Mae'r rheoliadau hyn yn darparu ar gyfer rhestr atodol i'w chadw gan Awdurdodau Iechyd yn unol â darpariaethau adran 43D o Ddeddf y Gwasanaeth Iechyd Gwladol 1977 (“Deddf 1977”).

Mae rheoliad 2 yn darparu rhai diffiniadau ar gyfer y Rheoliadau.

Mae rheoliad 3 yn darparu bod raid i bob Awdurdod Iechyd baratoi a chyhoeddi rhestr atodol.

Mae rheoliad 4 yn nodi sut y dylid mynd ati i wneud cais i fod ar y rhestr, ac yn ei gwneud hi'n ofynnol i ddarparu peth gwybodaeth benodol.

Mae rheoliad 5 yn darparu ar gyfer ailgynnwys meddyg ar y rhestr o dan rai amgylchiadau penodol.

Mae rheoliad 6 yn nodi'r rhesymau pan y gall, neu y mae'n rhaid i Awdurdod Iechyd wrthod cynnwys meddyg ar y rhestr, a'r meini prawf y mae'n rhaid iddynt eu parchu.

Mae rheoliad 7 yn nodi'r amgylchiadau pan y gall Awdurdod Iechyd ohirio ystyried cais i gynnwys meddyg ar y rhestr feddygol, a'r camau sydd i'w dilyn.

Mae rheoliad 8 yn caniatáu i Awdurdodau Iechyd gynnwys enw meddyg ar y rhestr yn ddarostyngedig i amodau, hyd nes fod unrhyw apêl wedi'i benderfynu.

Mae rheoliad 9 yn darparu ar gyfer ei gwneud hi'n ofynnol i feddyg hysbysu'r Awdurdod Iechyd yn ysgrifenedig o fewn 7 diwrnod os yw'r meddyg, neu gwmni y mae'r meddyg yn gyfarwyddwr ohono, yn cael unrhyw euogfarnau troseddol neu faterion eraill a nodir.

Mae rheoliad 10 yn darparu ar gyfer tynnu'n orfodol gan Awdurdod Iechyd enw unrhyw feddyg sydd wedi'i gael yn euog o lofruddiaeth neu unrhyw dramgwydd droseddol ac wedi'i ddedfrydu i gyfnod o dros 6 mis, ac ar gyfer tynnu'n ddewisol am resymau penodol.

Mae rheoliad 11 yn nodi'r meini prawf ar gyfer tynnu enwau yn ddewisol oddi ar y rhestr.

Mae rheoliad 12 yn caniatáu i Awdurdod Iechyd osod amodau ar feddyg sydd ar y rhestr, ac ar gyfer tynnu enw'r meddyg os nad yw'r meddyg yn cydymffurfio â'r amodau hynny.

Mae rheoliad 13 yn darparu ar gyfer galluogi Awdurdod Iechyd i atal dros dro feddyg oddi ar y rhestr os caiff rhai amodau penodol eu bodloni ac ar gyfer y drefn sydd i'w dilyn.

Mae rheoliad 14 yn darparu ar gyfer adolygu a'r camau sydd i'w dilyn gan Awdurdodau Iechyd pan fo'r Awdurdod Iechyd yn penderyfnu cynnwys yn amodol, tynnu'n amodol, neu atal dros dro feddyg o'r rhestr feddygol.

Mae rheoliad 15 yn darparu ar gyfer apeliadau ynghylch penderfyniadau penodol i'w clywed gan yr FHSAA.

Mae rheoliad 16 yn darparu i Awdurdod Iechyd hysbysu personau penodol am wybodaeth sydd yn gysylltiedig â phenderfyniadau i dynnu, osod amodau neu atal meddyg oddi ar y rhestr.

Mae rheoliadau 17 a 18 yn darparu ar gyfer yr amgylchiadau pan y gall meddyg dynnu ei enw oddi ar y rhestr.

Mae rheoliad 19 yn darparu ar gyfer taliadau i feddygon a atalwyd dros dro.

Mae rheoliad 20 yn diwygio'r cyfnod statudol ar gyfer adolygu a nodwyd yn adran 49N o'r Ddeddf o dan amgylchiadau penodol.