sydd yn y gorchymyn prynu gorfodol (adran 15(1)(b) o Ddeddf 1981 a pharagraff 6(1)(b) o Atodlen 1 iddi) (Ffurf 10). Yr un ffurf ragnodedig yw hon â'r un ar gyfer hysbysiad mewn papur newydd sy'n hysbysebu cadarnhau neu wneud y gorchymyn prynu gorfodol; ac

(ch) ffurf a ragnodwyd ar gyfer hysbysiad cadarnhau pan fydd yr awdurod caffael yn cadarnhau gorchymyn prynu gorfodol na chafodd ei wrthwynebu yn dilyn hysbysiad gan y Cynulliad Cenedlaethol yn unol ag adran 14A o Ddeddf 1981 (Ffurf 11).

Mae'r ffurfiau a geir yn yr Atodlen i'r Rheoliadau hyn yn galluogi awdurdod caffael i ddefnyddio'r Gymraeg a/neu'r Saesneg.

(1)

1981 p.67; mewnosodwyd adrannau 11(3) a 15(5) o'r Ddeddf a pharagraffau 2(3) a 6(5) o Atodlen 1 iddi gan Ddeddf Cynllunio a Phrynu Gorfodol 2004 (p.5).

(2)

Mae'r pwerau a enwir yn y Rheoliadau hyn, mewn perthynas â Chymru, gan mwyaf yn arferadwy gan Gynulliad Cenedlaethol Cymru yn rhinwedd Gorchymyn Cynulliad Cenedlaethol Cymru (Trosglwyddo Swyddogaethau) 1999 (O.S. 1999/672) ac adrannau 118(3) a 122(1) o Ddeddf Cynllunio a Phrynu Gorfodol 2004.

(3)

1990 p.9.

(4)

1985 p.68; diwygiwyd Rhan 9 o Ddeddf 1985 gan Ran 2 o Atodlen 9 i Ddeddf Llywodraeth Leol a Thai 1989 (p.42).

(5)

I gael y diffiniad o “qualifying person”, gweler adran 12(2) o Ddeddf Caffael Tir 1981 a pharagraff 3(2) o Atodlen 1 iddi.

(6)

1972 p.70.

(7)

I gael y diffiniad o “principal council”, gweler adran 270 o Ddeddf Llywodraeth Leol 1972.

(8)

1980 p.66.

(9)

I gael ystyr “confirmation notice”, gweler adran 15(4) o Ddeddf Caffael Tir 1981.

(10)

I gael y diffiniad o “making notice”, gweler adran 6(4) o Atodlen 1 i Ddeddf Caffael Tir 1981.

(11)

O.S. 1994/2145.

(12)

1998 p.38.