Mae'r Rheoliadau hyn, sy'n diwygio, mewn perthynas â Chymru, Rheoliadau Diogelu Dŵr Rhag Llygredd Nitradau Amaethyddol (Cymru a Lloegr) 1996 (O.S. 1996/888), (“y Prif Reoliadau”), yn gwneud darpariaeth bellach ar gyfer gweithrediad Cyfarwyddeb y Cyngor 91/676/EEC, sy'n ymwneud â diogelu dyfroedd rhag llygredd a achosir gan nitradau o ffynonellau amaethyddol.

Nodwyd rhai darnau o dir yng Nghymru a Lloegr, gan gynnwys dau barth (parthau Dyserth a Threlech) yng Nghymru, fel parthau perygl nitradau gan Reoliad 3 o'r Prif Reoliadau ac Atodlen 1 iddynt.

Mae'r diwygiadau a wneir gan y Rheoliadau hyn yn dynodi ardaloedd ychwanegol yng Nghymru fel parthau perygl nitradau. Mae'r Rheoliad 3B ac Atodlen 1A newydd, sy'n cael eu mewnosod yn y Prif Reoliadau gan y Rheoliadau hyn, yn dynodi'r ardaloedd ychwanegol hynny fel parthau perygl nitradau, ynghyd â'r ardaloedd sydd eisioes o fewn parthau a ddynodwyd yng Nghymru. Mae'r rheoliad 3C ac Atodlen 1B newydd yn ei gwneud hi'n ofynnol i Gynulliad Cenedlaethol Cymru (“y Cynulliad Cenedlaethol”) gyhoeddi hysbysiad o ddynodiad parthau perygl nitradau newydd yn y wasg ac i adneuo copi o'r map sy'n dangos y parthau hynny gyda'r awdurdod lleol perthnasol ac hefyd i roi copi i rai cyrff sy'n cynrychioli buddiannau a allai cael eu heffeithio gan y dynodiad. Mae'r rheoliad 3B(2) newydd yn gosod dyletswydd ar y Cynulliad Cenedlaethol i adolygu ac, os oes angen, diwygio neu ychwanegu at yr ardaloedd a ddynodir fel parthau perygl nitradau yng Nghymru, o leiaf pob pedair blynedd.

Mae'r Rheoliad 3D newydd yn galluogi unrhyw berson sydd â buddiant mewn tir a ddynodwyd o dan y Rheoliadau diwygiedig (a hwnnw heb fod yn dir a ddynodwyd eisioes) i hawlio bod y Cynulliad Cenedlaethol yn gwneud ail-asesiad gorfodol o gynhwysiad y tir hwnnw yn y parth.

Gwneir nifer o ddiwygiadau llai i'r Prif Reoliadau, mewn perthynas â Chymru.

Mae rheoliad 3 o'r Rheoliadau hyn yn darparu na fydd y diwygiadau a wneir i'r Prif Reoliadau yn effeithio ar unrhyw beth a wnaed o dan y Prif Reoliadau, neu gan ymddiried ynddynt, cyn i'r diwygiadau hynny gael effaith.