Deddf Treth Gwarediadau Tirlenwi (Cymru) 2017 (dccc3)

RHAN 3 GWAREDIADAU TRETHADWY A WNEIR AR SAFLEOEDD TIRLENWI AWDURDODEDIG

PENNOD 2 Y DRETH SYDD I’W CHODI AR WAREDIADAU TRETHADWY

Deunyddiau cymwys a chymysgeddau cymwys o ddeunyddiau

15 Deunydd cymwys

(1) Deunydd cymwys yw deunydd y mae’r gofynion a ganlyn wedi eu bodloni mewn perthynas ag ef.

• Gofyniad 1

  Mae’r deunydd wedi ei bennu yn y Tabl yn Atodlen 1.

• Gofyniad 2

  Mae pob amod yn y Tabl yn Atodlen 1 sy’n gymwys mewn perthynas â’r deunydd (os oes rhai) wedi ei fodloni.

• Gofyniad 3

  Ceir—

  (a)

  os yw disgrifiad ysgrifenedig o’r deunydd yn ofynnol yn rhinwedd adran 34(1)(c)(ii) o Ddeddf Diogelu’r Amgylchedd 1990 (p. 43), ddisgrifiad ysgrifenedig o’r math sy’n ofynnol, neu

  (b)

  os nad yw disgrifiad ysgrifenedig o’r deunydd yn ofynnol yn rhinwedd yr adran honno, dystiolaeth arall,

  y gellir penderfynu ar ei sail bod gofyniad 1 a 2 wedi eu bodloni.

(2) Caiff rheoliadau ddiwygio Atodlen 1.